¹ Tebafa taimbe mu teete pa teba neleng tetelatu Yesus ko letelae-Ke. ² Kaimpa teba-teba Farisi pa teba-teba ropo fojang tewe pompo te e, ''Kebawe teba-teba neleng kele ile pa kepate lupa jajong tang ete.'' ³ Kaimpa leng pate aha kelai tewe, Ke pikele, ⁴ ''Ebawe baungka keka ewe jako keke mambire nahipang pang nahipang pang hingtung jako, pa aling ung lengti, kewe kelu fafakale jako mambire nahipang pang nahipang aling kelefe tete e tahou Belantara. Keti kejuko jako lengti ing ketijuko kefi. ⁵ Pa keti kefi jako ing keke etife pawu pa kekeka mula pina kewe nakai. ⁶ Te teju paa keti kefi teba hela keke pa teba paa tata-tata keke lengte tewe, 'Ewenaka lupa e nipa jako nine nifi kelengti; ⁷ Nilengte ewe,petetetu janawawa peing bapale wa surga tu keba aling ke neleng ke kekofa keka teba mambire nahipang pang aling nahipang pang aling teba ing teing kekofa fata Kewe ing Aha kela Taimbe Perak Lengte ⁸ Peana peume wene pe taimbe pepe nahipang pang hingtung kang perak, Ana pewe taimbe kang aling ung lengte, ra pefaka pa paa ing jahenglong pe fuka, pa taimbe kang hingtung peju huhufa ko pefi? ⁹ Pa,ana pewe pefi, penuko teba-teba hela pa teba paa tataing pa penu te tewe, 'Ewenakae epa nelupa nipa niwe taimbelengte ing nifi.' ¹⁰ Ni lengte ewe, ana teing-angra janawawa wa teba fangpa fanana Aike ana keba aling neleng ke neleng kekofa fata.'' Aha kela ana Ko Baleng-Baleng Hingtung Ko Bafang Reke Keke Keke liti Kemu ¹¹ Kaimpa Yesus lengte, ''Kebaung ko keke baleng- baleng hingtung. ¹² Ko bafang kelengte Ai keke, 'Ai,niwe jako nine jahenglo kang mepeko motu nine mepete.' Kaimpa, Ai keke jatena kete kekatu kekole ko hingtung keke. ¹³ Joraka kaimpa, ko bafang ke keing mu kelefata pa keka keti bame hambangwo pa kefua ke jako keke kekapa lupi-lupi ong kehei-ong kehei. ¹⁴ Ana lelepaing keleko katafa, ja lewang bame ing jajongka teheki, pa kewe lelepaka e. ¹⁵ Kaimpa,kewe keka pa keti jano kelei kebaung keba bame ba, kelengko keti lehe pale ja keleng tetang-tang pale keke. ¹⁶ Ke pungle hu keke ja kehehe jajong jong-jong pale-pale tang enya, baungra jajong tewenika. Ko Bafang Kemuna Ai keketu ¹⁷ Kaimpa ko bafang ing hu tehe, keleng, 'Anawe teba-teba nawo aike jajong tete nawo-nawo, niwe kewe atalera nihuki ko niwung- wungle. ¹⁸ Niwe nihaleng- leng pa ni mepuna ai nine. Niwe lengte te ke; Ai, niwe neleng nilete surga pa nile ho meme. ¹⁹ Niwe ana bahing mefu meme niwe ko memeka niwe ko mepeng-pengka, niwe mebeko mepena ana teba jano meme re ete. ²⁰ Pea, kekaleng pa keka ketiti ai keke. Anaing-angra, koing hambang tafa,ai keke kewe kefu pa ke pipate kele, ai keke kekata ke kejuke pa ke nupa kewe. ²¹ Kaimpa, ko ing kelengte ai keke, 'Ai, niwe neleng nile kote surga pa ho meme. Niwe ko meme mepeng-pengka.' ²² Peapa,ai kekeing lengte teba-teba jano reete, 'Eko- kofa! Ewalewe ro efengwo eweleng kefa tanghi ekefa no kang-kang pa langhepo ewefa tang e keke. ²³ sapi ko tuhopa pa epung. Elewe jajong ne nenana pa newena kaka, ²⁴ ko ninewe kewa pa ung-angwe kelefute. Kewe kelengti ung-angwe kemete.' Pea epene newena kaka.'' Ko Bahu kehufeng Ai keke ²⁵ ''Bang ing, ko bahu ke lei lehe, pa kekako tu watupa paa keke, ke le kelate jalang musik pa li-litete e. ²⁶ Pea,ke lengko kebaung keba aling ka bapo-bapoing pa kekengte ja haung lewang. ²⁷ Keba jawekotu keleng te ke, 'Kebafang meme keme te, pa ai meme sapi ko tuho nana kepung, kewe kemela efeng kotu.' ²⁸ Kaimpa, ko bahu kehufeng pa kemukeng titi ongke ai keke kekana pengti pa ke epikele. ²⁹ Anaing-angra kewe lengte ai keke, 'Felangro-felangro niwe jano nile me ni ne nitupi pa jaleung mepeka ja mepeng lefa nilaka ja mepeng, peanya mewe niwe jaungra mepepengka kambing tong ung nira pesta nileko teba hela-teba hela nine. ³⁰ Peanya,ko meme kemete jalelepa jahenglong meme ketakukoka teume-teume, ai sapi ko tuho nana mepungti ke.' ³¹ Peanya, ai keke lengte ke, 'Ko ninewe, mewe ama nelupa, pa lelepa ninewe peing ja meme. ³² Pea, ung-ang bangwe epene pesta netete pa ewe nakaka kebafang meme ke kewa, ung-angwe ke kaleng kefute; ke kelengti, ung-angwe ke nefi.'''