1
Teba nawo te ena ropu tete te ja lelepa lewang e langhou-langhou nene,
2
Ana ing-angra ropu tete pa teni kote nene wa teba-teba jato tu teing jalutopa tefu pateing pifeng hefeng teni eti .
3
Peanya nipenilafu huhufa pa nitupipa wa lopana, hefengwo pera ni pole pa kang-kang nile teme, he Teofilus me eme mupe,
4
peanya me ra jaing mepu tata ja bamuang tenaru teme .
5
Poing herodes jeng ing keweko, keing Raja Yudea, kebaung bati keke imam Zakharia keka tebalung Abia. Ekeing pewa tebale Harun, pa bati pepeing Elisabet.
6
Zakharia pa Elisabet tenake ing teba-teba bamuang temete Tata. Tenake po teme jaung fengra teteka tela ana ropu nukotu pa Tata janoke.
7
Peapa, tenake ko ung tenake tekeka poing Elisabet pe babeng pa tenakera teba huhu.
8
Wakote bang jano bapaing rerete, Zakharia jano kewe ke teke eti imam kemele Tata ho.
9
Te kefu teteko ahawang imam terepa ete, Zakharia ke teke undian tete kemekengti Tata Pake pa ukupanra kelelele.
10
Wakote ukupan kele bapa upafume lupompong tete e peng.
11
Peba fangpa Tatake nepeang Zakharia pa pero nonalo altar ukupan.
12
Kaimpa kekalengte peba fangpa, Zakharia nete pa kefu.
13
Jatuko, peba fangpa penute ke.''Me fufuka Zakharia, pa lupompong meme pe kelu. Eme Elisabet, ko petututu ko baleng meme pa bati mefafa Yohanis.
14
E ja elela pinapa pa ewena kaele, pa teba nawo tera lapa ewe naka ele ke petang ha a.
15
Ke huko bapale kerule Tata ho pa panafeng anggur pa panafeng hinghing ke kungkung kale po keme huto ani keke kene keke Feng Tu hetime.
16
Keleko teba Israel nawo temepuna Tata tete.
17
Ke lengkai kekai to Tata Fengkepa nafeng ing Elia, keleko teba ana ai-ai pung tete temepuna teangku-teangku tete. kera keleko teba-teba ke telaka temepuna teba-teba pung hefeng bamuang, ana ingra,ke bapa ketupiko te meme Tata.
18
Zakharia ke lengte peba fangpa, ''Tunane ni jalelepa ing nilu? Pa, niwera niwe bahufa pa nienenine pera pebahufa.
19
Peba fangpa penute,'' Niwe Gabriel, niba fangpa ni rule Tata hoke. Ni kelengko nile pi lele me pa pina hefeng niwale me.
20
Peanya ung-angwe mepupu! Mewe le pepe pa pi mepepe kape pa wakotu bangpa jawe tumotu me hume pete paka tehi piti nine, wakotu hetepa bang pepera kotu.
21
Bapawe temepa Zakharia tejeng e, Te jeng e- jeng e jatu Zakharia kele joile Tata Paike.
22
Kaimpa kekengtu, Zakharia pi ungra te keleka. Teri Zakharia jaung kewe kefu Tata Paike pa kenohafa kele peleng wae tepa pi keleka.
23
Wakotu bang jano imam keweko kewei, Zakharia ke muna pa..a keke.
24
Wakotu jaing lewang, Elisabet pe nepa pane peweng jo ke napang. Penu.
25
Kawe jawe Tata kelekotu ni. Ke ni kefuile paja nilemotu kejo wa teba nawo.''
26
Pifeng kupa teri Yesus Kristus. Bang ing Elisabet pe nepa pemo ke napanghi Tata peba fangpa kewefo pete kota jeng ing Galilea pebati Nazaret.
27
Pe kewefo pete pefi pebaung ne lopa pa nepe pute wawa kebaleng ke bati Yusuf, ke Daud leke. Peba ne lopa ing pe bati Maria.
28
Peapa,peba fangpa ing petefi Maria pa penu, tabengja petu ''Hefengwo, he meing ma kele Tata lakole me.''
29
Le pewate pina ing peru, Maria pe engtape. Peweng e pung pepe jaweja tabengja we.
30
Peba fangpa penute pe,'' Me fufuka, Maria,peanya Tatawo hefeng Keke kewelengte me.
31
Le mepapa, me ne papatu kopa pa komepe kobaleng, pa me Ke bati mefafa Yesus.
32
Ke huko bapale pa ketenie Tata Koke Ke Eti Mule.
33
Ke jano kejano kelele wa Yakub leke pa epa pipafe pa jeng Tete Keke ena ing-ang e..etu.
34
Maria pera nute peba fangpa ing, '' Tunane jawe lewang-wangtu pa ni kebaungka nikeka?
35
Peba fangpa penute pa pipetu pe a, '' Bapo Feng Tuwo ketete mepa Tata Ke Eti Mele hefeng keke me tutang kele. Peanya, Ko ing me tanghaa ing tuwo pa tenie Tata Koke.
36
Pa elu tata Elisabet pe jangme meme ing pera nepa po peba hufa netu. Pera hipanafu pe babeng pemo, ung- angwe pera pemotu ke napanghi.
37
Peing jaleungra tangle raka pekotu Tata.
38
Pa, Maria penu, '' Bamuangwo niwe Tata bake, lewang-wang ne ninetu peana mepengkotu, '' Peanya peba fangpa pewa pe perufate pemo.
39
Maria Pete lapetu Elisabet Ana bang-bang ing Maria ne petupi petete jeng pefa, pete kota Yehuda.
40
Pete pekeng Zakharia paa ke pa tabengja petu Elisabet.
41
Kaimpa Elisabet le pewate tabengja wa Maria, ko memupe hu ke e pa Elisabet pe Bapo Feng Tuwo pe tutang kele.
42
Peanya Elisabet pewala pina nafeng,me Makele wa teume nawo,pa nepaha meme Makele.
43
Ni weba ani Tata nine petu ni ?
44
Bamuangwo pina tabengja meme kakotu he lenine, ko nimule newe ke epa ni pungle tafa.
45
Hupalang meme hefengfa koko meeng huhufa ja Tata lengte me hetepa.''
46
Pea, Maria penu, '' Lengtu nine Tata pi keleng,
47
pa Feng nine pe wenakate kotu Tata, Ke Hefeng nine.
48
Peing, Tata bapo Kekakileng teba nepe. Elele, ung-angwe pa wanatote, teba nalungpa teni teniete ke hefengwo.
49
Peing Ke Eti lelepa kefalu jalelepa bapale kelemotu ni, pa tuwo bati Keke.
50
Ma keke keweleng wa teba mowe pa teba moung pate teba- teba Kea tefe eti.
51
Ke ing hefeng Keke kewenalung wala no Keke Kera teba kekoleile teba-teba ne terepa ete wapung tete.
52
Kera teba jafeng-feng te eti kele feile wa fujeng tete, pa teba-teba ne tetepate ne ekung pung e kelepa ete.
53
Ke teba heki keleko hulang wa hefeng keke, pa teba japa ni haju temela no ongbe.
54
Tata hefeng kewelengte Israel,bapaKe, te engmomo hefeng keke.
55
Peteing ana Keleng kotu jobe tete, wa Abraham pa bale keke ena ing-ang e etu.
56
Maria tena Elisabet telupa tetejoe ke hentomg pa pemona paa pepe. Yohanis Pakeleng tehieti pe Tanghaa.
57
Ung-angwe pa wakotu bangpa Elisabet ko petututu ing keing ko baleng.
58
Teba lentupa pa teba paitupa pepe teri Tata tete hefengwo Kewenalung bapalewo te Elisabet, pa terala pepa tewenakae.5
59
Wakotu bang nahipang, tete ko ing sunat tetete tera ko ing bati tefafa ko ing Zakharia, ana bati ai keke.
60
Tunane, make penu, ''Niongne kebati efafa Yohanis''.
61
Teba-teba ing tenite Elisabet, Nera pungtuka kebaungka lentume meme bati ing-ungka kotuna.''
62
Peanya tera noha tete te Zakharia tejengte, ko ing ke batiha neweko newefafa ko meme.
63
Zakharia kelengko tangri japo tete etu, pa japo kele nowea; '' Bati keke Yohanis.'' Pa teba nawo meing te engtape.
64
Wana ing-ang te, Zakharia lang u keje pa peng keke ing ana lopa. Ke pi kele pa Tata pi keleng.
65
Teba lentu tete tefe pa jaing ana pi tete tupa bame pekara Yudea.
66
Pa, teba nawo teri jalewang-wang tu ko we ?
67
Zakharia, Yohanis aike, kera Bapo Feng Tuwo hene pa hoho hefeng kelei, keleng pate,
68
Pi nileng Tata nine, Tata Israel Kea ne kekawale. pa newe bapa keke Kewo feju .
69
Ke tewe kele ete ana leto hefeng tafa tune pa Daud, bapo Keke leke,
70
Ana ing-angra Keleng wapina lang u nabi-nabi Keke teing tu watofa waetu
71
Ung newera hefeng newewe wa teba feng-feng nene,pa wa no teba nawo ne tenajiete.
72
Ke jakele ing hefeng kewenalung te tata jobe nene, pa peing Ke engkotu ku Ke lukotu ing tu,
73
Peing jang Kewo lakotu wa tata jobe nene, Abraham,
74
Kawe newera kekofa wa no teba-teba feng-feng nene ung nera jano Keke nere nene, wa epane nemute ne fufuka.
75
Ilo ing pepe pa bamuang tafa motu ho Keke, wa felangro pepang tu nemute.
76
Pa meko nine meing tenie nabi Tata Eti Mule, peing me memama leng memana tome Tata, ko lengma metupi koko Ke.
77
Ana hoho ung netite teri tafa hefeng keweleng bapa Ke. wa neleng-neleng tete kekofa fata.
78
Peing hefeng pa pung e Tata nene,Rang fefe luja tune wa jeng ete kotu.
79
Ko lujako te teka te e lupang pa teka teme baleng-baleng fengwo, ko tang e nene netere tuja nenana lengma pepe hefeng tafawo.
80
Po koing kehuko bapale, pa nafengwo ke feng hefeng hetimu. Kelei tahou waotu bangpa kone kewenalung bapa Israel.