^{2 1} Yesus naei Yerusalem yore nobewainyelemo, Betfage yo yaele Betania yo yaele Zaitun homunggae enene honote. Yesus ro bee ukeumile ete, "Mai bena honoye yore ebe, arulebobe, erebe keledai mbai hayae kilainyekoke hebeye. Bele keledai romiyae ehi na u ranne enuweiboimo, bele keledai na ha kilainyekoke kulabobe, yawenehobe rake mebe. ³ Romiyae mare hinnayembena, "Mekane bele keledai na ha buraeleube?" wemile, "Aei Tuhan kena koukoke rake keledai ranne hebennundere nahekibam mo mende inyembe. " ⁴ Rake ro bee ekete, Yesus yae a ukeumi wanem hubayaeikoke, bele keledai ro mau bene ha kilainyekoke ra na ha kulaiboke. ⁵ Belena romiyae hebate rake ro beere a hinaimile, "Mekare mokonebobere bele keledai na ha buraeleungele?" ⁶ Belena romiyae Yesus ukeumile a mekaijae waimile, ro beere rokaimikoke keledai yawainyehoke ate. ⁷ Rake keledai Yesus bokore yawainyehoke ekate, naei malo keledai moko ranne baikokemo Yesus na ranne yeunuweuboke. ⁸ Romiyae helem bolem meubate, ehiyo na malo nibine beubate, ehi yo o ha na akau yaele fae yaele insenewate nibine alowate. ⁹ Romiyae bena homo eubateyo nawanem moita hakowate yo kaenate, "Mem, Allahre buma kolomam! Allahre ro yae meke Kiyaere foi moi helem barannele!" Aei yobe Daudre yo wakuyae annununde!" ¹⁰ Bele yo waku foi moi baranne!" Allah na bumana hele, Mem, Nare buma kolomam.!" ¹¹ Yesus naei Yerusalem yone ayeuboke Allahre ei moloi-moloi imae kabam ete erulaiboke. Bele imae kabam nemene ewerekoke mewerekoke belera mote ekuke. Be bahewoye ne Yesus namota ohowate yo yaele alainyekoke Betania yore eubate. . Yesus Ara Nore Olomo Neungeboke ¹² Ya heuboke, namota ohowate yo yaele Betania yora alainyekoke bae Yesus moni hele hubawounge. ¹³ Nibine meubate ara no mbai erekeunge hebewoye, Yesus aloungekoke bele no kelere eke, ani yaele bele ara no mokokoke. Bele no kelere meka bae ani emokokoi, fae mo yae hubayekoke, ani maei he bam ne. ¹⁴ Yesus ara nore weunge, "okobang neay ani emukoiboy. Yesus a weungele "Waei no na ani yae romiyae annenayende yaele!" Bele ara no ninae ani emokoiyei mo hebenende. Namota ohowate yo anggaei borowate. (Yesus Akore Imae Eite Euboye) ¹⁵ Yerusalem yone mekate mo, Yesus Allahre ei moloi-moloi imae kabam eite mewefike. Imae kabam ete aruleufike, romiyae nate heubate yo nemene hukewoumi balayeke. Yahudi maei roi te baimile yo, naei hambum-hambum, aye merpati nate heubate yo maei anuwau, nemene kouba beumoumile. ¹⁶ A weuboumile benem hambum-hambum Allahre imae eite ewaisi namekai naite eheijaemo. ¹⁷ Belena romiyae hebewatere Yesus afoi faeufoi keleweoumi Allah Na yenjo kayaaro homone moloukoke a yae weuboumi, "Raei imae obe ei moloi-moloi imae nemene rake kani kelana romiyae yae? beleyaere meyae mokaungeboke yoko yo maei nalere yeuboke. ¹⁸ Imam falem-falem yaele Tauratre itayaeiboke yo bele boraibokene, nibi baeubate Yesusre honaibondere. Namekai borowate romiyae helem sele Naei ako-faeuko huboye romiyae nehaleyae elewate barawainyele. ¹⁹ Be bahewoye hee, Yesus namota ohowate yo yaele Yerusalem yora aibaleke eubate. (Wahila Rabo Allah re Einye Mo) ²⁰ Narene hele, wenana nibi relahira eubate mo, nabe ara no, are ukeunge erewanyele kalaukoke na hoboita oke na kambune. ²¹ Petrus bene nekeungehike, Yesus re weunge, "Kulu, ijoko ereibo, nabe ara no olomore neungebokae kaye mana kalaukoke!" ²² Yesusyae weumi, “Hila rabo Allahre einye mo halennele” ²³ Yesus yae weumi, rake a nehale yae mare wamale, hinye nehale na hila rabo halendena, rake homunggae wennele rawembonde, 'Nehale rawembonde, nabune enduwende,' rake are na kena einye waubau okoi nekende na, mekaha bum-bum elende benate yakanate. ²⁴ Belena mare wamale, hambum-hambum ebelire baungele riyaungele, rabo elae hele halembe, bele hambum mare inyembe. ²⁵ Na wanem, weyae ebeli eungebondena, wa kena einya romiyae ehire kena nebam nekane na, bele romiyae maei u nebam mokoubokete nundenayeukonde, waei Allah yo bumana ekenekeye nemene kuyenete-fanyenete. ²⁶ Romiyae ehi yo maei nebam enundeikoina, waei Allah yo bumana ekenekeye Kaye, namekai waei nebam re ekuyeikoi efanyeiboi ennekende. " (Yahudi Falem-falem Yesus Naei Elae Wake A Yae Hine Wainyele) ²⁷ Benem, Yesus namota ohowate yo bukaiboke Yerusalem yore mekate. Yesus hambaya imae eite meuboye bae, imam falem-falem, Tauratre itayaeiboke yo namekai Yahudi falem-falem Yesus bokore mekate, ²⁸ Rake riya Yesusre hinainyele, "Rake ha eme mbena elae yae mokoyae namekai hinye yae Ware elae ikete rake ha eme mokoyae?" ²⁹ Yesus weumi, “Reyae mare a mbai hinerensimbere, Rare wo kondekombemo, beleramo mare a ukembe, hinye yae Rare elae wake ikeuke ha emere mokale yakalate. ³⁰ Reyae mare hinamale, 'Yohanes bu koumi kiyaere hinyeyae ukeunge bu kouboumi, Allah yae, rake romiyae yae ukainyele?" Meyae wo kondeko!" ³¹ Bele yo riyana, nenaeimo kolainyekoke wa elate, "Allah yae ukeunge a yae umande bae, bensonde wemmele, 'Mekane Yohanes bu kouboumilere nehalere eleikoi nekaube?" ³² Bele yaere 'romiyae yae ukainyele' mokowoye yae umandere yaere, Yohanes mokowoye ha eme nehale elewate, Yohanes yenjo kayaaro, namekai bele falem-falem romiyae helemre fe yae koubaimilene. ³³ Belene Yesusre bele ro riya yae wainyele, “Meyae itiyam " Bele mekai mbai, "Reyae mare ewei hangga, mbelera rake ha eme mokale yakalate. "