(Anggur Hekena Yone Ahuba Aruneuboke) ¹ Yesus Yehudi falem-falemre ahuba arumbo-arumbo yae weuboumi, “Ro mbai anggur heke mokouboke, ruka yae ele neuboke, anggur bure ramenate maei abulu wauboke, kayaare hebenate yo maei imae heumiboke. Na anggur heke roi jae mokonate yo re roi ikeumile, betamo kulum uke yo moite euboye. ² Anggur maluweiboi ya, na u foi te ukeunge heke re ekaimokate yo bokore meke heke rorele naei kayere yaronggondere. ³ Bele yaere, u foite kilaiboke, haubae habaeikoke na me bangga yae ukanyele beufoke euboye. ⁴ Belene, heke rorele na u foi ehire ukeuge heke yo bokore euboye, bele hekena yo falembae habaeikoke nebam mokainyoboke fe yae mokowanyele. ⁵ Benem u foi ehi yae ukeunge euboye, nahibi haiboke. Bele mekaimo ro helem sele mokowaimile, ehi yo haubayae habaeyeke, ehi yo hosoi yae houbate. ⁶ Heke rorele naei fa mbai sele kena buhae heungeke, namekai meran u ranne kounge kayeere ukeunge heke yo bokore ekemo eleye, 'Ra fa naei a elende anggaei boronainyele.' ⁷ Bele yae heke kayaare hebate yo naete-naete a mehi yae elewate, 'Rake heke rorele naei hambumre kinyennele hayennele kaye niyae, mem homabom, bele nibi yaere nare kinyennele hambum aeite inyaibonde!" ⁸ Hekere mokowate bele fare kilaiboke, betamo haiboke, na u ekate anggur heke ele moite kainyehike eke. ⁹ Heke rorele mekayae mokommile? Naei mende yane, hekere mokate yo honde hayende, na anggur heke ro ehire yae yennele. ¹⁰ Meyae rake homo fae yolo-yolo eitayaeiboimo, rake mekai moloukoke: 'Imaere haete yo, ruka mbai nebam yae elaikoke yaere, mana bele ruka bereite yeuboke, Neyae bele imaere kaeuboke. ¹¹ Rake me u Tuhanre reufira mokouboke, aei ijoko bene foi eme wanem yeuboke'?" ¹² Belera nibi mehi-mehi baeubate Yesusre kilenaibondere, bele yaere romiyae helem arilewoyene fe yae faeubate, bele anuwaunge Yesus nukainyeboke eubate. (Pajak Maei A yae Hinewainyele) ¹³ Belera Farisi holona yo yaele Herodian holona yo yaele ukaimile Yesus bokore umalire hubanainyehindere mekate weubainyele. ¹⁴ Mekate mo Yesusre hinainyele, "Kulu, meyae itayaendeboke, Weyae Ro nehale, romiyae maei a elejatere kena okoyei. Weyae romiyae bere ereyei, bele yaere Allah Na ako faeuko nehale ranndamo yae elejeyae. Pajak Kaisar imandere? Nare eyeija? ¹⁵ Nare imandere, nare eyeijae? Bele yaere Yesus bele holo maei ame karebai itayeuboke, Yesus weumi, "Mekane Rare umali hubaukele?" Roi dinar mbai Rare kelendebo, ijoko ererebom." ¹⁶ Belera roi mbai rokate mekatemo Yesus weumi, "Rake hinyere u nulu yaele ro yaele molaikoke?" Neyae wainyele, "Kaisarre u nulu yaele ro yaele molaoikoke." ¹⁷ Bele yaere Yesus yae weumi, "Kaisarre hambum-hambum, kaisarre yennele, bele yaere Allahre Kaye Allahre yennele." Belena romiyae arilewoye Yesusre fa yae boubainyele. (Saduki Ro Miyae Yesusre U mali Hubawainyele) ¹⁸ Saduki holona yo, ro mbai hereye ra benem ewaleiboi, bele yo mekate Yesus re hinainyele, ¹⁹ "Kulu, Musare homofae ne rake mekai aere weume, "Ro mbai naei ugwa yaele, bele ro herendena, na miyae nale nukenebonde, na ugwake nahinggi rewende nekenete, bele yaere fa bam. Bele ugwake miyae nale rewende, orona mena yore holensindere. ²⁰ Ako mbai na kelu mehine bee yaele. Nabena kelu miyae rouke, bele ro neyae hereke beleyaere orona mena bam. ²¹ Nawanem na kelu benem na kaye bele miyae nale re rouke, neyae na wanem hereke, orona mena bam. Na bele mekai mbai na kelu namenem na kaye. ²² U kabam na kelu mehine bee kaye, nanemene fa bam mo. Nanemene riyau weuboke bele miyae nale hereke. ²³ Bele ya yembondene, nanemene walenaibonde, rake miyae hinyere naisele miyaere yembonde? Mekane, rake ro mehine bee nanemene naei miyaere yaeibokene. ²⁴ Yesus yae weumi, "Homofae yolo-yolone molaikoke namekai Allah elae wake meyae eyitaeiboinye belene onaeube. ²⁵ Mekane bam, here nolora walenaibonde hee, ro miyae eyaroi namekai miyae rore ei, suragane romiyae malaikat wanem imabonde nekemayende. ²⁶ Na hibi romiyae here wate yo benem walemmile maei, Musa homone moloukoke meyae ekoikoinye? Bele homone erum isa nolora i beuboye Allah yae a weunge, "Reyae Abrahamre Allah, Ishakre Allah namekai Yakubre Allah yeubokale,' ²⁷ Bele Allah here yo maei bam, neyae wali yo maei Allah. Bele aerene mana yakala yeuboke, bele yo waleumikoke, maei u bene mekai nebam hele yae nekayembe. " (Ahuwe Nehale Nabena Kiyae) ^{31 28} Ro mbai Taurat itayaeuboke meke anggaei boroweounge. Yesus ijoko erewounge, a hinewainyele na ijemo wo kouboumine, Yesusre hineunge, "Mbele ahuwe na beme hele kaye, ehiyaele bannele na?" ²⁹ Yesus yae weunge, "Ahuwe na beme hele kaye, rake neyae: 'Israel borom! Aei Tuhan Kiyae, Allah, Neyae nembai sele, ehi ehi u hele. ³⁰ Allahre buhae hennele, mai kena ura, mai u bene wa benera, mai elae wakera.' Na benem kaye neyae, 'Waei ure kena buhae haenae mekai wambele wali nibi mbainye ohojaube yore heumiyende.' Rake ahuwe bere neneibonde kaye, ehi wenende kaye u hele." ³² Tauratre itayaeiboke ro yae Yesusre weunge, "Weyae nanehale, Kulu. Weyea nahele eleyae, Neyae mbai, ehi eha u nembai sele Neyea. ³³ Bele, buhae hesei Allahre wa kena u nanemene yeugele, wa u bene wa bene nanemene, elae-walae nanemene nawanem wa rombai miyae mbai nanemene buhae heumile, na kabam hele hili ha akau ha wanem. ³⁴ Yesus bele ro ijoko erewounge na ije hele a elewoyene, Yesusyae weunge, "Raei me kelee u kelee na nekate holore yeubondere, weyae ahau bam sele. " Rake yeubokera ro ehi benem Yesusre ehineisi. (Kristus Nehale Tuhan) ³⁵ Allahre ei moloi-moloi imaene kelewoumi mo, Yesus a weumi, “Mehae mekai jae Tauratre itayaeiboke yo elate, Kristus bele Daudre orona mena? ³⁶ Daud ninaei jae Allahre Roh yae aungeboke elekoke, 'Tuhan, ra Rowa re weunge: Meube refine mei nuweibo, wa yokeijo nemene mokoremibonde Waei oro kelee me keleene mo menai orulembonde. ³⁷ Daud nenaei elekoke ‘Tuhan’ bae eleyene, eyae Nare Daudre orona mena yae eleikoi hangga!" (Ro Itaeijaele Haba Yaele Yo) ³⁸ Yesus ako faeukone kelewoumimo weumi, “Maei u kaya yaele Tauratre itayaeiboke yore hebembe, nibi nolone nare ohojate, malo heki koko yae hireikiyate, namekai ukaei bere isinaimilere kena ikowate imae bene nare nekejate. ³⁹ Ei moloi-moloi imaene anuwau bene nekejate, namekai hamam bulau mokojate anuwaunge nekejate. ⁴⁰ Neyae miyae nale maei hambumre yaronatere, ame karebaijae beijaimile, ebeli heki kaeu-kaeu hele molojate. Bele yore ehee bukulu emmihayende hele. " (Akauha Nehale Hele) ⁴¹ Yesus hili ha akau ha hawate anuwau bene nuweuboke. Romiyae re ijoko robowoumi na roi haubate. Ro miyae ru kangge yaele yo nemekai na roi kabam-kabam hele haubate. ⁴² Beta miyae nale mbai kou-kalo ne nekejeye meke na roi logam bee hele haweukoke, na kabam sen mbai hangga. ⁴³ Beta, Yesus namota ohowate yore kaeneumikoke weumi, "Reyae nehale yae mare wamale, rake miyae nale kounge-kalone nekejeye na kabam hele yae hau einye meke auboke. Bake romiyae mekate haubate mekaibam. ⁴⁴ Makane bam, nanemene mekate haubate na kui- kui mae-mae randa, bele miyae nale na kou-kalo randa meke auboke, na mena u na yae meke auboke. "