¹ Sabat ya meuwoke, ya mbai bele ikainye narene wawa hele, Maria Magdalenare Maria ehi yaele, bule auma rande ijoko ereiboite ewote. ² Allah Naei malaikat surga yaku bumara oke hee, onyeu kabam isineuboke, bele ruka kabam ro mauke hilaikoke oleungekoke, bele ruka ranne nuweuboke nekewoye. ³ Nabe yoi wili halamam hehe naeukoke, na malo keleumom wau yaku bumana keleumom wanem. ⁴ Fela yo ruka bule kayare hebewate yo buhae hokoumiboke, orome hayaeiboke ane balekate, here no mekai jae honowate. ⁵ Malaikat meke, bele miyae bee re weumi, "Buhae ehokoi jae, Reyae itaeyeubokale, meyae Yesus ohaline habaeikoke Kiyae yae baeungele!" ⁶ Rakene ohonoi ja, Yesus waleuboke, nabena mare a weubombe, Mebu, Naei anuwau nekainyele honggowoye erebo. ⁷ Hasale yae ebe, na moita ohowate yore wemmile, Yesus ro miyae herekate yo nolora waleuboke, Galilea kanina bere eye, belene mambele hubayenggombe. Itayaeuboke, nabena mare weubamale. ⁸ Bele miyae bee hasale mo bule ran nukeiboke, na fe yaele aumiboke ewote bele yaere na kena rei mai sele kowote, hakaikoke namoita ohowate yo bokore ewote. ⁹ Bele miyae bee nibi nolone ewote he yae, Yesus meke na moita ohowate yo yaele hubayaeikoke weumi, "Onomi, na moita ohowate yo na bokore mekate, oro hele rorokate ei molo wainyele. ¹⁰ Benem Yesus weumi, "Eme, Raei aka baeke wemmile, Galileane ema hubayende Rare erendele." Fela yo bule kayare hebewate yo roi jae mokaiboke, ame karebai ro miyaere huwenaimilere. ¹¹ Bele miyae bee nibine ewoteyae, fela yo na keli name Yerusalem yore mekate imam-imam falem bokore mekate waimile, bule ranna yeuboke are itaeiyeiboite mekate. ¹² Imam falem-falem, Yahudi yoyo koteyo arilewoye riyanemo, a mbaite hokonaikondere. Riyane hokaikoke, bele felayo kayare hebewate yore roi jae wahenaimikondere. ¹³ Na a waimile, "Yesus namoita ohowate yo, reniyai jokune honowande hee mekate, Yesus na no yoko yae roukate." ¹⁴ Yo falem Pilatus rake a borombondena, mare nebam emoikoi maei, meyae a na moi-moi umande. ¹⁵ Roi yaraikoke, bele mekai a faeu ro miyae, aka baekere waimile, bele a mekai jae Yahudi kani ahire-ahire huweijaimile, ninae mande rake hee namam huweijate. Yesus Naei ayem kolowoye ¹⁶ Yesus are ukeumi wanem, na moita ohowate yo Galilea kanire ewate, homunggae mbai Yesus keleumibokere. ¹⁷ Bele homunggaene Yesusre erekainyele, buma kolowainyele, bele yaere ehiyo na kena wau-wau koubate ¹⁸ Yesus mekemo na moita ohowate yore weumi, "Allah Na ela wake, surgana namekai rake kani kelana, nemene hele Raei me einye kinyeukeboke!" ¹⁹ Bele aerene, rake kani kelana ro miyae yoni-yoni, embe na hubane haeinye, Na ro miyae kelemile, Raei a elalere hakonayembe nekenayende. namekai rake yore, Maekore ro yae, Reyae Allahre kelu royae, AllahRoh ro yae bu kommile. ²⁰ Ro miyaere, mare kelewamale, bele a yae huwemmiyembe, hakonayembe. Reyae mare na hibimo ei hawerembe, ende rake kani kela huba mokorende yane."