¹ Ya heuboke mo, imam falem-falem, yoyo kote nemene arilewoye, a mbai hokonaikonde Yesus honaibondere. ² Yesus haa kilainyekoke, yawainyehoke ekate yo falem Pilatusre bokore ekate. (Yudas Na U Nenaei Naleukoke Hereke) ³ Yudas kelaite mokouboke kiyae, ijoko erewoye, anggaei boroke, imam falem-falem hokaikoke Yesusre me nokainyele honaibondere. Yudas mehi neufake, 30 keping perak rouke, benem imam-imam falem yaele yoyo kote yo re bele roi rouke bemmihonde meke. ⁴ Meke weumi, reyae kabekokale hele, ro mbai hala bam ro mare ikamale hombombere. "Bele yaere imam-falem-falem yae wainyele, "Maembele elemakonde a bam, wenaeijae mo eleukonde!" ⁵ Yudas namena rouke meke roi Allah Na yo imae ralo imae wakundanne na ikele u kaeungehike, Yudas meukuko, aloungekoke, meke na u nenaei naleukoke hereke. ⁶ Imam falem-falem bele roi yaraikoke elate, "Hilina akauhana hawande anuwaunge rake roi ehaweijae, haubuhi nebam, kelaite nekate roi na u niki yae oleukoke. ⁷ Riyane mehinim kolainyekokemo, bele roi rokate ebe helaite mokoye ro re kani kending roi jae rokate, ro yomoinya ro miyae herendemo, bele anuwaunge molonasande. ⁸ Belene yae, rake kani naro, "Okire rileuboke kaniyae wainyele!" ⁹ Allahre yendo kayaaro Yeremia, a nuleuboke eleukoke," ¹⁰ Israel kanina ro miyae a hokaikoke, 30 keping perak yae, ebere mokoye ro re kani roi jae roukate, Tuhan Naei a ukeuke mekai neiyae." (Yesusre Gubernur Pilatusre) ¹¹ Yesus kilaiboke, Gubernur Pilatus bere yawainyehoke mekate, hineunge, "Weyae nehale Yahudi maei Ondofolo?" Yesus yae weunge, "Nehale, wenaei jae nare eleukokae!" ¹² Imam falem-falem yaele Yahudi yoyo koteyo ehere unganyonde a hinainyele, Yesus a bam faeu bam hebewoye. ¹³ Yesus a bam mo hebewoyene, benem Pilatus weunge, "Ware a mehi-mehi hineyayete, a weimi. ¹⁴ Yesus a mbai sambai ewei mo hebeyene, Pilatus fa yae bouboye. (Pilatus Nahinggi Bam Yesusre Hayennekondere) ¹⁵ Mana ya kabam yeuboke, Paskah ya kabam, feu ragi bam anewate yaa, bele yane ro mbai kawa ieta metuweye, Yahudi ro miyae nenaei jae eleinaibonde ¹⁶ Bele hee kawaa einye ro mbai hebewoye, naro Barabas. ¹⁷ Na rene hele, ro miyae helem sele arilewoye, Pilatus ro miyae arilewoyere hineumi, "Mai kena kaube, hinye yae reyae hatenggondere, Barabas yae, Yesus, Kristus yae waungele kaye?" ¹⁸ Pilatus na u nenaei jae itayeuboke, ro miyae helem sele Yesusre kena buhae heubainyele, Yahudi yoyo koteyo kena hensen kowate Yesus kelukate Pilatus u re yae kinyaiboke. ¹⁹ Pilatus are kolainyele imaene, anggem nekei ranne nuweuboke, na miyae rake a yae ukeumi ekate, Pilatusre wainyele, "Rake ro wali himaleungeboke, weyae ebarai jae namekai mehi-mhi emokoi jae, mekane nebam, bele ro re aerene mana reniai imene-naline erekale, ra u himi hele hubaimiyanale. ²⁰ Imam falem-falem yaele Yahudi yoyo kote yo yaele, ro miyae helemre ahufuf huwaimile, Barabasre hanyainyekonde, Yesusre honaibonde. ²¹ Pilatus benem hineumi, "Rake ro bee hebetera, mai kena kaube hinye yae reyae hatenggondere? Nemene kaenate, "Barabas hayeinyekoke" ²² Pilatus hineumi, "Bele mekaina, meka yae Yesusre mokorembondere?" Nemene kela kaenate, "Ohaline habeiko!" ²³ Pilatus hineumi, "Mekane? Meka nebam bae Neyae mokouboke?" Kabam hele kelae kaenate, "Ohaline habeiko!" ²⁴ Pilatus u bene nekeunge, haubuhi mbai rake yeubokene emokoiboi sele, ahine-ahine aku keteuboke hate, belene yae, bu roke, ro miyae bene na me kuyeyemo a weumi, "Reyae rake ro nebam emokoiboi, namekai na oki relembonde. menaei jae kaembombe!" ²⁵ Ro miyae nemene wainyele, "Na oki relembonde meyae kaemabonde namekai maei kelu fafa uranne." ²⁶ Beleramo Pilatus Barabasre hayeungekoke, Yesusre ukeumile cambuk yae habewate. Pilatus ikeumi Yesusre ohaline habanaikondere. (Pilatus Na Felayo Yesusre Aukae Ke Koubainyele) ²⁷ Gubernur na felayo Yesus yawainyehoke, gubernur na imaere ikate, felayo yoni-yoni arilewoye hebewate. ²⁸ Yesus na malo kulainyekoke, malo kabam fi kole mekai jae hirainyekoke. ²⁹ Yesus na falem ne, isa yae roukate hainyekoke bele yae ubunainyeboe, meube mene mehukum re nauga ikanyele keluboye, belera oro hele rorkate, uaka-ka kainyele wainyele, "Onomi, Yahudi maei Ondofolo!" ³⁰ Ki hesere yae haeinyele, namena nauga keluwe rowate, Yesus na falem ne habaete. ³¹ Auka-kae kainyele, na malo kabam kulainyeboke, Yeus Naei malo yae benem hirainyekoke, yawainyehoke, hmunggare ewate, ohaline habenaikondere. (Yesus Ohaline Habaeikoke) ³² Gubernur na felayo moite mekate bae, ro mbai hubayaeikoke, Kirenena ro, naro Simon. Simon re wainyele Yesus na ohalire kaembondere. ³³ Homunggae mbai naro Golgota re mekate, bele homunggae naro "Tempat Tengkorak." ³⁴ Yesusre anggur bu yaele empedu yaele alaeiboke ikainye anennsindere, bele yaere Yesus ahiyae eleikoke, emaeneisi. ³⁵ Yesusre ohaline habaeikoke hee, felayo kayare hebewate yo Yesus na malo ne wahewate, undi yae hayewate. ³⁶ Felayo anggem nuwaikoke, Yesusre ijoko erewanyele. ³⁷ Ohali na,Yesus na falem bumane homo mbai molaikoke ukate, "YESUS RAKE NIYAE, YAHUDI MAEI FALEM YAE ELAUBE." ³⁸ Yesus ohali ne habaeikoke hee, ro bee nebam re mokoyeke nembainye habaeikoke, ro mbai meube refine, ro mbai meli refine. ³⁹ Ro miyae bele anuwaunge ele-mele kowate yo fangge-ngge yae kate, ⁴⁰ Bele ro miyae yae elate, "Weyae a elewoyae, Allah re yo imae-ralo imae Reyae kelarebonde, namenem ya Reyae arunnunde, bele baembae wa U onomi rewei, Weyae nehale Allahre hina fa-hoifa na, ohali bumara oyakoibo na!" ⁴¹ Bele mekai mbai imam falem-falem, namekai Taurat itayeiboke yo, yoyo kote yo, Yesusre auka-ka yae koubainyele, wainyele, ⁴² Ro miyae ehire mokoumi onomi yarate, bele yaere na umbaite onomi rewendere emokoiboi hangga. Nehale Neyae Israel maei Wali Ondofolona, ohali bumara are owakoubo, belere eyae hila rabo Nare halemande. ⁴³ Yesus Naeko Allahre hila rabo haleunge, nenaeijae Na u onomi yeunge, Allah kena konnekondena. Yesus Naenaei a elewoye, "Reyae Allahre hinafa hoifa," ⁴⁴ Ro mbai nebam re mokowoye kaye ane-ne yae koubounge. (Yesus Hereke) ⁴⁵ Mana hu ijoko name yeuboke, oubom kika rake kani nemene neke hebeye, oke hu ijoko mehine keli yeuboke. ⁴⁶ Hu ijoko name yeuboke mo, Yesus kela kaeneye, eleye, "Eli, Eli lama sabakhtani?" Allahku, Allahku mekane Rare nukeukebokae?" ⁴⁷ Ro belena hebate yo, anggaei boranyele elate, "Rake Ro." Eliare kaeneunge. ⁴⁸ Na heki bam mo fela yo mbai hakauboke, eke bunga karang rouke, anggur bune yaweufike, naugane kileukoke, Yesusre ikeunge annensindere. ⁴⁹ bele ro eleye, "Ijoko eremam, Elia mende, Yesusre walennebonde. ⁵⁰ Yesus benem kelae elaekai sele kaenekoke, Na no u yeuboke. ⁵¹ Ijoko erem, Allahre yo imae ralo imaena malo kabam, bumara oke ane nemene kayeukoke bee yeiboke, kani namekai onyeu isineuboke, ruka bum-bum kayewate. ⁵² Bule nemene wewe koubate, ro miyae herewate yo Alahre hila rabo halewate yo, anyukate walaeiboke. ⁵³ Bule randa anyukate, Yesus waleuboke, nene-wae-wae yo yam re arulaiboke, na u ro miyaere kelewaimile. ⁵⁴ Fela falem, namekai ro miyae arilewoye hebewate yo Yesusre erewainyele, bele hee onyeu kabam hele isineuboke, rake ro miyae fe hele koubate elate, 'Nehale, Yesus Allahre hinafa hoifa ya!" ⁵⁵ Belena miyae maengge Yesus na moita ohowate, u foi mokowainyele yo helem sele hebewate, na ahauka mo ijoko erewate. ⁵⁶ Maria Magdalena, Maria Yakobusre Yusufre nenake, namekai Zebedeus nenake. Yesus hereke molaisake ⁵⁷ Hu akowoke mo, ro mbai ru yaele kangge yaele Arimatea na ro naro Yusuf, Yesusre moita ohwate ro, ⁵⁸ Piatus bokore meke, Yesus na no re rewendere. Pilatus ehe koungekoke, ukeumi Yesus re no Yusufre inyainyele. ⁵⁹ Yusuf, Yesus na no rouke malo nemene ruleufike. ⁶⁰ Meke bule eme homunggaene mokouboke belene nekeunge. Yusuf ruka kabam oleungekoke, bele bule na maunge hileukoke, betamo aloungekoke. ⁶¹ Belene Maria Magdalena, Maria, namekai miyae ehiyo bule ranne nuwaikoke.Yesusre bule kayaa ayaeikoke hebewate ⁶² Benem ya, Sabat yare mokainyehake nekewate, Imam falem-falem, Farisi falem-falem, Pilatusre imaene arilewoye. ⁶³ Pilatusre wainyele, Rowa, ame karebaite mokowoye ro na wali nekewoyene, a elewoye, "Namenem ya, Reyae walerebonde!" ⁶⁴ Belene yae, weimi, na bule kayaa ayaeiko hebai, na moita ohowate yo menate na no yoko yae roungate, enate ro miyaere hungaimile, Yesus here nolora waleuboke!" Bele ame karebai mokowoumi, na nebam hele ema hubannele. ⁶⁵ Pilatus weumi, "Meyae kayaa yo yaele, "Eme, mai itayeuboke mekai kaya ensebe." ⁶⁶ Ekate kayaa yo ukaimile kayaa ayaeikoke hebewate, namekai ruka kabam hilaikokene me nou herawaikoke.