(Hamam Bulauke Homo Hayewoye Ahuba Aruneuboke) ¹ Pele yo re Yesus a weumi, hambung peaite yakalate ijene pelera na a bareunge iteayeumi, ² Surga yo eke honounge pele na uw mekai, ondofolo mbai neai kelu re miyea roukeunge buheteiboi wokounge waneng eungemokouboke mekai. ³ Pelera neai abu akhore ukeumi, na a yeng de haumihike yo re kanewaimi bu hete haufikere, peleyea peleyo emei. ⁴ Pelera, ondofolo na abu ako ehi yore pele ro miyea yeng otere kolameale yore mai a weng mile. Mai membe anembere nanemene mokounge hakahele, obo muku, foi kabang yo yeale mai memanembere manemene nimboi yeai boke, meyea membe aneite mo amembere meyea mem reai kelu miyea roukere yane anemealere. ⁵ Rake ondofolo na nyeng ote haufikere, moijea pulewai eibuate ehiyo hekere eibuate, ⁶ ehi neai nulau makoite ekate ehi holoyo,makate na abu ako ikelaikoke, ekai haikoke. ⁷ Rake ondofolo kena haneuboke, neai uw kaya yo yang kayare hebate yore ukeumi, ekaite pele na abu akore haikokate yore ekate naromiyere na yo yang beale, haikoke, iyea wokaimile. ⁸ Belera, na abu akore weumi, Reai kelu miyea rouke bu hatere makoungehakanele yore, erameale manemene emeimoya. ⁹ Belene meyea eme, u nibi kabang eke honoye nibine, belene ro heleng miyea heleng yobongmike, rakelu miyea rouke ya na bu hamande anemale re.' ¹⁰ Belera na abu ako ekate ro heleng miyae heleng nibine hubayate yobowoimi foi te mokaite yo, nebang de mokaite yo nanemene hokoumeke, ondofolo na kelu miyea roukeunge yane meameere meukouko ke. ¹¹ Pelene rake ondofolo, eweufike ereumi, pele noloni ro mbai neai uw malo foi emokoisai meke nuewboke pele buhate ya ne. ¹² Na a weunge, akobea rake ya bu heteungekokalene, weyea meahea mekai pele uw malo waneng bea meuwefike. ¹³ Belera na abu akore weumi, name oro ha yea awennoko nawaneng embe kannehimbe moi bonde ende,ougeng nolore belene rume a rimende, iteha kilire enneayende.' ¹⁴ Na are heleng helere kanenaimile, beleyeare na name hele yobomibonde." (Yahudi Falem-Falem Kelai Nekate Yesusre Honaibondere) ¹⁵ Farisi romiyea ekairiyeaa arileufike, mokainyehake, Yesus neai a eleyerakeme nenanyebondere. ¹⁶ Farisi romiyea neiai keleimile yo re ukaimi Yeusus bokore, Herodian na role riya yeale. Ekate Yesus re wainye, meyea meteai weyea kareboite ewabei nawaneng Allah re ako feauko ahelere keleame romieya pele ijene hakate nawaneng weyea fee re efeai, nabeme pe jokore eyerei. ¹⁷ Pele waneng na weyea meare weime, kaisar ne roi ninggi yeannele bele embele kainye nahelere me beaneai bonde. ¹⁸ Yesus rake Farisi romiyea na nebam kelai hareainyele re, iteayeuboke belene weumi, meyea ro hele miyea hele bang wamale. ¹⁹ Ma roi ninggi mokaube, reare kelengdobo. Belene pele roi ninggi Yesus re makate na me ne ikainyele. ²⁰ Pelera weumi, rake roi hinye uw nulu mnyere ro homoyea molaukoke peleyea wainye?" ²¹ Pele kaisar uw nulu yea na ro homo yeale molaikoke Yesus yea weumi, pelewenang na, kaisar neai te yeaiboke kiyea meyea kaisar re kolongnele, nabemekei, Allah neaite yeaiboke kiyea pele Allah re kolong nele. ²² Yesus rake a ukeumire, Farisi ro myea faakare pou bate, pelera here poiboumi eibuale. (Saduki Romiyae Yesusre Kilenaibonde Nibi Baeubate) ²³ Na ya mbai Saduki ro myea, neai a feau elate, herenate yo pele ewaleiboi makate Yesus re na a mnainye. ²⁴ Saduki romiyea yea wainyele, Ro enserende na miyea nukenembonde fa pele ro moloro ehonoi, neai uw bakeyea pele miyea rowende nekenete fa ensononde neai yoho yonggore noro mere nekenayende. ²⁵ Mana meyea nanemene meahea mbai me ehine be aka beakere nekande Na pe na kiyea myea rouke peleyeare hekere, pele miyea nauwgake re nukeumiboke. ²⁶ Name uw waneng beneng na name neng na meke meahea mbai me ehine be yea kiyea ne. ²⁷ Meke na heainye nanemene aihereiboke, rake miyea neaijale hereke. ²⁸ Wali ya mengsembonde peleya ne walenaibonde,rake mieya hinye yea neai ro molore enjembonde rake meaheamboi me hine be aka beake? Rake aka beake nanemene neyea neai ro molore nekeukoke." ²⁹ Yesus neai a weumi, "Meyea wali nibire oneaukoke yo, nawaneng Allah re na puma kabang nawaneng na homo yolo yolore ei iteaiboijo. ³⁰ Waleiboi yane, pele yene miyea yaroi, rore nekenate re pele yone pele me uw waneng eyeiboi, nanemene surga na na puyo ayo ekai nekeijate yo yeale na hangga mboi enai nekende. ³¹ Nawaneng aihearai boke yo, enai walenaibonde meai, meyea homo tea yolo yolone makane eroikoi, Allah neai A mare iteayembokombe, ³² neyea hereauboke yo ro meai Allah bang, neyea ro meyea wali yeumi Allah. ³³ Rake ro heleng miyea heleng Yesus neai a iteayewoiumire, fakayea poi buate neai kena u neija huwewaimile. (Me Hukum Mbele Na Kabam Hele?) ³⁴ Saduki ro miyeare Yesus mokoumiboke a bang yeaiboke re Farisi ro mieya arileufike mboinye, a merau hanye hike. ³⁵ Pelera role mboi Musa re homo fea re heanau boke, kiyea, meke Yesus uw wali hubannehinde re, na a hinuenge. ³⁶ Musa re homo fea ne nekaite, mbele a yea neai napemere eremande mokomande?" ³⁷ Yesus yea rake role re weunge, weai Tuhan weai Allah re wakena uw nenamene hele, weyea buhea heungele. ³⁸ Rake a na kabang hele nawaneng na pemere yeuboke. ³⁹ A bee neng wa be me, Weyea wa ro mboi miyea mboi te kena buheaya kowende heumi wende, wa uw re mokanea waneng. ⁴⁰ Rake A be heteungekoke einye, Musa re a moloukoke nawaneng nabi-nabi ehiyo yea ike hayewate homo fea einye pele nanemene rake a bee einye aka paikoke. (Mesias Hinyere Kelu) ⁴¹ Farisi ro miyea arileufike nekewate, pelene Yesus yea hineumi, ⁴² Meyea Kristus re miyea yea ro raungele? Hinyere kelu fa? Pele yo yea wainye, "Daud re kelu fa". ⁴³ Yesus yea weumi, peleweneng na, Daud nehalo yea, neai ro wa yea ro kaneunge, ⁴⁴ Tuhan reai rowa re weunge, reai meungene meinunbo, reyea weai yokeijo nanemene weai oro kelene enai hebende. ⁴⁵ Kristus re, Daud Yea neai rowa kanennele, pelewaneng na meahea yea neyea Daud re kelu fa yea uwnganyele? ⁴⁶ Yesus neai a elewoyere, ehiye mbai are eleikoi hebeute. Pelehera pele yo Yesus re feainyeboke emyea a nineite mnenainyehindere kabewainyele.