(Ondofolore Weaisiyainyele Me,Yesusre Weinyehike) ¹ Pelehe Yerusalem de nobewainye, mekate Betfage, Zaitun mokone Yesus neai murid beere ukeumi enetere; ² Na weumi ebu ma be na yo ekehonoyere, pelene obowedu yeale mbai ha yea ikelainyekoke, Na fa yeale ekei hebate ebe na ha ikelainyekoke eburealebobe, pele obo be wendu nyeale yawemibobe reai pukore mabe. ³ Ro miyea mare a hinenayebe na mai a wemunile, Tuhan bea ukeumi pelene mekende yawami boke, pele kieya mare myembe rake obo wande yealere." ⁴ Rake uw mekai,nabi yea are hamainyekoke weneng pelena raye kaye einye ennuwendere: ⁵ Sion na meanggere embe a ponehimbe, erende, nondofolo neai pukore mende,kena uw ane hannehinde, obo wandu yeale mokoranne nuwembonde menete obo wendu yeale ha hokolo yeale, na hambung de keammele menete. ⁶ Neai ukeumi waneng, pele mekai na murid-murid harainyeboke mokai boke. ⁷ Pele obo be wendu yeale yawaimboke mmekate, na uw mokorande uw malo yea paikoke, pelera Yesus yeu uleu foke yeuke teke na moko ranne eu nuweuboke. ⁸ Pele ro heleng myea heleng ehiholo neai uw malo, uw malo, uw nibine peibuate ehi holo o fea ha fea, akau beale uw nibi hereayaimeke. ⁹ Ro heleng miyea heleng neai be ra aloinyekoke yona waneng neai moi homo na yo, na a keneumi ate, yakalai miyate. Nibi a wenneni, Daud neai kelure hubaro mando mereyeale kiyea. ¹⁰ Yesus mei, Yerusalem yone aruleufike, pelene nino yea heuboye, na a ninate pele hinye yea koimiyainyele. ¹¹ Pelene ro heleng myea heleng bea waimi, Neyea Nabi Yesus, Nazaret re, Galilea na ro. (Yesus Na Imae Ralo Imae Onomi Mokoungeboke) ¹² Yesus meke yo ralo yo imea Allah re pee imea einye, meke hukewoumi pelena yo hambung nai heibatere here poibuoumi, nawaneng na roi ninggire kolowate anuwan peipei peiboumi, nawaneng aye naite heibuate yo na anggeng nekei kulubore mongbuomi. ¹³ Yesus yea neai a weumi,homone molaukoke, Reai imea obe pele onggo anuwau, pelene ebeli kalire a honoijainye, peleyeare meyea mokaungeboke yoko peaipeai te anuwau ke honoijembe. ¹⁴ Nawaneng ijoko kumba, oro bang me bang, rake Allah re mea obene mate, Na neneai foi onomire mokoumi, yaroijate. ¹⁵ Napele waneng be yu beyebea yo,nawaneng Musa re homofeare henaiboke yo na yoko erewaimi Yesus emehare mokowoumi beibuate yakalawate, pelene fafa hokolo ei mongbuainye na a keainyele Daud re kelu fa nibi weannehi, rake a porowate, pele yo ikele a yea yarewaimi. ¹⁶ Pelera Yesus re mnainye, pele fafa neai a kenaimiyate, weyea poramea? Yesus yea weumi, borameale yea, meyea homofea na a molaikoke eroikonye? Wayeau ka nawaneng fafa nimene meaijate hokolo weyea mokoungehakea, weai puma pumare heaneayetere kolbe. ¹⁷ Pelera Yesus nukeumiboke, oro molouboke eukuke pele yo ra eiboye Betania yone huwe joku eke hongboye. (Yesus Na Onehenggo Keleumiboke) ¹⁸ Rene ya, Yesus peufoke pele yo kabang de, neai u moni hubawounge. ¹⁹ Meiboye nibi enene o no mbai hebeye. Eke pele o no ijene haubihi mbai jea hononde waneng u mo, na no kelene fea mo honounge pelera Na a pele nore weunge, weyea nebewende, neai mekai ba ani bang de hebewende. Na a ukeungera, na pele hu pele ya pele o no uke kalaukoke. ²⁰ Na murid-murid pele ereketere, fakaa re poibuate, neneai hinate pele o no meahea mekai ba, nahibi yea klaukoke?" ²¹ Pelene Yesus yea weumi, reyea mare ahele yea wamale, mbai wali einye mbai hila rabo nahele helembe, nawaneng makena kehi wahire ekoi, pele o no kelaukoke mo bang, meyea meneai nahinggi hemunggeare a yea mo wennele. Pelera raweubonde, eye bu wei nolone euruweibonde pele wenang nahinggi pende yakalande. ²² Nawaneng mbai hambung de embu hubayenggombe endowembe." (Yahudi Falem-Falem Yesus Mokowoyere Ame Yae Elewate ) ²³ Pelera, Yesus neakore yo ralo yo imea einye, pelene yo yung yo yebea yahudi yo re raimile neai pukore mekate, a hinainye, weyea rake me uw mokoyea, peaite yakala te, mbelena eleayea rouke mokoyea. ²⁴ Yesus yea weumi, reai a hinerengsimbe meyea reare wo yeale pelera reyea mare yakalerem bombe, reyea myere elea randa mokale peaite yakalate. ²⁵ Yohanes bure koloumi pele mbera? Surga meaita, mba ro miyea ehi meaita? Pele a mneumehikera, neneaijea uw bene hayate elate, Eyea surga meaita uw mande, neyea eare wemmele pelewaneng na, meyea makane Yohanes re eroboi, ehakoiboi? ²⁶ Nawaneng eyea ro miyea meaita uw mande, rake roheleng myea heleng Yohanes re, nabi yea me beaneainyebonde. ²⁷ Yesus re wainyele, meyea meaiteai bang. Pelene Yesus yea weumi, pele waneng na, reyea mare ei yakalai, Reyea rake elea wake mokale beaite yakalate re. (Ahuba Fafa Bee Maei Une Aruneuboke) ²⁸ Rake uw mekai te mai uw benere maakea nekembe? Ro mbai neai kelu fafa bee, meke na kelu pe nare weunge, kelu, weyea mana ya eye hekere eumokonde.' ²⁹ Na kelu pena ki yea, neakore ehere mo koukoke, peleyeare neyea nekere ei nekewoye. ³⁰ Peleramo, neako eke nakelu bee neng na re na a mbai pena kelu re ukeunge waneng, peleyeare, na kelu beneng na kiyea pe heleng koukokera, moi ta mehi eungefake, pelera oromolouboke hakere eke mokowoye. ³¹ Rake ro nakelu wa bee, hinye yea naekore a boroungeboke nawaneng neakore yene eumokouboke? Peleyo yea wainye Na kelu fa moinya kiyea. Yesus Na a weumi, reyea mare na ahelere wamale, pele roi ninggi re roboija te yo yeale, nawaneng uw nebang wa nebang de mokoijate yo, peleyo na pehele surga yo yang de anate meyea moinye pelenggombe. ³² Pelewaneng Yohanes mai pukore waliyea kelewombe pelere meyea ehakoiboi peleyeare roi munggire yobai teyo nawaneng uw nebang wanebang de mokate yo, ekai poranyeboke, bakanyeboke. Nawaneng meyea meneai erekaube peleyea mehire meyea eifoloi ekaube moi iteayeau bokera pelera meyea ahele yea elaube." (Hekero Yaele Roijae Mokate Yo Yaele Ahuba Aruneuboke) ³³ Wali poikoi nameikoi uw meai a borombo. Ro mbai heke eumokouboke nawaneng ele neuboke, pelene kee ramei meai kang neuboke. Pelera ro miyea ehire ikeumi ekaimo wate kaya hebewate. ³⁴ Bele hekene ohaka nime meke neke, heke role na uw mokoite ukeunge eke pele hekere mokowateyore pele ohaka muneneaijale yaronate. ³⁵ Peleyeare, rake hekere mokowate, na uw mokoiyore, haubea hoibuaiun, na uw mokoi mbai hoiboi haibokate, nawaneng ehiyore rukayea hayewaimi. ³⁶ Bee neng, rake heke role na uw mokoi roko bee neng ukeumi enatere, nawaneng heleng holo waneng meahumikoke etake, nawaneng rake heko yo yea Na me uw wenang roukaimile. ³⁷ Namoi hung rake heke role, nakelure ukeunge, Na a weunge weyea eye, weare rokonayete, feanayete. ³⁸ Rake heke yo, nakelure elekainyele, neneai a elate. Eyea nakelure hamabonde, pelera neai ruu kangge neako yea mokoungehake honounge eyea nukunahinde eaite yembonde. ³⁹ Pelera heke role nakelure ikelaiboke, heke ele moinye kainyehike nawaneng pelene aihouboke. ⁴⁰ Pelene, rake heke role neneai uw yea meke, neyea meahea uw mekaijea herembonde rake yore mokommibonde? ⁴¹ Bele yo yea wainyele, pele heke role engsonggonde pele yo nebang de mokoiboke yore, pelera hekoye ehi yo holore yemmi le pele hekene mokanate, nawaneng pele heke ani hene enai maluwende pele heke yo neaijeale re weumile enai maluwende." ⁴² Yesus yea a weumi, meyea homo fea yolo ne eraikoinye, ruka mehing de hasiyainye kiyea, pele imea obere mokaite yo yea kainyekike, pele ruka mbai mana one hining me hangga re youboke hononende. Rake Tuhan neai neneaijea hameungekoke hononendere? ⁴³ Pelene mare wamale, Allah neai yo yang pele mai uw ra rawembonde rowende romieya nawaline wali ani foi ekai hokaite yore ende yemmile. ⁴⁴ Nawaneng hinye pele ruka rangne engnalenggonde pelene ende morire kamaite embende, nawaneng monye pele ruka yea enghinem bonde pele ruka kelene nuhu nahure bende. ⁴⁵ Yesus rake a mekai harewounge, rake peyu peyelea nawaneng Farisi romyea porowatere neai uw nei jea huwewate, Na a elate,rake a eare yea weumi. ⁴⁶ Peleyeare nou heubuate Yesus ikeleneibondere, neyea fee yea hubawainye, ro heleng myea heleng Yesus re erewainye nawaneng neare nabi yea me peainye boke.