Pasal 13
1
Paskah ya kabam na nemam bea, Yesus nei hueungeboke, niyea rake kani kela ra ukengbonde neakore bukore endere, kena buhea re koiboye nawaneng kena buhea henende.
2
Reniai hamang ne angbuate, walobo meke Yudas iskariot, simon de kelu kena einye meuefike, Yesus re kelai me re nennele re.
3
Yesus iteai yeu bokera neako yea nanemene namere kinyewounge nawaneng, niyea Allah re ra meke pelene Allah re pukore niyea beneng bensonde ende,
4
Hamang de anenate anuwaunge Yesus aunguke uw moi melo keiboke bu hobei neai malo yea na he heai rainne heuboke.
5
Pelera bu rouke anuwae mbainye rileuboke na moita ohowate yore hubara raweu boke oro bure hobehou mi, nawaneng na he heainye malo yea hobewou mi keleng-keleng hem bea wou mi.
6
Yesus meke Simon petrus bukone, Yesus re weunge, "Tuhan na man bang hele weyea reai oro re ku yeu kokondere."
7
Yesus yea weunge, "Maka yea reyea mare mokomale rake hee re meyea eyeiteaboi peleyeare meyea pele moi meneai embe iteayembombe."
8
Petrus, Yesus re Weunge, "Tuhan, reai oro weyea bu eikuyeijea hele"
9
Simon petrus yea weunge, "Tuhan, pelewaneng na reai orore mo bang namekai reai me yeale reai faleng beale nemmene kuyeiteko."
10
Yesus yea petrus re weunge, "Ro miyea na uw bure koibiyoye kiyea na uw nemmene ninea yoloibiyoye pele ne beneng neare bu ekuyei noro remo ku yengnekonde. Meyea yolauboke yo, peleyeare nemmene bang."
11
Neai uw re kelai mere nendere Yesus iteayeuboke, pelene weumi, "Meyea ninea yolou boke mo." Peleyeare nemmene bam.
12
Yesus rake yo neai oro bu kuyeumi kokera beufoke na uw malo heuboke ra beneng nekewoye anuwaunge eungu weu boke, pelera mo a weumi meahea waneng, "Rake me uw waneng manemfa mare mokom bokamale itea yeu boke?
13
Meyea reare guru yea, Tuhan bea kanaukele, mai a na ijene waukele reyea niyea.
14
Reyea mai guru, mai Tuhan, moro bu re kuyenggokamale kiyea, pelene-pelene meyea maite neaite moro bu kuyembe re mo.
15
Reyea rake me uw mare keleamale, meyea pelewaneng bea mokomem be.
16
Nanahele yea rake a mare wamale, ue beai bu beai ro bang nekate neai yun ro yeale, nawaneng ukeunge ende kiyea, na anuwau bumana hele eke eleye kiyea anuwau ana hele.
17
Rake wamale ma iteaite rowembe, nawaneng Waline mokoite mokom bena mai Wali kolo-kolo mea-mea re yaro membe.
18
Yesus beneng weumi, reyea elerekonde a pele neyea nemmene neai a bang reyea mareelengbokamale, mai Wali mekai reatei, peleyeare Allah re homo feana moloukokere na hului yembondere rake hambung bondere rambele nanembainye ehamang de anende kiyea, noro hele keambonde pelera oro yea elendehande.
19
Rake namam bea eyeiboi eyakalaiboi, reyea mare nayobolo yea itea yamale nawaneng enai bende yakalande ne, meyea nahele re elembe, reyea niyea.
20
Rake a mare nahele yea wamale, hinye reyea ukende ende romiyea eianebondena, niyea reari ei haweuke, namekai hinye reare ei hawendele kiyea, neyea ukeuke mekale kiyeare ei haweunge."
Yesus Namoita Ohowate Yore Weumi, Hinye Yae Kelai Nende
21
Yesus rake a feau ke eleukokera, na kena ra himi hele hubawounge pelere weumi, "Rake a feau reyea nahele yea wamale, mai nolora ro mbai reare kelai me nendele."
22
Na Noita ohowate yo ijoko na uw re uw re erewate, faaka yea boibate, onewate hinyere a yea eleye.
23
Ro mbai na moita ohawate eunuweuboke Yesus na nime ko ne euparau boke rake ro niea na moita ohawate Yesus kena buhea re koibounge.
24
Simon petrus reare me yea iteai ikeuke, Yesus a hinenhindere hinye yea neai hele Yesus eleye.
25
Reyea Yesus pukore na keleufi kale mo hinanale, "Tuhan, pele ro miyea neai sele hinye?"
26
Yesus yea weumi, "Reyea feu bu yaukehin de itende ro pele kiyea niyea." Pelera Yesus feu rouke pele bu koleainya ne yaweufike mo rouke yudas iskariot simon de kelu re ikeunge.
27
Yudas feu ke me ikeleu boke ra, walobo yun meke na kena einye eweufike pelene Yesus yea Yudas re weunge, "Weai mokoubonde hambung be ne nekeite kiyea, na wela yea mokoibo!"
28
Pele hemangne nuwaikoke anewate yo ehiyea hayea eiteaiboi hele, makane Yesus rake a waneng bea hareungeboke, Yudas re ukeunge.
29
Yudas pele holona roi kaya hebeye kiyea, "Pele earene ehi yo yea Yesus rake a mekai hareungeboke ukeunge." ehamang bulau neai hamang de roi jea endowendere yea uw benera nekewaimile.
30
Yudas pele feu rouke na hibi aloungekoke eukuke pele hee ya reniai jea yeuboke.
Yesus Naei Herende Maei Weubomile
31
Yudas eukuke eiboye ra, Yesus yea weumi, "Reyea Allah re pukora mekale romiyea uw re meuyeubokale kiyea, hili hebenaitele nawaneng Allah reai walora hili hebenainyele re huba yea raweu boke.
32
Allahre reai eita hili hebenainyele na, pele waneng mbai reare Allah neai eita hili hebenaitele. nahibi re mokom bonde.
33
Meyea reai kelu omi waneng yo reyea mambele hekire enekeikoi hangga meyea reare beandekombe, peleyeare reyea yahudi ro miyea re weumiko kale a mbai jea beneng mare wamale. 'Reyea erele anuwau meyea pelere emei hului.'
34
Reyea rake a eme mare ukembere, maite neaite kena buhea uw buhea eise meise hembe. Reyea mare hei jamale waneng mbai maite neaite hemmiyembe hele. Maite neaite meneai buhea hemembe walora romiyea
35
ehi naitea inyaibonde, meyea reai moita ohowaube yo."
Yesus Ahuwe Petrusre Wenge
36
Simon Petrus yea Yesus re heneunge, "Tuhan, weyea mbelere eyere?" Peleyea Yesus yea weunge, "Reyea erele anuwau, rake hee weyea reai moite ehakoiboi hului, peleyeare bee na ya eke honoyene weyea reimoita eu kehakoubonde."
37
Petrus yea hineunge, "Tuhan, mekane reyea weare ehakoiboi? reyea weai earene honatebondena, reyea be hinale!"
38
Yesus yea weunge, "Nana hesele weyea reai earene hereyere kena koye? Peleyeare reyea rake a nahele yea wawale ojo muku roko name a okoikoimo, weyea reare roko name eleikonde, nare oneanale ya."