¹ Yesus na me kele uw kelene nekate romiyere, ei haweumire kelemmi bondere, obo yoku domba uwne aruneuboke, Yesus rake a waneng mea iteayeumi - reyea na a hele mare wa male, hinye domba nekate honate fale eite na ro mauka eyeisiy, peleyeare nibi ehira enensindena, pele kiyea na hele, yoko ro yoko miyea ² Peleyeare, domba nekate honate fale eite, na ro mauka enensinde ro miyea pele kiyea niyea domba re holeye nareye ro ³ Domba neai romau kayare hebeye ro, pele fale ro mau mei rawei bi ye na domba-domba neai a re borainye, na waneng pele domba-domba na rone-rone kaneumi, yoboumi pele fale moite enai balendere ⁴ Rake domba-domba nemmene moite eibalate, na kaya hole moloumi ro niyea be neibiyoye domba-domba na moita borainye hakainyele alainyele ate ⁵ ro eroiboi romiyeare neyea ei hakoi awaneng ahauke hebealenate na eare pele ro miyea neai a re rake domba-domba yea foi eroboi ⁶ rake a mekai Yesus domba uw ne hareungeboke pele romiyea re iteaye woumi peleyeare neyea foi ei iteaiboi nawaneng onewate handawate ⁷ Pele earene beeneng Yesus weumi, pele domba-domba falene nekate honate fale einye, "reyea na ro mau kayare hebale ro ⁸ reyea na nammam emei hee na romiyeare anggeai ei boroi ⁹ Reyea niyea ro mau. Romiyea hinye reai ro mauka menensinde kiyea, niyea Wali endowende nawaneng reai romau ka niyea ende mende konende pele niyea kee fau foinye Wali inyalere kolorende. ¹⁰ Yoko role imeye, pele niyea yokore peanggonde, mekai hareibiyounge hoisoi jea honggonde; howeijea howembonde peleyeare r'a uw yea mekale, pele einye meyea Wali hubayenggombe na waneng mai Wali kolo-kolo meameare nekemem be. ¹¹ Reyea mai yeng mai angga foi role; domba-domba re hole moloreimbondere, reai uw yea kinyeremibonde. ¹² Roite arilate obulate romiyea, domba-domba kaya ne hebate waneng, yoku isanggele renamo imeye ereungene, niyea na fee re hebealeijeye pele isang mo yoku meye, domba-domba re neumi; hebealete, here ware boumi. ¹³ Niyea roite rowende re mo na uw bene nawaneng rake domba-dombare hole ei moloiboi. ¹⁴ Reyea hirong foi kaya foi role. reyea ra domba-dombare ro rameale na waneng reai domba-domba reare roi raitele ¹⁵ Namekai mbai meako roukeboke waneng, pelemekai reai domba-domba rateboke nawaneng meakore ro rounge bokanale, pelene reyea erele ra domba-domba earene ere herende. ¹⁶ Reai domba-domba ehi holona rake falera bang ahine ekaikate; pelere reyea erele yoboremile, kaneremile; boronatele menate holo mbainye awenaibonde na kayaro holero mbaijea mo hebemmile ¹⁷ Na eare, meako reare buhea kabang hele heuke, na eare iy bauw ererilerbonde ra, nanemene reai mee re benaibonde menate. ¹⁸ Romiyea ehiyea ehayea reai Wali me ra enukeisai hului, reai kena kale hului jea kinyamale meako elea ikeuke. Pele elea yea na hului reai Wali kinyerembombe, pelere beneng roukele, pele neaite meako a ukeuke." ¹⁹ Bele a mekai Yesus hareungeboke, eleukoke Yahudi romiyea holo bee re wahaikoke. ²⁰ Bele romiyea meuhokouboke, ehi yo na a elate, "pele ro aloyea aungoboke nawaneng keubae yeuboke koye?" ²¹ Ehi holo yea elate, "Alo yea aungebouge na "ro miyea rake a waneng de eiyeikoi hului. namekai mbene walobo yea ro miyea kumba ra mokoungeboke ijoko kelenggonde erende?" ²² Pele ya bene nekeisi-nekeisi ya kabang de mokonaibonde hee namekai pelehe alu him, mandiling bea meungeke, ²³ Yesus ewefike Allah nayo ralo yo imea eke, Salomo na anuwaunge ele melere eke koiboye. ²⁴ Belera Yahudi romiyea arilewoye mekate neare einye ainyeboke namekai neare a wainye, "Mbele ya heki re waneng, weyea rokoumikonde meyea ahire wahire komayendere? Weyae na nahele Wali Ondofolo na meare a yakala faeuyakala weimibe." ²⁵ Yesus yea weumi, reyea mare weibamale mo peleyea re meyea hila rabore ehaleja. Reai me uw itea yawamale, yakalawamale re nanemene meakore ro hile einye beaite, pelera reai uw mekai meyea rondebonde. ²⁶ Peleyeare meyea hila rabo bang kaube, na eare meye a reai domba-domba re eyeiboi. ²⁷ Reai domba-domba, reai a re aleatele boraitele, reyea ro reameale, neyea reai moita alainyele. ²⁸ Wali hena bona erele neare itemile nawaneng niyea himine einundeiboi nawanen ro hi miyea hi yea reai mee ra enukesei huwi. ²⁹ Meako reare kinyeukebokere, pele kabang hele, ehiyea emeaheikoi nawaneng ro hi miyea hi yea meako neai me ra einukeisai hulu. ³⁰ rambele, meakore, Na mbai Ja." ³¹ Pele a elewoyene, yahudi romiyea ruka yaraikoke Yesus oronainyele re. ³² Peleyeare Yesus yea weumi, meako ukeuke hambung eme emere heleng mokoukokale, "Omiyea re yakalawa meale, rake mokowalere, mbele kaye ro earene rare rukare hayendele re?" ³³ Yahudi romiyea yea, "Weyea hambung eme emere mokowoyea earene weyea ruka yea hayemayetere bam ma, neai nahesele weyea Allah re a ukea kea kaneane, weyea mea nekande waneng, peleyeare wa uw ra mokanea Allah na hului mbai eleyea earene." ³⁴ Yesus yea weumi, "Mai Wali hee re foloukoke molaikoke, 'Allah yea wembe, meyea neai mekai Allah' ³⁵ Eyea eateai Allah re homona molaikoke nanemene enaibende enai yakalanate, pelene Allah ako feakore boroijate nahelere eleijate yore Allah yea ro roijeumi, ³⁶ Makane meyea Allah re kelu yea reai uw re elale earene, 'Allah re a uw kea kanale yea elaube peleyeare meako yea ukeuke rake kani kelare mekale'? ³⁷ Allah re na hambung eme emere emokoinya, reyea a elerelena meyea nahele re eiyelei jea, na waneng rabo re ei haleijea. ³⁸ Peleyeare reyea hambung eme emere mokalena pele mokale yea nahele re eleng. Pele mekai jea maiteai nekembe aneng iteayembombe meako rambele mbai, nawaneng reyea meakore mbainye nekayende meahea waneng horo yea meyea reai elalere hila rabo ei hale." ³⁹ Yahudi romiyea beneng relewainye Yesus re ikilenaibondere peleyeare, Yesus rake yo meai me ikilenaibokera eufeauboke eiboye. ⁴⁰ Pelera Yesus bukeu fike eke, bere Yahanes bure koiboumi yordan wiy reufine Yesus eke nekewoye. ⁴¹ Romiyea heleng hokou meke napukore meibate nawaneng a wainye, "Yohanes bu re koiboumi kiyea hambung eme emere eimokoikoi mo peleyeare rake ro neai a ewewo yea nanemene nahele mo ya." ⁴² Nawaneng romiyea heleng Yesus re are nahele yea elewatehila rabo helewainyele.