¹ Imam Kabang yoni yoni romiyea neai are Allahre elete neaite romiyea uw nolo uw ikaita yaraikoke Allahre inyainyele hambung, nawaneng romiyea neai uw mekai nebang fanyeibote obo yoku yeale pele Imam hili eha akau ehare Allahre onggou bea ifeleibiyainye. ² Pele Imam Kabang romiyeane nawaneng uw mekai mekai nebang yealene, pelene romiyea kobu yeale Allah mokoungehake wali nibira wekate yo belere kena nime habayea ei hawammile. ³ Pele earene romiyea ehi neai nebang mokowatene mo bang peleyeare neai uw neai nebang mokowoye yeale obo yoku yea onggou feleiboyoye. ⁴ Romiyea ehi neai Imam Kabande yembondere. Neneaijea neai uwre ekeaiboi hului, nehahina Allah yea harunde kaneungekoke waneng Imam Kabang yembonde romiyeare Allah yea keanengekoke. ⁵ Pele mekai mbai Imam Kabangde yembondere.Yesus wali Ondofolo neai uwre neneai ekeaiboi, Allah neneaijea keauboke neaite rake a yea weunge-weyea reai kelufa, manaya reyea weai ako re yeubokale. ⁶ Allahre homofea reubihi ehine Allah rake waneng eleukoke Imam Melkisedek waneng weyea Imamde yeubonde rimolo yangkone nekewende. ⁷ Romiyea uw waneng bea Yesus rake kani kelane nekewoye hee here me eita nahului hole molonembondere, Allah ebeli kali,rime yea a yea boibounge. Allah weibounge huluinye uw haraungeboke nekewoye Yesus neai ebeli boibounge Allah boroungeboke. ⁸ Yesus Alah neai kelu hele, yeare, nebang hubawounge walora Allah weunge a huluinye nekendere Yesus iteayeungekoke. ⁹ Yesus nawali hiyei reneungebokera romiyea neyea weumi a huluinye nekate yo nanemene neai wali hena bona no kiyea, Yesus niyea. ¹⁰ Namekai Allah yea Yesusre, Imam Kabangde raneungeboke Imam Melkisedekre waneng. ¹¹ Yesus Imam Kabande yeubokere mekaite,a heleng mare iteai mayembere peleyeare meyea hasalere iteayeiboinye,yabi yabi hele yakala mayenggombere. ¹² Na hele ehi yore kelemmile neai hee yeubokeyea re, peleyeare meyea nammang hele ehi yo neaita na bemena kelewayembe a mbai bambea iteayembere kena kaube-meyea wayeu fa waneng nemene nammang anaube, hamang eleare nahinggibang hubaunge. ¹³ Hinye nammang nimene aneye kiyea fa wayeu waneng uw bene nekaimi wali himalainyeboke yo yea me beaimile nibi are nafoijea iteaiboi. ¹⁴ Hamang elea romiyea uw henaboyate yo neai-pele romiyea na waline foi neai nebang neai hului haisite neneai iteayeuboke.