(Paulus Malta Yokonane) ¹ Yabane mekande nabefoi yoifoi yabane hebandeboke yauke ketekande, romiye bele yona mekate iteyeimeboke bele yokoba naro Malta. ² Maere foisele moko waimele. Italo kabamba hayeiboke, bele he aluya meungekene him mandilim meye huba wannele. ³ Paulus ye kelankelan arileukoke irannehaiwoi yaele rami mbai name hubangehikene meukuke Paulus name yae rami akeuboke hilowoye. ⁴ Malta ro miyae belene nekate yo, Paulus name rami akeuboke hilowoyene ninaeijaemo elate, "Baeke ro romiyae yae hoiwoyene alu yoyo buwei nolone alura mekate, beleyaere rake kanina a hele no yae walire wenainyehinde endere nibibam." ⁵ Paulus namere akeuboke rami i ranne oukuke, buhae ehubaisi. ⁶ Belena yo nabehera mekeumi ninaeijae elate hekibammo Paulus name ohulembonde, nahekibam mo baeke ro hokonenggonde herende. Beyaere rakekate am, u mekai ehi wanem Paulus naune yembonde eyeiboi mo na ubene emehahele hubawainyele elaete, bake ro walobo ya. ⁷ Yabane monye mendehebeuboke kelaunge kani mbai bele yo maei ondofolore nekewoye Publiusre kani na kena foije yaweumeboke naei koloyo wanembe ya name naei imaene ekannekewande. ⁸ Bele hee Publius naeko ehane koiwoye u naume ye, yahele yahele yae rilewoye. Paulus meke ereungeboke, Allahre ebeli boungehike, nameremo raungehike nahibi naei eha koiwoye hireungeboke u yeuboke. ⁹ Bake mekai yeuboke borowatene, bele yokoba nekewate Paulusre bokore hokoumeke, ehana bulona kayeke onomi yarowate. ¹⁰ Maere ei sele molowaimele, hambun helensele yeubaimele, hanyala buwei nolo emale maei nahinggi-hinggi haiwaimele. (Paulus Malta Yokobara Roma Yore Euboye) ¹¹ Meyae Malta yokobane oko name nekandekoke kayi mbai Alexandria yora meke, bele yokobane alu kabam rauboye heene meke yaiwoye. Bake kayi Kastorre Poluksre bele kayine honaikoke walobo bee maei robuyae molaikoke. ¹² Ya name Sirakusane nekandekoke. ¹³ Surakusara habala barandeboke ekande Regium ne andenoke ebun reufira alu raweuboke maeye Putioline nokande. ¹⁴ Bele yone Yesusre hakainyekoke yo hubayendekoke maere yawaimeboke ekande ya mehine bee nekandekoke. Benen kulum ukande Roma yore a ra alannekoke eiwande. ¹⁵ Roma yona Yesusre hakainyekoke aka baeke borowatene ara alainyekoke meiwate. Naite haete anuwau mbai naro anuwau Apiusre, Tres, Taberne ne maembele hubaimakonde Paulus erekeumi meiwatene, Allahre buma me kolowounge nakena elae rouke. (Paulus Roma Yone) ¹⁶ Ekate Roma yonemo, Paulusre weinyehike nembai nekewoye felayona ro mbaijae kayaa hebewounge. ¹⁷ Ya name nekandekoke mo, Paulus Yahudi beyu-beye baere nekate bele yona kaeneumikoke mekate. Mekate arileufikemo Paulus yae weumi, "Aka naei baeke naei, reyae aei yore himi emokoiboi na wanem yobe naei kamahe naete mam hena mokoimeyate reyae asasi ekoikoi. Belene rare Yerusalemne kelukatele Roma maei me einye kinyateboke. ¹⁸ Neyae raei me u mokowalera erainyekoke hoibote honatebonde merau kolowainyele aere banne hainyaitekonde a elewate. ¹⁹ Beleyaere aei Yahudi yoni yoni ye ahi elewatene, reyea kena elae moloubokale Kaisar bene elemakonde. Reyea bele mekai mokoubokale aei Yahudi romiyere himi mokoremibondere me nekale kelai nibi yae mokoubokale bam. ²⁰ Bele aerene, reyae riyengsikamale mare ererembonde ererembombe nembainye a mbai elemakonde aere Israel maei rabohaleinye rantaije ikilatekoke." ²¹ Bele yo yae Paulusre wainyele, "Meyae homo mbai Yudea kanira roumale wanem ehubaikoi nekande. Aei nekandena ro mbaijae mende waei are elenggondere meyae eboroiboi. Na wanem waeinya a faeu nebam are emoloikoi. ²² Beleyaere meyae kena kande waei ubene mehae mekai rake sektere ahi yae waimile, namekai isam felayae kaimile." ²³ Paulus naei bele yo yaele benem riyare arilensinde ya rainyehike. Paulus naei nekewoye anuwauke ro miyae helem sele hokoumeke. Enera meyae be baheibeko, Paulus Allah namekai hareungeboke Yesus are homo Tauratna molaikoke, Allah na yenjo kayalo na molowate nemene yakalawoumile. ²⁴ Paulus elewoye are ehiyo nehale yae elewate, ehiyoyae karebaijae elayeke. ²⁵ Kena mbai bam nekewate erewoumilene Paulus na a mbaiken herauwounge. Nehale ya Allah maei Roh yae yenjo Yesaya re eugara eleukoke. ²⁶ Eyae bake yoho eumiwende. Anggaei borombe horo meyae eitaeiboi nekembe, mai ijokoyae erembe horo onembe handambe. ²⁷ Baeke yo nakena ruka ruka yaeiboke, na anggaei kokum yaiboke. Naijoko kunaikoke erenate yaele anggaei bo fe yee hilaikoke. Bele mekaijaebam na ijiko erenate, anggaei anggaei boronate nakena itaeinyaibonde nakenara itaeinyeibonde menai bembonde. Reyae onomi honomi itemile.' ²⁸ Namoi sunde, meyae itaeiyembombe, Allahrena wali a hena a rali wai yoni yonire huwaimi neyae boronate. ²⁹ [Paulus baeke eleukoke baeufokemo Yahudi romiyae here uke na aku yaele balayeke.] ³⁰ Ralo yakama bee Paulus imae mbai roijae mokowoye imaene nekeukoke. Felayoyae kayaa hebewate horo ro miyae helem nabokore ohowate. ³¹ Allahre akoo faeuko nahibi-hibimo yakalaboumi Yesus Walilo henalo nembai sele naei u eita walihena emayaronde.