¹ Yesusbenem rake kani kelare bensonde mende, mende aei wali Ondofolore yembonde mende aei foi nebam mokowonde beleya. ² Ro miyae wali nekande yo, here wate yo nemene arilemmile, u mali hubammile, wali henare emayorende na mekai here kakare emayarondere yo. Allahre ako faeuko ro miyae ehire huweimiyende anggaei boronate maei, oboroi maei, kena herawembonde keleimile, ako faeuko eita kelemile, nebam na foi mokoijate keleumile, namekai a ela nasom weimile. ³ Ya mbai men sembonde, ro miyae ako faeuko nehalere rike re rakere baenate beleyaere ehubayeikoi naei kenare kate mekai beleyaere ehubayeikoi, ahuba hena wanem beleyaere nanemene ame karebai mo. ⁴ Ro miyae a nehalere kena bam nekenate, naei ahuba hera, rilimeremo kena kabam hele herate boronate. ⁵ Beleneyae, wa kena heraweibonde omi reba mende maei fe efaeija nekeye, waei kaliyo mo be buleubonde mokoye, wa u ninae keleneubonde. ⁶ Na hiki bam mo reyae hererelere, rake kani kela nukerebonde. ⁷ Reyae wali he mekale Tuhanre einye rorannale. Reyae mekale ro mbai wanggo einye ani hokoibokole mekai hubanale. Mekale raei hila rabo elae randa mana mekale arunnale. ⁸ Mekale Tuhan naei mokoungehake haa rare yendele, mekanebam, Yesus rare me baeukoboke, naei kaliye ne moko wekale, wali maei einye mo nekewekale, bele mekai jae nambele emahubayende. Allah naei mokoungehake rare yendelere, rembaimo bam, bele yaere ro miyae nanemene Naere hila rabo haleita yo yaele emayaronde. (Paulusrena umbaimaei a Timotiusre) ⁹ Timotius, hasalaeyae nibi baeukonde rabokore meye. ¹⁰ Mekanebam, Demas ro mbai rake kani kela maei umfo wamfo mo relejeunge, rare nukeukeboke nekale, neyae Tesalonika na eye, beleyaere reyae, Paulus Kreskes ukanale eye, namekai Titusre ukanale. ¹¹ Dalmafiana eye. Lukas rambele nembainye namam nekende Timotius, weyae meyae ya, Markus wenyele nembainye mebe. Markus rare rikewouke ro ya. ¹² Namekai, Tikhikus reyae ukanale Efesus yona eke. ¹³ Troas yare mebe, raei ram mako rika-rika Karpusre ikanale re webe, namekai raei homo nanemene, ebo yoku maei u ra ra mokaiketae kaye yaele yarokobe. ¹⁴ Alexander, tembaga re, besi re mokoye ro, rare u mekai nebam hele mokowauke Tuhan yae ehe bukulu enanyehayende. ¹⁵ Weyae, wa u kayaa yaele hebeye, mekanebam, aeinya afoi faeu foi kelammilere neyae horombondere relejeunge. ¹⁶ Ya mbai, rare kaeneikekoke yo riyae bere ekale, a foi faeu foi aerene, mekale raei hokolo uyau nemene nukateboke, ehiyae haeyae raei aerene ehe ekokoisele Tuhan yae bele yore onomi yemmile. ¹⁷ Bele yaere, rake hee Tuhan Yesus rare ri kendebonde ela wake yendele, rake ro miyae arilewoye yore a nele faeu nehale ukemile Yahudi ro miyae bam na hinggi kelewamaele. ¹⁸ Tuhan rare onomi yendele, rake ro miyae yo riya rainyehike honatebondere, Tuhan yawendehonde, na rei mai jae naei yo yamne handebonde. Tuhan re mo buma kabam kolomande, Amin. ¹⁹ Raeinya onomi Priskila re, Akwila re namekai Onesiforus na miyae fare. ²⁰ Rakere merelere, Erastus nukeungebokale Korintus yone nekendere. Trofimus ehane kouboye ne, reyae nukeungebokale nekewoye. ²¹ Him mandilim hee emeijae, hasale yae nibi baeikonde meye Ebulus, Pudes, Linus, Klaudia, namekai rakena nekate aka baeke nemene mare onomi yae wayembe. ²² Timotius, raei ebeli Tuhanre bannale, ware rikeneite, halenate, namekai miyae rake homo re ronde kaye. Allah Rena foi moi mae-mae hele aei wali einye nekemayende. Amin