¹ Wayae Timotius raei kelu wanembe yeubokae, Kristus kena buhae kabam hete aere heimeyeumene elae ikeume. Bele elae yae mokoimiyande. ² Bena Yesusre ako faeuko ro miyae helem bene elewale berowate, bele ako faeuko mbai jae ro miyae ehire keleumiyende nabeme hele ro miyae itaei saba yaele, ro miyae ehire kelenaimile itaeinate. ³ Raeinya wali mekai jae wa u einye, mehae mekai horo a nebam u nebam bae ungayewende. ⁴ Fela yo mbai naei u foi te hambum mbai emokoyei, mekanebam, na fela falem bumana kayee ijoko erennele kena foi nekende, ehi rake neyae, wanggo mbai honoye, ro mbai oro elae hebaleye. ⁵ Bele mekai mbai, wanggo na koijate yo, anni hokoiboite kena kondena, u mekai jae herennele hele ani hokomboude. ⁶ Ehi rake niyae hekere mokojeye ro, na ani foi hubayenggondere kena konde na, heke kaliyae elaeyae mokonde, ani eha molonde namekai kani foi jae awemmile. Bele mekai jae mokombondena ani foi hubayende. ⁷ Rake a habeubokale u bene foi nekenayembe, Tuhan mare u bene wabene hayennembe, bele mekai jae itayembombe mokombe. ⁸ Yesus Kristus re u bene mo nekenayemembe, neyae Daudre orona mena kaye, herekera meke Allah waleungeboke. Bele a hele faeu hele yae reyae kelaemale. ⁹ Bele a faeu kelamele aerene rare nebam mokojatele, mana mekate kawa einye raei oro me nemene rantai haa ya kilatekoke nebam mokojaitele ro mekai jae rare baeiteboke. ¹⁰ Bele yaere Allahre ako faeuko kawane ehileikoi, aei aka baeke rorele kabam re a faeu namam huweijate. ¹¹ Rake a wamale nehale, hakombombe, aei wali naei aerene heraubonde na, eyae nambele walihena ema yaronde. ¹² Hila rabo naere mo halemande na, eyae nambele nembanye annekende. Eyae Kristus re onannele emalenggondena, Naei aere onemmeleyae wemmele. ¹³ Eyae Nare ehakoiboina, Neyae aere kena buhae kabam hele heijeume, aere ewoyoi hangga, asasi ekoikoi hangga." (Allah Kena Kommele Wali Yaemo Ekemale) ¹⁴ Yesusre ako faeuko, aei aka baeke nahibi mo kelemmamile, u taei umamiyende a foi faeu foi aerene ehire-ehire a kilenate yaelene. Bele wali wanem Allah Neyae kena okoi wali ya. ¹⁵ Weyae kaliya foi jae mokoye, Allah yae be insinembolene, Naei ako faeu kore, naei yebaei bubaeite yeibonde. Fe efaei jae/ ehubai jae wa kaliya mokoyenne, mekanebam, Allah rena a faeu bae weyae huwamae. ¹⁶ Ro miyae a bangga-bangga, a moi-moi ennai elende anuwau nge weyae ehakoyei jae, mekanebam, bele are huweijate ro miyae, Allah bele yore kena okoiyei nekejeye. Bele ro miyae Allah ro miyae kobouka weyeye eye. ¹⁷ Bele a bangga-bangga elejaete ro miyae, aei u nulu ne buloo fela mekai yembonde, Himeneus re Filetus re na falem-falem niyae, a bangga-bangga huweyaimile ra bee reyae. ¹⁸ Bele ro bee ro miyaere kelaimile, "Eyae heremabonde hee, ewaleiboi hangga!'' Waleiboi maei kaye, nenae yeuboke ya, benem e waleiboi hangga, bele ubene ro miyae ehire nebam bae waimile. ¹⁹ Bele yaere Allah rena ako faeuko nehale, aeru raufike ruka mekai honojeye, ''Tuhan nataei nekejeye, hinye naei Allah re hakainyele, hinye naei namamam Tuhan re ehakoiboi!'' Ro miyae hinya yae elende, "Reyae Tuhan Yesus hakongobokale mende, bele ro miyae a nebam fau nebam, me nebam u nebam na walira wonnonde!'' ²⁰ Rake ahuba u benere nekenayembe, Imae kabam mbai na hambung-hambung, kere nale mehi-mehi, ehi emasra moko wate, ehi perakra moko wate, ehi bae o hara mokowate, ehi kani kendara moko wate. Emasra, Perakra mokowate hambum-hambaum, hamam bulau kabam hele mokate mo, bele hambum-hambum yarate mokate. ²¹ Bele yaere hambum-hambum o hara, kani kendara mokowate kaye, na yane baei bele hambum-hambum ya, yarate mokate. ²² U nebam mokojate re nokolo fafa mokoijate wali mekai moi wommombe, moi bulem bombe, Allah naei eleukoke mekai jae ma wali aloungele, Yesusre hila rabo heleye, ro miyae re kena buhae heumile. ²³ A koi-koi maei ekileyei jae, mekanebam, bele a kobu-kobu yae mokonembe isam felare hombe yaelene. ²⁴ Yesusre yebaei bubaei na mekai bam isam fela korebe, relennele, Yesus re yebaei bubaei mekai jae wali nekembe, rei jae- mai jae, nime haba yae, ro miyae re kelemmile a foi faeu foi jae mo elenate, rilibo ehayei jae ma wali nekembe. ²⁵ Rake wali mekaita wennende kaye, a elau yae nasom wennele, itaeyembonde a foi faeu foi na wali ne annebonde. ²⁶ Rabo halemale, Allah rikennebonde bulo walobo re nibira bensode.