(At Nehimia nen wene huli warogo wogeinapike agonoba higit hogo hagatelaike wene) ¹ Ineki ake atiba re, it en apuni inebe apigat ineilanem en etage salukwa. Suesika atiba a'la holal palek he apuni Amon mene nen apuni Moab mene inom en Ninopase Walowak ageinapuri inom omakima logousak motok lek. ² Apuni it ati mene nen supuruk i apuni Israel mene wogosasak motok lek 'iluk wene ati holak palek welaike, mene at he' it en apuni Israel mene homan hisoagaluk Bileam oba eki oko wogotukwa. Atinogo mene at he, Ninopase Walowak nit mene nen homan hinoagaluk halukwa mene lek halogo hono hanoninapike. ³ Atiba nen he, apuni Israel mene nen wene inasuk watike mene ati inasuk holukwa, it en apuni Israel mene inom apuni it ake welakma mene inom ipike apike logolik tageinabit waukwa mene tetelogo inalikmo hisaukwa. ⁴ Ati nen, wene ati ebe oban hagalagik'lek werokolek he, Walowak Esewerek Elyasib, nit Ninopase Walowak awi wurikmo yimene timen hegarek oba yage logouagaluk arat wetewerogo menhisukwa, Tobia eperak horogat welaukwa. ⁵ At Elyasib en o ake a'la sekelek uguluk huko hilangsekma Tobia ebe ati logouagaluk arat halogo hisike. oban werekolek he o a'la sekelek ati re' okawerek hesik higilaukwa mene e ekn palek, kemenyan, yabu halarek mene, ake yimene timene Ninopase awi wurikmo welagarek mene, eken abi yago alep agik mene hesik hugun mene, Anggur eken ket palek mene, nen amusu mene apuni Lewi mene wogosasak mene, it ap ato etai watarek mene, nen kwe ape palek oba yage welaikarek mene, ake wene huli palek Musa nene palike mene higit hogo ap Walowak esewerek mene nen natogotukwa. ⁶ Atiba, o Yerusalem an nebe lek'ma wene obogat ati hagalaike re wam mauge 32 huli wagoro nen inoe kain etage werek Artahsasta o Babel atoma hagasek werek'ma, an nen inoe kain etage werek oba kisigi. Atiba nen, ineki ake welaugusik en ake oba an o Yerusalem legen iluk inoe kain etage werek kono yogotigi. ⁷ Atiba, an nebe o Yerusalem laigi nen Elyasib en Tobia hesik weak halike mene nelu aike, ati re Walowak awi wurim mene o omaket ake sekelek Tobia hesik halogo hisike. ⁸ Elyasib halike atiba an namage lagesikomo wene hukoat paligi ati, an nen Tobia mene alawi o a'la sekelek ma welaike mene wulaksasigi ati. ⁹ An nen apuni ake o a'lake sekelekma welaike mene wulaksoagaluk yogosasigi ati. Anogoba nen hobuk Ninopase Walowak awi wurikmo yimene timene welaike mene, e eken palek, nen kemenyan waganogo a'la sekelek'ma kelakesukwa ati. ¹⁰ An hogo neluat atiba it apuni Lewi mene asusak oba re wogosigilek, ati nen apuni lewi mene nen ap etai watarek mene re inayabu wogosasukwa mene ati yabu halusak, it yabu halareke lopok ianpotke halukwa. ¹¹ Atiba nen he, an nen it ap kain tek Ninopase Walowak awi wurik'mo welaikarek mene wenagasigi, an nen igilogolik'' Ninopase Walowak awi wurik'mo yoma nahalok en haraksaluk wulipa?'' anogoba an nen it hobok inapoke waugasik it inoguluk welaikarek higit hogo welaukwa. ¹² Anogoba nen apuni Yehuda mene inebe obogat lapukogo e eken palek, anggur ekan ket mene palek,nen amusi mene okawerek hesik wolok waukwasik o a'la sekelek'ma hegarek oba wolok waukwasik hisukwa. ¹³ An nen Walowak esewerek Selemya, suesika Zadok palike mene awirugi elu werekma wenyematisike, nen ap ake Lewi mene etage Pedaya eka hago logousak oba o a'la sekelek yimene -timene hegarek oba ati hesik hagalaike. It ineralu re Hanan Zakur aput welaike,Zakur aput Matanya. It apuni ati inebe re yabu halusak elok en halogo hisasukwa, nen it yabu halusak oba re inayalak ake supurogo wogosuguke hesik welaukwa. ¹⁴ Ai Nopase Walowak an mene, an hesik wene yi hali mene torogo lakugun noba ebeno an nen ninopase walowak awi wurikmo hano hagati mene hesik nen yabu halelogousak mene yi. ¹⁵ Ineki ake ati bare, o Yehuda, ineki paigoak oba apuni ake anggur eken amusu herelenem neileken hisigi. It en hogo re e eken oak iselek maselek ugu mene hele hemago mene nen a'la kalogo wolok lasak oba liakaga i anggur amusu hinago,e ara eken nen yimene timene obogat waganogo wam Keledai apoloa liakelik it en ineki paigoak wolok o Yerusalem laukwa. Ati nen he, an ne it inelurogo it mene yimene -timene ineki ake atiba oko wanusak, 'iluk inelurogo yogosigi ati. ¹⁶ Apuni Tirus mene o Yehuda welaikarek mene nen ikan warek nen yimene -timene obogat ake wolok ineki paigoak oba, apuni Yehuda mene nen tanomake mene inoba oko wanuagaluk wolok o Yerusalem waukwa. ¹⁷ Arat ati nen, an nen Yehuda mene inetage werek it yogosigilogolik,'' Wene weak mene hit en halep yi? hit en ineki paigoak oba arat weak halogo hegep. ¹⁸ Hit hinopalak en wene eperak hit hogo halelaukwa hake at nen Ninopase Walowak en weak mene ake obogat ninoba higik nen ake o sili inoman higik igin yi? atinogo at hit en ineki paigoak oba halelagep atiba apuni Israel mene inoba wene huko mene amage liagasogo higilagep.'' ¹⁹ O Yerusalem kwe ape palek oba, ineki paigoak oba hagalagilek werekolek o arat mum aike, an nen kwe ati ineki paigoak oba hagalaganem en kwe hususak iluk isigimo kwe hutilek welaike.An nen apuni an nayabu halarek mene ineki paigoak atiba ake kalogo liakelik wolok kiwesusak lek 'iluk jage kwe oba kagalek welaukwa. ²⁰ Ineki pire omaket oba ap oko wolok abarik negarek mene yimene timene miren hake mene o Yerusalem etage atoma nogo isukwa. ²¹ An nen it inelutigik nen it yogosigi,''Nenahalok en hit huako legeralu ya nogo egep? hit en hobuk atihake at halep halok, an nen hobuk hinebe hagikegen!'' ineki ake ati, it ineki paigoak oba ake wagilek kamoisukwa. ²² Atiba lagakogo an nen apuni Lewi mene inebe inokowerek en tegelogo hilik nen ineki paigoak oba it inebe kwe ape oba yage welaukwa. Ai Nopase Walowak, hala eberek logoino wene hali yi, nen Hat en huko mene hetawirinapetek hak etabi neano. ²³ Ineki ake ati, hemi Asdod, Amon, nen Moab mene inalogomi apuni yahudi mene igisikenem an nen neileken hisigi. ²⁴ It inageinapuri hamulugat hake Asdod inane oba ikenem it en yahudi mene inane oba usak mea, ati nen he it inokawerek lopok inane oba igilaukwa. ²⁵ Ati nen he, an nen it hesik wenagasik nen homan hisigik, it tugi inoatik nen it inesi lirisigik, ake it en Ninopase Walowak etage palog hinane huli hini 'iluk yosasukwa, an nen igilogolik, ''hit en hinalogomi it inageinapuri inaugi ake wogosasak motok lek, nen it inalogomi ake nit ninageinapuri hesik mel ake hekewerek hesik it inalogomi wogoinabusak motok lek. ²⁶ At Salomo ebe, Inoe kain etage werek lek nogo, inoe kain etage werek Israel mene weak halike ati wene ebe re yi? Anogo mene at he, it apuni inukul etage lopok inoe kain etage werek at eperak higit he ebe motok lek, Walowak en etabi welaike. Ninopase Walowak en Salomo ebe hetagatisikesik inoe kain etage werek Israel mene obogat hesik welaike. Atinogo mene at he, hemi etake mene inoba nen weak halike. ²⁷ Nen, hit weak huko halep mene nit en ninasuk holugun yi, hemi etake mene wogoinapep oba Ninopase Walowak eilanem hit weak hagatep?'' ²⁸ Ap ake Yoyada aput, Walowak esewerek ebe etage werek Elyasib, ati re alogo agun sanbalat o Horoni mene. Ati nen he, an nen mukogo wulabi. ²⁹ Ai Nopase Walowak an neme, it inoba ebeno it en yabu Walowak esewerek halelogousak oba mene eloken weagarogo hega, Walowak esewerek inane huli hega, nen apuni lewi mene ho. ³⁰ Anogoba an nen it apuni welekma mene inebe obogat lapukogo tegelogo hisigi. An nen ap Walowak esewerek mene nen apuni Lewi mene hesik yabu halelogoagen' iluk, apuni inebe lopok yabu halusak higit hogo supurogo wogosiki. ³¹ An nen hogo re okawerek hesik e kagalek nen e eken alep agik isigin mene ineki ake oba hagalaganem okawerek hesik higilogousak. Ai Nopase Walowak an mene hat hesik hano hali mene noba eberek logoino.''iluk isike.