² Yakup Esau Eperak Api Asuogeluk tigik tegek hogo Hagasike Wene ¹ At Yakub o atoma nen herakhuluk wulipike. Kwe pikit wesigeluk waganem, malaekat aike oba lagaukwa. Lagaukwama, at eileken isasikesik he, mel isike, "Yi walowak agaromi o su mene wutilik welagaikarek oba higi, "iluk isikesik o atoma etage Mahanaim salhike. ³ Etage arat salikesik, agoromi Yakub agayak Esau oba o Etom tom aike etage Seit a'loma welagaike. A'loma werekma Yakub en ap inebe miren hake yoko Esau apit laksasike. ⁴ At en it yogosikelogolik an noe Esau mel yogo'no: "An hagot hatitigeke Yakub Laban neperak yi tahun ti tahun yoma welago. ⁵ An Yoma werekma, an mene lempu mel, keledai mel, tompa, kamping mel natitigeke mene mel apik werek o. Noe hat en nit wo'ninabinok en iluk kino yogohetima, wene wolok hoba wagaike ati o. ⁶ Ap yoko laksawagaike mene amanogo wagaukwasik he inapotkwe lagaukwasik Yakub mel yogosukwa, "Nit hat hagayak Esau apit arat lago. Hat eperak apiasuogeluk hobuk wesigin. Ap hugi inebe empat ratus en inom wesugun." ⁷ Ati'nogo yogosukwama Yakub ayuk agaikesik, aleik apik wasike. Aleik wasikesik, apuni inom wagaukwa mene esa pire logologo hisasikesik ako tompa wam mel, unta amanogo mel, esa pire logologo hisasike. ⁸ Ati'nogo hisasike ati, a'la mel, akasike, "At Esau wagalogolik, esa logolek aike inoate halok aike logolek hese eneluk wulubugun," Iluk akasikesik at'inogo hagasike. ⁹ At'inogo hagasikesik, sapan mel isike, "Nopa Aberaham en Walowak hogothapi lagaikeat! nopase Isak en hogothaperek! nopase. An nerugi nageikugi inapit hobuk naua lagen he, Nopase Hetagepogot Hat en wene aike an yogonesin o, Hat enat yi hake ti hake hano mene haga'nesigeluk wene wa'nesigin ati Nopase. ¹⁰ Hat en hano mene hatitigeke yi, yi'nogo haga'nabusak iluk yogohesusak motok mea o. Alep i Yordan aik iliba nen tegek wilibi wagalogolik sigelouk enek nekimo wolok wagagi meneat he, yogotak napotkwe lagaluk, esa pire logologo wogisek laga-lagi yi, Nopase. ¹¹ An nagayak Esau wagalogolik an tenabuagen iluk hayoko higi Nopase. At wagalogolik nit heleleng hogo ninoatik, hemi yekerugi inom inoatik usak ati nayuk en kino yogoheti o, Nopase. ¹² Nopase Hetagepogot Hat en yogoneti logolik an nen yi hake ti hake hano motok hagatapi logogin isigin. Hat en tagomakwe re, nebe motok apik, apuni ineki motok wenasusak mea, ial laut yekelek esakokwe welagarek ati hak wokhesigin iluk wene wa'nesigin a'nogo ha'la ebesin o, Nopase iluk sapan isike. ¹³ Atinogo isikesik nogo arat isukwa, nogo isukwasik he, Yakub ako Esau wogosigin mene wetewerogo hesike ati re, etawi nen okolek wogosigeluk tegelogo hesike. ¹⁴ At en kamping helou mene 200 kulok mene re, 20 nen, topa helou mene re 200 nen kulok mene re, 20 nen. ¹⁵ Unta eagwi eilak nikenem 30 nen, lembu 40 nen, sapi kulok mene 10 nen, keledai helou mene 20 nen, kulok mene 10 nen. ¹⁶ Ati'nogo hesikesik, aleketek ale'ma tegelhigik hesikesik atitigeke inebe lopok ineil oba wolok loagaluk wogisasike, "Yogo lano, hit etak laga logolik, hinebe hulitigik hek hek wolok lano o," iluk yogosike. ¹⁷ Ati'nogo yogosasikesik, inebe loputik higit hogo loagaluk wetewerogo hisasike. Atitigeke mene inebe logolek aike alep wogisek legen mene ati, at en yogoti logolik, wam tago yoma sa mene? o koma luogeluk? hit hinebe sa mene atitigeke?' ¹⁸ Ati'nogo hinok wokhinape halok, hit en oko re, wam tago yomare, hat hatitigeke Yakub mene.Nen yoma re, hat etawi nen welagat noe Esau wogo'no ikomo wolok wago. Nen at ebe hobuk ninopolik wiri'logo,''' iluk yogosukwa. ¹⁹ Nen at Yakub hobuk atitigeke mene inebe pire arem nogo ati'nogoat yogosasike, at en iki logolik, "Hit at inom apiagep halok he, it alep yogosigi hak at Esau yogo'no, yluk yogosasike. ²⁰ Hit hogo yogoti logolik he, yoma re hat hatitigeke Yakub en hebe etawi nen welegat hagaike mene o, nen at ebe nit ninopolik wiri'logo ino isikomo lagaukwa. Yakub a'la nen he, ebe netawi nen yi mene ti mene higit yiba, an nebe Esau nen wonapik, naweak heraksigik igin iluk, atitigeke mene amanogo alep agik laksasike." ²¹ Nen Yakub en he, yi mene ti mene welegat Esau wogosilano isikesik meneat he, at ebe o poksuba wusikeba nogo isike. ²² Huako ati sapul artak eluk agaikesik, agagwi inebe pire inom, agagwi lewerisugukwe mene inebe pire inom, againapuri inebe ap sebelas en inon i yabok tegek palogo wuluparek kwe wulupukwa ²³ At agagwi aginapuri tegelogo i aik ilibakwe wulaginapikesik he, hobuk Yakub mene yimene timene aik ilitakwe tegelogo wulapikeat. Yakub en Walowak eperak inoake huluk eki petekhogo hakasike wene ²⁴ Arat tegelogo wulaginapikesik he, Yakub aligat haga'lagaikomo werekma nen, ap omakearagun mene oba wagaikesik at Yakub eperak oake huluk eki petekhogo omamerogoat hakhasike. Ap ati Yakub eperak obake huluk eki petekhogo hakilik were'ma re o mo eil yegelogo lageiwagaike. ²⁵ Ap ati a'la nen he, at Yakub mawenethousak mea haga'lagolikomo re, apilok eki tugi hotikenem, eki kopok hogo eloko sogom lagaike. ²⁶ Eki kopok hogo wara'lagaikomore, ap ati nen he, Yakub mel yogosike, "Mo aik arat yegelogo lagei wagasimore, an legen at o," iluk isike. Ati'nogo isike meneat he, at Yakub en he mel yogosike, "Hat ha'la hano wene noba higi lek ma hat lasak iluk yogohesigin motok lek o," iluk yogosike. ²⁷ Ap ati nen he, Yakub mel yogosike, "Hat hetage sa?" Yakub en wene oko yogoti logolik, "An netage Yakub." ²⁸ Ap ati nenat he, hobuk Yakub mel yogosike, "Hobuk hetage Yakub iki logogun lek o, meneat he, Israel o, iluk yogosike. Hat Walowak heperak hoake huluk ninghogoat, hebe apuni meneat homame aga ati nen hetage ari wokheti o," iluk yogosike. ²⁹ Ati'nogo yogosikesik he, hobuk at Yakub en wene henyok oba wane logolik wene mel yogosike, "Hat hetage sa? sekek hogo yogo'nesin," iluk yogosike. Meneat he, ap ati nen yogoti logolik, "Netage henyok wanen ati nenahalok?" iluk yoigosike. Ati'nogo yogosikesik he, "Helmo wulalhak logonyo" iluk wene o atem en yogosike. ³⁰ Hano wene arat Yakub oba hesimo re, Yakub en o atem etage Paniel salhike. at en iki logolik mel isike, "O ya nen Walowak neileken higi nen at en eileken haneat meneat he, nebe neluk at welagi," yluk isike. ³¹ O mo arat yegelogo lagei wagaikomo, at o Paniel herakhuluk lagaike. At Yakub apilok eki tugi wasikomo, eki kopokhogo elokwe sogom laga logolik eileruk hesikomo re werek kolek at herak kuluk lagaike. ³² Ati nen he, Yakub apilok ekalim omaken sinuk hogo eki tugi wasike ati nen he, ap Israel mene wam enyo apilok ekalim oba mene alep en pikit yogotak ya motok nekarek lek ati.