¹ Salomo nen wulikin tembaga mene ba halike. Wulikin tembaga mene ati ilireke uan he 10 huli, ilireke nukulik he 10 huli, nen ilireke liawek uan he 5 huliba. ² Atiba lagakogo at en i atla hegarek mene aguk waganek hoponiken, ilireke lisu ekat tulem oba nukulik lago 5 huli, nen liawek uan he 2,5 huliba. ³ I hinago huguke huko ati abel make akit wam lembu aliwit waganek asiok pire erarek yiling walaling i hinago huguke atiba ilireke 5 huliba. (Wam Lembu Atii Hinago Huguke Oba Omakima Halukwa.) ⁴ I hinago huguke ati oba wam lembu ebe aliwit wanaganek halek oba halogo hisukwa. Wam lembu halek henagan ekoke ineki epoke akit hisukwa, henagan eloke mo eileken kopokogo kikerek akit hisukwa, henagan eloke ineki peike akit hisukwa, nen henagan ineki mo eil hegelogo liaiagarek akit hisukwa. I hinago huguke huko ati wam lembu ati opoloba welaike.Wam lembu ati atoma obogat lapukogo metek hisuwasik aloak aukum atla ke lawek welaike. ⁵ I hinago huguke huko ati apun taksek ineki hake nen eraluke eki hagarek, ebe eken hano iterek mene bakum hake halek welaike. I hinago huguke ati i hinagasogo husak he 66.000 liter huliba. ⁶ Salomo nen baskom erak mene soaluke oguluk 10 nen halogo halike. Isalikik en ineki epoke hisike nen isalikik en omoke ineki peike akit oguluk soaluke hesik hisike. Bejana 10 ati yimene timene halogo etu leletarek mene soalelogousak hesik halogo hisike. Ake i hinago huguke huko perunggu mene halek ap Walowak esewerek it en okawerek hesik oba wogotilek logolik inekawerek inebe soalelogousak. ⁷ Arat Atiba nen at en esage esok emas mene 10 nen halike, haligin iluk akasike higit hogo, nen Ninopase Etage pogot awi wurik'mo halogo hisike, isalikik en ineki epoke hisike nen isalikik en ineki peike hisike. ⁸ At en e meja 10 nen halogo Ninopase awi wurik'mo hisike, isalikik en ineki epoke hisike nen isalikik en ineki peike hisike ake at en emas 100 mene baskom halusak hesik hisike. ⁹ At en o silimo ap Walowak esewerek mene halike, o silimo huko halike, nen Kwe ape o silimo ati hesik he. At en tembaga mene oba kwe ape bake sepeligik husak hesik ati halike. ¹⁰ Atiba lagakogo at en i hinago kalogo huguke huko ati Ninopase Eatgepogot awi wurik'mo ineki epoke isike mo eil hegelogo liaiagarek akit nen hulisanem selatan higit hogo hisike. ¹¹ Huran en kuali halik, sekop-sekop, nen baskom halike. Atiba re Huram en inoe kain etage werek Salomo hesik o Walowak awi wurik'mo yabu arat halike. ¹² Huaran en e atuli pire mene halike, mangkuk-mangkuk nen e atuli ukuloak pire oba logouagaluk halogo hisike ati. At en su el hapuksek ugu etage jala mangkuk pire ukuloak oba sebelogo husak hesik e atuli pire liawek werek'ma opoloba ati. ¹³ Huram en delima 400 en su jala hesik pire halike. Su jala Asiok pire delima oba halike, mangkuk pire ukuloak sebelusak hesik atuli liabek ukuloak oba ati. ¹⁴ At en kereta opoloba lagilik mangkuk oba soaluke halike, ¹⁵ Nen eki hagarek huko mene wam lembu 12 en ama halek welaike. ¹⁶ Huram en temek isatarek mene kuli, sekop, isugat ekat kabelek mene garpu, nen obogat lapukogo ato Inoe kain etage werek Salomo hesik Ninopase Etage pogot awi wurikmo logousak mene halike. (Obogat Lapukogo Ati Tembaga Mene Eil Amulit Tiarogo Halike.) ¹⁷ Inoe kain etage werek Salomo nen obogat lapukogo ati o Yordan o sili ake Sukot nen Zereda atoma nen auak haligik lakousak iluk yogosasike. ¹⁸ Salomo nen yimene tineme abigat halike, ati nen tembaga ekin ineki wenatilek. ¹⁹ Salomo nen Walowak awi wurikmo logousak mene hesik halike. At en wulikin emas mene nen supuruk Roti werago higilogousak oba e sabia mene talogo huguke halike. ²⁰ At en esage wialelogousak mene esok emas mene motok o sekelek okawerek aligat mene hesik wialelogousak oba soulam welagarek higit hogo halogo hisike. ²¹ At en emas oba motok eka eken iterek mene, esage, nen hapirogo hakikerek mene halike. ²² At en emas werago mene obake haligik, penjepit, mangkuk, panci, nen tangku halike. At en emas werago mene oba Ninopase Etage pogot awi wurik'mo kwe halike, a'la sekelek okawerek mene hesik welagarek oba kwe halik nen a'la sekelek alep agik mene hesik kwe halik isike. 'iluk isukwa.