<<<<<<< HEAD
Pasal 1
=======
Walasike 1
>>>>>>> 3564aadc36dfc4aab6b144732c6fbcb6fbd31656
1
Ap aike ukul etage Eperayim mene ap sup en tagomakwe mene, etage Elekena, aua kota etage Erama apuni Eperayim mene inaua tom oba atoma welagaike. Opase re, etage Yeroham. Nen, Yeroham opase re, etage Elihu. Nen, Elihu opase re, etage Tohu. Nen, Tohu opase re, etage Sup ati.
2
Ap Elekana ati agagwi inebe pire. Inetage re, Hana ho, Penina ho. At Penina eagwi taginapi lagaike meneat he, at Hana nek he, eagwi lek.
3
Ati'nogo logolik, at Elekana Ninopase Etagepogot Walowak omame apik mene a'nogo hogoratik, wam warogo loletik, igiluk o Erama nen tahun ebe lopogat o Silo waga lagaike. O Silo atoma ap Walowak esewerek he, ap Eli againapuri Hoponi hi, Pinehat ho, welagaukwa.
4
Ati'nogo were kolek, at Elekana nen wam warogo Walowak loleti lagaike ati mene ebe lopok loleti logolik, wam sekelek hetakwe, he Penina eagwi obogat inom inebe lopok wogosiki lagaike.
5
Ati'nogo meneat he, at he Hana nen he, Ninopase Etagepogot en abilithesike ati nen he, wam sekelek, we, at mene nek wogoti lagaike. Ati'nogo wogosiki lagaike meneat he, at he Hana etauken hutik motok welagaike.
6
Ati'nogo werek kolek, at Ninopase Etagepogot en at Hana abilithesike ati nen, ege Penina nen ane sagan waganogo wenagato motok hagatenem, etauken wariko motok welagaike.
7
Ati'nogo hagati lagaukwa ati re, tahun ebe lopok it Ninopase Etagepogot awi wuri'mo wirik, Penina nen Hana ekali warogo wenagato motok hagatenem etauken motok wariki logolik eki aike wam kurik niki'lek heraksilik le ago welagaikeat.
8
Ati'nogo hagatenem, at agun Elekana nen he, "Hat heagwi ap enek inebe 10 taginabumo re, it en hat hesik he, esin negen lek. Nen, an enek he, motok esin negen welagi meneat he, hat ha'la motok kolo arik, wam niki'lek herakhiki lagen ati nenahalok?"
(Hana Eli eilhanem Sapan isike Wene)
9
-eki aike sapul he, at Elekana againapuri inom wam mel, yi mene ti mene mel, o Silo Ninopase Etagepogot awi wuri'mo niki lagaukwasik,
10
at Hana melagaikesik he, a'la motok kolo agaikesik, etawi hit-hit le aga logolik Ninopase Etagepogot sapan kino yogosike. Ati sat he, ap Eli Walowak esewerek mene ati ebe Ninopase Etagepogot awi kwe ba horok hogo e talek oba hurek welagaike.
11
Werek kolek, at Hana a'nogo sapan Walowak mel yogosike: "Nopase Walowak Hetagepogot homame apik mene a'nogo nen hatitigeke heileken wo'nabin o, Nopase. An hatitigeke yi motok weak welagi ati heileken niilik harakhanhi'lek, noba ebe'no o,Nopase. Hat en an neak ap aike wo'neten halok, an nen at ati ebe Hat hesik motok logouagaluk apotkwe wokhesigin o, nopase. Nen at ta'laga halok, esi palhi'lek harakhilik logoigiluk wene watheti o, Nopase," iluk yogosike.
12
At Hana ati'nogo sapan abirogoat iko wre'ma, at Eli Hana apema eileken kumuti lagaike.
13
At Hana sapan ane igi'lek a'la nen iki logolik, ape abolok enek iki lagaike ati nen, at Eli a'la nen he, "He ati anggur amusu nikesik en sini'nuk agasik ili'logo higi," iluk akasike.
14
Ati'nogo akasikesik, mel yogosike: "Hat o yoma nen lugulugi palusak le'maat palhetik welagen yoma ri! Anggur amusu hobuk aike nasak lek o," iluk yogosike.
15
Ati'nogo yogosike meneat he, at Hana nen he, mel yogosike, "Nopase. An anggur amusu niki'legat o. We an na'la motok weak logolik, netauken wariki lagi mene ati obogat pilingirogo Ninopase Etagepogot yogoti lagi, nopase.
16
Hat ha'la nen he, he yi yugunat yanani nikirek mene higi, iluk ha'la akugun o. An weak welagi ati nen na'la kolo agarik, sapan yi'nogo iki lagi o, nopase," iluk yogosike.
17
Ati'nogo yogosikomo, at Eli nen he, "Walowak apuni Isirael mene Ninopase at'nogo nen hane asuk holhesik hat en kino yogoten mene ati wokhesuak o. Ma re, ha'la hanorogoat haua lan o," iluk yogosike.
18
Ati'nogo yogosikomo, at Hana nen at Eli yogoti logolik he, "Nopase, an hatitigeke hetawi'napi logoino," iluk yogo'luk he, supuruk nagaluk wagaikesik a'la hano logolik oba heanerogo nasike.
19
Ati'nogo naluk nogo isukwasik, at Elekana againapuri inom ohealegat siak hogo ineluk agaukwasik, Ninopase Etagepogot hogora'luk inapotkwe o Erama lagaukwa. Lagaukwasik, at Elekana agwe Hana eperak nogo isukwama, Ninopase Etagepogot en Hana nen kino yogosike mene a'nogo ane asuk holhikesik wogosike.
20
Ati'nogo wogosikomo, omalik a'ma agaikesik he, eak ap takasike. Takasikesik, mel isike, "An Ninopase Etagepogot kino yogotima neak wo'nete," iluk isikesik etage Samuel salhike.
21
Ati'nogo salhilik, at Elekana againapuri inom en, "Tahun welagosi'mo o," iluk wam Ninopase Etagepogot hesik warogo lolesuogoluk o Silo wesusak oba arat asi wagaike. Wam ati'nogo warogo Walowak loleti logolik, Walowak okawerek hesik wam abirekeat aike warogo lolesigin iluk wene hageat waresikesik inomat lolesigiluk wagaike.
22
Ati'nogo wesigiluk ikenem, at Hana ati like nek he, kamo igiluk agun mel yogosike: "An neak Samuel eilak arat palho halok en ebe Ninopase Etagepogot awi wuri'mo motok logouagaluk, wolok halok lak en he, kamo igin o," iluk yogosike.
23
Ati'nogo yogosikomo, at Elekana nen he, "Hano hagasusak he, ati'nogo, iluk akegen halok he, hanoat o. Omalik ari eilak palhilik lasak oba arat hasi waga halok, lanok en he, ouma kamo ino o. Hat en he, ti'nogo hagasigin, iluk Ninopase Etagepogot wene wereten mene ati eberogoat haga'nok o," iluk yogosike. Ati'nogo yogosikomo, at Hana ouma kamo isikesik were'ma nen omalik a'nogo arat eilak palusak oba asi wagaike.
24
Ati'nogo wagaikomo, at Samuel eilak palhukwasik he, ebe yekerek hamuluk oba, agosa nen wolok Ninopase Etagepogot awi wuri'mo o Silo wagaukwa. Ati'nogo wolok waga logolik, wam sapi kulok ebe umur 3 tahun mene mel, gandum eken 10 kilo mene mel, isoak wam ogat mene hagarek mene ba i anggur amusu apem hetok hogo hinago mene mel, wolok wagaike.
25
Ati'nogo wolok wagaikesik, wam sapi a'nogo warogo sekelhukwasik he, Samuel ebe Eli oba wolok kisukwa.
26
Kisukwasik, Hana nen Eli mel yogosike: "Nopase. An nebe hu'neegen a? An nebe re, ya metek logolik Ninopase Etagepogot sapan kino yogotenem, hat heileken tomok neasigin mene a'nogo o.
27-
28
An neak yi re, Ninopase Etagepogot sapan kino yogosigi a'nogo at en nane asuk holhikesik, wo'nesikomo nen he, yekerek yi ebe Ninopase Etagepogot okawerek hesik motok logouagaluk wogosigiluk en wolok wagi o," iluk yogosike. Ati'nogo yogosikesik, it en ineitep awi yagasogo Ninopase Etagepogot hogorasukwa.