<<<<<<< HEAD
Pasal 2
=======
Walasike 2
>>>>>>> 3564aadc36dfc4aab6b144732c6fbcb6fbd31656
1
At Hana nen Walowak hogorati logolik, sapan mel isike: "Nopase Hetagepogot en na'la hanothegenma hai hakiki lagi o. Hat hagatetek ati ba, an nukuloak uan aga o. Hat en lebe'neegen ati nen, nege nen aselei mene negen haga'nabi'logo a'nogo na'la hai hakiki logolik nane sagan wokhigi o.
2
Nopase Hetagepogot hokawerek haligat tegelek motok welagatek ati hake it aike motok lek o. Hat halik-halegat en hawe a'ma hinilik ha'nisek welagatek o, Nopase," iluk yogosikesik,
3
at ege ebe were'ma yogosu hak, mel isike: "Hat nege nen hapeliagat hokawerek en hogorakigik, sebirakigik, iki logolik, yogonesusak motok lek o. Ninopase Etagepogot yi hesik ti hesik huthasak elok ene'ma re, apuni inoabut hagatarek lopok obogat higit hogo ukum inoba higik, kotik, ikerek ati nen, hat hapeliak nabok elangati lagen mene ati elugun warogo hane tokok in o.
4
Ap ekaraguntek inasike oake hukalaga mene at he, apuni inomame lek mene inomame ari'logo o.
5
Alebat apuni inapuruk oba hilarogo niki logolik, inalabut ning hogo niki lagaika meneat he, yogotak supuruk lek en heluogoluk, ineki oko wogisoagaluk hagari'lugi o. Mene re, apuni alebat supuruk nele welagaukwa meneat he, yogotak inapuruk elok werek en inalabut ning hogo nili'lugi o. Ap aike agagwi at aike alep abili welagaike mene yogotak eagwi inebe 7 taginapesik a'la hai hakili'logo meneat he, at he aike eagwi inebe apik taginapike mene ati maben agasik werek o," iluk isikesik,
6
Walowak mel yogosike: "Nopase Hetagepogot en, apuni inoatik, inelugurinapik, egetek o. Apuni wa'la'luk lagaikare'ma a'ma baga pelaginabik en, hobuk atoma nen liaksa wagategat o,
7
Nen, Hat en, apuni kepu ineilmolek hagarogo hisigik, kain ineilmo wulalhak hagarogo hisigik, egetekat o. Apuni aike isongotsigik, aike hesangatsigik, egetegat o.
8
Apuni inagarok lek mene motok weak were'ma woginapik, hele werek negen weak welagaikarek mene ati hikalogo inetage werek mene inom hano hagarogo hisigik, agaugerinapi logouagaluk ineyabu hano mene wogisigik, egetek. kweang helage tik werek he, Ninopase Hetagepogot Hat mene ma re, kweang Hat mene ati ba louk hogo walhasiginmo welagarek.
9
Nopase Hetagepogot en Hat hagainapuri mene wea'ma lanogo iluk heki ha'nisek welagatek o. Ati'nogo meneat he, it apuni inoabut weak mene ati, o mum hik-hakse'ma laksamo alema'laksugun o. It apuni inokawerek en yi'nogo ti'nogo aike hagasusak mene ati nen he, it inomame ba inomame asugun motok lek o.
10
Nopase Hetagepogot hane pogot oba nen okuku ane ba ikenem haselei mene inebe motok yeloken tagalogo lek arik inayuk asigin o. Hat Nopase Hetagepogot en apuni kweangma mene obogat ukum inoba higik, kotik, ilik, at kain etagepogot asuagaluk weteberogo menhesigin mene ati, omame wogotenem ukuloak uan asigin o," iluk Walowak hogorasike.
11
Ati'nogo hogorasikesik he, at Elekana againapuri aike inom o Erama inapotkwe lagaukwa. Ati'nogo meneat he, yekerek Samuel a'nogo o Silo atoma herakhuluk lagaukwama, ap Walowak esewerek Eli nen serogo werek kolek Ninopase Etagepogot hesik hagati lagaike.
(Ap Eli againapuri nen hagati lagaukwa wene)
12
Ati'nogo hagato kolek, ap Eli againapuri inoabut motok wea'ma re, Ninopase Etagepogot agauk hogo hagati lagaukwa motok lek.
13
Ati'nogo hagati logolik, apuni inukul etage Isirael mene hesik, it ap Walowak esewerek en hagasusak lek mene ina'la akaluk motok hagati lagaukwa. It en hagati lagaukwa re, apuni nen wam Walowak hesik hisilik warogo lolesugun mene wolok wirik isatenem, ap aike it ap Walowak esewerek mene inatitigeke mene nen he, sibat garpu ago 3 hagarek mene wolok waga lagaike.
14
Ati'nogo wolok wirik he, wam Walowak hesik warogo hisilik panci ba isatenem a'la kelakhilik en wanhenem sibat garpu ati nen holok hogo lisogo wolok wulibik halok he, it ap Walowak esewerek mene hesik hisiki lagaukwa . Apuni Isirael mene wam yi mene ti mene Wlowak hesik hisilik lolesuogoluk o Silo wganem he, inebe obogat ati'nogoi motok hagarinapi lagaukwa.
15
At ap Walowak esewerek mene inatitigeke mene ati nen he, wam amok etu lolugun mene hesik oan tegelogo higi'le'ma wirik he, apuni wam Walowak hesik hisilik lolesugun mene ati mel yogosiki lagaike: "It ap Walowak esewerek mene wam kurik isago mene wanusak inabit ati nen he, wam sekelek hesun mene halok etu eken oba werakoagaluk wo'ne'ni o," iluk yogoisiki lagaike.
16
Ati'nogo yogosikenem, it apuni ati nen he, "Nit en, ti'nogo hagasusak, iluk wene palek werek higit hogoat hagasusak he, wam amok ati tak etu lolhilik halok en, hat ha'la walok akegein mene hobuk en wanusak o," iluk yogoti lagaukwa. Ati'nogo yogotenem at en he, "Ati'nogo lek o. Yogotak yaat, wo'nesusagat o. Wo'neti'lek halok, neki abusak wanigin o," iluk yogosiki lagaike.
17
Ati hak he, ap Eli againapuri inebe pire ati nen wam Ninopase Etagepogot hesik warogo loleti lagaukwa ati ina'la meathilik he, Walowak eilhanem weak hukoat hagati lagaukwa ati.
18
It ati'nogo hagato kolek, at Samuel ebe oan yekeregat logolik, Ninopase Etagepogot hesik hagato welagaike. Ati'nogo hagati logolik, esau esi linen mene ap Walowak esewerek mene Walowak hesik hagasuogoluk itarek hake mene at hesigat karek mene ikogo hagati lagaike.
19
Ati'nogo hagato kolek, at Samuel agosa nen asu sogoi su hamuluk mene karogo agun eperak tahun ebe lopok oba wam Walowak hesik warogo lolesuogeluk waga logolik halok wogosi waga lagaike.
20
Ati'nogo waganem, ap Eli nen Elekana agwe Hana eperak Ninopase Etagepogot Walowak nen hanorinapi logouagaluk mel yogosiki lagaike: "Hit en yekerek tatep mene Ninopase Etagepogot wogotep ati, obulu'mo hat he yi nen heagwi aike taginabino o," iluk yogoisiki lagaike. Ati'nogo yogoisikenem, inapotkwe o Erama laga lagaukwa.
21
Ati'nogo hagatenem, at Walowak nen Hana hanothesikomo, eagwi ap inebe hinagan, nen himi inebe pire tagainapike. Nen, at Samuel hogo re, Walowak eilhanem ebe aluge aga lagaike.
(Ap Eli againapuri inom en hagati lagaukwa wene)
22
Ati'nogo aluge aga kolek, at Eli ebe motok yaman agaikesik were'ma, againapuri nen apuni Isirael mene motok weak hagarogo hisikenem, inabok holhi lagaike. Aike re, himi Ninopase Etagepogot awi su mene wuri'mo kwe ba serogo logolik Walowak eyabu hagati lagaukwa mene inom nogo iki lagaukwa mene inabok holhikeat.
23
Ati'nogo hagati lagaukwa ati nen againapuri mel yogosasike: "Hit hinobut motok weak hagati lagep mene ati apuni Isirael mene obogat en an arat yogonesi waganem nasuk holhi lagi o. Hit hinobut motok weak ati'nogo hagati lagep ati nenahalok.
24
Ninopase Etagepogot againapuri nen hit hagati lagep mene hinabok ega ati motok eberogoat weagat ega o. Halok hit hinoabut motok weak hagati lagep ati'nogo hobuk aike hagati logup o, nagainapuri.
25
Apuni nen it apuniat weak hagarogo hisogoin halok he, Walowak en it were'ma erik elok telinabusak o. Ati'nogo meneat he, Walowak weak hagarogo hogoin halok he, sa nen elok telinabusak akegep. Motok mea o, nagainapuri," iluk inasuk wasike. Inasuk ati'nogo wasike meneat he, at Ninopase Etagepogot en it inoasigiluk arat akasikesi'mo nogo nen he, inopase nen inasuk wasike mene ati ina'la serametsilik heraksasukwa.
26
It ati'nogo weak hagato kolek meneat he, yekerek Samuel a'nogo ebe aluge aga kolek, Ninopase Etagepogot en mel, apuni obogat en mel, at Samuel hesik inoba liok iki lagaike.
(Walowak nen ap Eli againapuri inoasigin mene Eli yogosukwa wene)