¹ Nyaka, hida ptekina Samuel naduki ngarakuwai ne tanah Israel. Ata Filistin Napakalah Israel Natukke ata Israel gobbai ata Filistin, tubana bapa tauna monno barawina kemah ne barra Eben-Haezer. Tangerana, ata Filistin barawina kemah nee Afek. ² Ata Filistin atura barisanda baaroi ata Israel. Ne patauna nahebata monno ata Israel kalah wali barrada ata Filistin, patta rata ata mata na bapa tauna. ³ Wali bada ata kemah dana, monno ata paama- ata paama Israel hapanewe, "Ne kana palu pakalahda MYORI ne aroda ata Filistin? Maida kata dekea Tabut lii kirana MYORI nee Silo, gai ka ammi ne tillu dongada tubana kata luputa wali li ma danada musuh. ⁴ Murrina, patukana ata nee Silo keketa daitowa Tabut lii kirana MYORI, hapareta ngarakuwana, hamadii ne ponnu kerup. Nee, duada anana Eli, Hofni monno Pinehas, waidi ne barra Tabut lii kira Allah. ⁵ Nebapa tamai Tabut lii kira MYORI ne kemah dana, naka kabuara pawai yogo ata Israel, dukkie bana daduka tanah. ⁶ Neba rengnge lii kabuara pawaiyogo ata Filistin, monno hapanewe, "Appa kabuara hamalelika wali kemah danada ata Ibrani?" Hapande pyage Tabut lii kirana Myori bapa tamai kemah dana, ⁷ Madauta lyolo bada ata Filistin. Orona, patekida, "Ammibai tama kemah dana." Hapanewe domo, "Kareibanada ito, dana pernah pongngukipo bana dadie hitti tanah ullu dukkie bahinna nee. ⁸ Kareibanada ito! Garraku ole perada itto kata luputa wali limma dana Allah haekagai? Na nyaba-Na Allah hapalu pa kalai ata Mesir monno bawena panyakita tillu mareda kikapa. ⁹ Pawessi ge atawaimu monno hahinnana ata kabani, he ngarakuwami ata Filistin, gai kada ata pawedekana migi ata Ibrani hahinna bana hitti ulluna bawai ata paangu migi. Kabani memami, monno gobbadi pataudengadi. ¹⁰ Murrina, patau lyolo bana ata Falistin monno pa lu pakalai ata Israel, nyaka kedu lolobana kemah dana da. Hakalah pamarro lyolona. Touda kabullu rata tentara Israel kako tanah hamate. ¹¹ Bage, Tabut Allah rampokwa, monno duada anana Eli, Hofni monno Pinehas, mate. ¹² Nangu mallebana ia ata suku Lewi wali patau danana kako nee Silo ne lodo mema. Kalambena ha mubuka mairra, monno nabonnuge tanah katowana. ¹³ Nebana dukki, Eli ne ei amadii kursi deta, namagolata napa rema nudu lara. Orona, ate na naka daddaka tubana Tabut Allah. Na ata angindi patekki napa dukkige ia kota-ia kota, kawika ngio kawauka ngarakuwa kota. ¹⁴ Ne bana rengnge ngio kawauka Eli, natuwa, "Appa kawissaka ngiowe?" Hangu ammibai na ata tekkina Eli. ¹⁵ Umurna Eli iwwa kabullu ponndo douna, monno matana waworabana, nya kadana eta. ¹⁶ Patekkina na ata barrana Eli, "waligo pataudanana. Kudundakage nee patauna ku kedu ne lodo." Eli na tuwa, "Peina nemme adadi tubada anagu?" ¹⁷ Nawale na ata angindi berita, hinnage "Ata Israel kedu wali aroda ata Filistin, monno kalah kalada lyolo ata Israel, monno anamu aduada, Hofni monno Pinehas, hamatebana, monno Tabut Allah harampasba limma dana badai ata Filistin." ¹⁸ Ne batekkia tubana Tabut Allah, nangu warraka bana Eli wali kursi deta ne bali binna gerbang. Nangu bata bukkuna, monnonangu matebana Eli, orona baka weda monno bana morru. Eli na terrena pareta ba hakim wa patta kabullu douna. ¹⁹ Wassena Eli, ole ummana Pinehas, napa tia aroge bage paana. Ne bana rengnge lii barampasa Tabut Allah, monno bana mate mattona moonno la i na, nangu katikka bana paana, orona karodduka paana napoddage. ²⁰ Ne tippa yodie bana mate, hapanewe hida ata dede barrana, "Dumadautakana, yo u mupaanana lakawa kabani." Takka dana waleki monno da iki papa yerra waina. ²¹ Napangarai anana Ikabod, patekina, "Namuwabage ngarana duwa wali Israel."Orona ba rampaswa Tabut Allah, monno orona mattona kabani monno la i na. ²² Patekina, "Namuwabage kemuliaan wali Israel, orona barampaswa Tabut Allah."