¹ Tubada ata a geile : Waige geile 'Rusa ne'e kabu gedde ki'i'. Geilena Daud. Marobba Allahgu, Marobba Allahgu, appa maka Mu duddakaga? Manumaragu na marrowe walina barragu, ngiadoyi patekkigu baku kawula. ² Oh Marobba Allahgu, ku pa ou-Gu ne loddo, takka Dou walemawa. Mono, gedde dana, takka daku kadennama. ³ Takka, You Mu bia, madi'i barrada geileda ata Israel. ⁴ Barra-Mu, ama kawiedama da waige. Da waige mono Mu pamanumarayi. ⁵ Barra-Mu, bada kawula, mono da manumara. Barra-Mu da waige, mono dada makke ma. ⁶ Takka, yauwa kabaketawa, da ata kiwa. Yidda ata da ullaga mono dada beimaga. ⁷ Ngara dukkana ata a ietawa da ullaga. Da wukkewe ro'o wiwwida, da kiddukage katuowada. ⁸ 'ieruna barrana Muori, ga'i kana pasellawu. Ga'i kana tulugu, oronage Ngia bana maringa barrana'. ⁹ Takka, You a tengiwa baku lousona walina ti'a dana. Oro-Mu You maka ku waige, yidda susuna innagu. ¹⁰ Ku maleto walina ti'a dana. You dona Marobba Allahgu, walina ti'a danana innagu. ¹¹ Dou marro kaga, oronage ne a sillira na barra bawe, takka da'ima a tuluga. ¹² Mangieda sapi mane a woletaga, a louka kullisa walina Basan a woletaga. ¹³ Da wukke pakaladage ngada da barragu, mirrika singa a punni mono a beige yoppa wa. ¹⁴ Ku lai mirrika we'e, ngara dukkada rigu da pakai walina togo rigu. Ategu mirrika lilin we, a lai ne'e wekki danagu. ¹⁵ Kullisagu na mara bawe mirrika wurro a bua. Lommagu na kadakkawe togo tulla ngaragu. Mu tauwa ne'e kobbura mate dana. ¹⁶ Oronage, yidda bogga bada kaworega, yidda ata a buokala da woletaga, da duka gadi limmagu mono wa'igu. ¹⁷ Ku padde baku yiepadi ngara dukkada rigu. Da gillakaga mono da ieta. ¹⁸ Da bare gadi kalabbegu barrada, da letona undi ponnu kalabbegu. ¹⁹ Takk You dona oh Muori, dou marrokaga! oh kullisagu, ngettana tuluga. ²⁰ Tulu gani diewagu walina beddila dana, a ngia miema kina, walina yidda bogga a pakati. ²¹ Tuluga walina barrana ngada singa, walina kadu karabbo matobba. You a walewa. ²² Ku tekkiwe ngara-Mu barrada du ole dadigu, ne'e pakassa danana, ku deika-Wu. ²³ Yemmi a madautani Muori, deikaya Ngia! Yemmi ngara dukkami ubbu aibana Yakub, deikanage ngara-Na! Yemmi ngara dukkami ubbu aibana Israel, madautani Ngia! ²⁴ Oronage, ba dana parajakayi mono dana beimage mayilla, yidda ata a mayilla. Dana kabunni mage mata-Na walina barrana na ata, mono Na rengewe bada kawula. ²⁵ Walina barra-Mu, ammige ne geilegu ne'e pakassa danana, ku yayi paparasigu aroda a madautani Muori. ²⁶ Yidda ata a mayilla da nga'a mono da biekuta. Yidda ata a ngaddo-Ya da deikaya Muori. Ga'i ne atemu kana muorikawe dukki murri wali murri wali! ²⁷ Ngara dukkanage uppu tana da lolowe, mono da bali barrana Muori. Mono, ngara dukkada kadukka tana da kawodo aro-Na. ²⁸ Oronage, Muori ngiadona Tokko, mono Na pareta barrada kadukka tana. ²⁹ Ngara dukkada ata a morru ne'e ponnu tana da nga'a mono da deika. Ngara dukkada ata a burru ne'e kobbura dana da rukkadi kuddoda aro-Mu, yidda a idda pamalouge muorika diewa da. ³⁰ Iyya ubu aiba da layani Gu, da tekkiwe tubana Muori barrada ubbu aibada. ³¹ Da mai mono da tekkiwe a bia, barrada ata pa paanada, ne Ngia bana payillige.