Sabayana Daud ¹ Rengewe a didara, oh Muori. Pa ate gage kawulagu. Rengewe sabayagu, da wali kinage ne ro'o wiwwi a makirri. ² Ga'i ne paresa ka walinage barra-Mu. Ga'i yidda mata-Mu kana ietawe a linna takkana. ³ You a nunga gage ategu, You a lippa ngaddowa gedde dana. Mu nungawa mono Dou kolemana lakka appana. Ku kabbu bage ne ngada-Gu ba dana lawiwe. ⁴ Tubada parawida ata, a linnana patekkina ro'o wiwwi-Mu, ku sibitabana walina lara a pamayilla denga. ⁵ Na pagagu ienga douni bana norroge ne oro wa'i-Mu. Wa'igu dana tabirrisama. ⁶ Ku pa ou-Gu, oronage Bou walewa, oh Marobba Allah. Patingiyi katillu-Mu barragu, rengewe patekkigu. ⁷ Waige pata a dessa, patingoge manawara-Mu, a tuludi yidda ata a ngaddowe padou mawo ne'e limma kawana-Mu, barrada yidda a beige kedde. ⁸ Dawawa mirrika wiesa mata dou-Mu. Pa kabunniga kabu mawo kapa-Mu, ⁹ walina yidda ata a buokala, a pubbukawa, walina yidda kamukagu, a woletaga. ¹⁰ Ne morru na tuodiwe, waige ngadada, da panewe padeika wekkina. ¹¹ Ne'eya, da seipugadi pagagu, da pa arodi matada, ga'i kada letoga togo tana. ¹² Mirrika singa ya, a beige irraya. Mono, mirrika singa a bo'u pona a madaka ne'e padou a kabunni. ¹³ Kedde, oh Muori! Aroni, mono pa kamoko no. Tulugani diewagu walina yidda ata a buokala, waige beddila-Mu, ¹⁴ walina yidda ata waige limma-Mu, oh Muori, walina yidda ata ponnu tana ne torada wa'ige ni'i muorika dana. Mu ponnu dadi ti'ada waidi pote, da biekuta dugguda anada, mono da duddakadi anada. ¹⁵ Takka, ku gillakaguge mata-Mu, ne'e a bia dana, ne baku kedde, ku puas oro tou-Mu.