Alef ¹ Maringana yidda ata a dessa larana, a kako a linnana patekkina Muori. ² Maringina yidda ata a norroge a patekki-Na, a ngaddo-Ya waige atena, ³ mono a idda rawi dommoge a buokala, takka a kako a waige lara-Na. ⁴ Mu patukadi yidda pa paresa-Mu, ga'i ka dawa takkayi. ⁵ Na laragu ba pamaddukoni ga'i kana wai takkage ne patekki-Mu! ⁶ Ba linnakowe, dada pamakke mawa, baku pa atekodi ngara dukkada papatuka-Mu. ⁷ Ku pamalangi-Wu waige ategu, ne baku pa atedi yidda paresa-Mu a bia. ⁸ Ku waidi yidda patekki-Mu, dou ga'i kaga. ⁹ Pei wa'ida yidda bua ata bada pa atege larada a warrasa? Pa atege waige patekki-Mu. ¹⁰ Walina ate dana takkagu baku ngaddo-Wu, dou ga'ikaga baku sillira walina pa patuka-Mu. ¹¹ Ne'e ate danagu, ku boddalawe li'i-Mu, ga'i ka daku rawikage a sala barra-Mu. ¹² Maringana You, oh Muori! Panunga gadi yidda paresa-Mu. ¹³ Waige ro'o wiwwigu, ku padukkidi ngara dukkada paresa-Mu. ¹⁴ Ku maringa orona patekki-Mu, mirraka kolewe pote. ¹⁵ Ku pangeddadi patekki-Mu, mono ku ietayi lara-Mu. ¹⁶ Ku maringa oroda patekki-Mu, daku denga magudi patekki-Mu. ¹⁷ Yawe kanurru barrana ata-Mu, ne balinnawe ku muorika baku dawawe li'i-Mu. ¹⁸ Wukke gadi matagu, ba linna kowe ku ietawe na tada walina papanunga-Mu. ¹⁹ Yauwa dona ata a mai ne ponnu tana, dou kabunni kadi paparesa-Mu walina barragu. ²⁰ Na deiwagu na mubbuka oro baku riddu gudi ukku-Mu iyya loddo iyya loddo. ²¹ Mu kayakadi yidda ata a padeika wekkina, yidda ata pa aura, a sillara walina paparesa-Mu. ²² Lulluge ne pakalokoda walina barragu, oronage baku diekuge ne patekki-Mu. ²³ Lakka yidda ata a paresa bada madi'i bada panewe waiga, na ata-Mu na pangeddadi yidda patekki-Mu. ²⁴ Yidda patekki-Na ngiadoyi pabeigu, yidda dona a bowoga. ²⁵ Diewagu na kadakkaka togo kobbura, pattugage ne muorikagu a linnana ne li'i-Mu. ²⁶ Ku tekkiyi yidda laragu, mono Mu walewa, bowo gadi yidda patekki-Mu. ²⁷ Ga'i kaku paddedi yidda patekki-Mu, bage ku pangeddadi papayilli-Mu a kaladana. ²⁸ Na diewagu na ngi'o oro bana milla ate, pakeddewa a linnana ne li'i-Mu. ²⁹ Pamarroga walina lara a makirri, mono yagage ne patekki-Mu. ³⁰ Ku pedeya na lara a bia, ku tauyi yidda ukku-Mu ne arogu. ³¹ Ku kadakka barrada patekki-Mu, oh MUORI, dou ga'i kaga bada pamakkewa. ³² Ku malle ne'e lara paparesa-Mu, oronage Yo'u bou paluara gage ategu. ³³ Bowoga, oh MUORI, lara patekki-Mu, mono ku karawayi dukko kadukka nage. ³⁴ Yaga padde ga'i kaku karawayi patekki-Mu, mono ku karawawe waige ategu. ³⁵ Dutuwa a linnana ne patekki-Mu, oro baku beige. ³⁶ Patidiwe atemu barrana patekki-Gu, da barra mada ne pa utu a idda bia. ³⁷ Pasibitadi matagu ba ietawe ne a idda mangu orona, mono pattu gage muorikagu ne'e lara dana-Mu. ³⁸ Pakeddewe patekki-Mu barrada ata-Mu, ngia maka da madauta-Gu. ³⁹ Dou pali kagage ne pamakke dengan pamadautagu, oronage yidda paresa-Mu bana dessayi. ⁴⁰ Ne a linnana, ku ridduwe ne patekki-Mu, pattu gage muorikagu waige a bia. ⁴¹ Ga'i ne manawara-Mu kana barraga, oh MUORI, manumara-Mu a linnana parasi-Mu. ⁴² Ba linna kowe, ku waleya na a pamakkewa, oronage baku waige ne li'i-Mu. ⁴³ Mono, dou batu kage ne li'i a bia walina ngada danagu, oronage pamennegu ne'ege barrada ukku-Mu. ⁴⁴ Ku karawa pakitawe ne patekki-Mu, dukki murri wali murri wali. ⁴⁵ Mono, ku kako ne'e manangu dana, oronage baku ngaddowe ne patekki-Mu. ⁴⁶ Ku tekki dommowe ne patekki-Mu ne'e aroda tokko, mono dada pamakke maya. ⁴⁷ Ku maringa ne'e paresa dana-Mu, pa beigu. ⁴⁸ Ku keketaya limmagu barrada paparesa-Mu pa beigu, mono ku pangeddadi patekki-Mu. ⁴⁹ Palologage ne li'i barrada ata-Mu, ne'e dana pa pamennemuga. ⁵⁰ Ne ngiadowe pa maringa waigu ne'e mayilla dana, ne paparasi-Mu na pamuorikawa. ⁵¹ Yidda ata a padeika wekkina na pamakkewa, takka daku sibitamana walina ne patekki-Mu. ⁵² Ku loloyi yidda ukku-Mu walipoge nettina, oh MUORI, mono ku pamaringa wekki douna. ⁵³ Wadalanage banimu na olega oroda yidda ata a buokala, a duddakage ne patekki-Mu. ⁵⁴ Ne patekki-Mu ku wai geilege, ne'e umma padou madakagu. ⁵⁵ Oh Muori, ku lologuge ngara-Mu ne gedde dana, mono ku karawawe ne patekki-Mu. ⁵⁶ Neya a dadi barragu, ne baku karawawe ne patekki-Mu. ⁵⁷ MUORI ngiadona tubagu, ku parasige ga'i kaku karawawe ne patekki-Mu. ⁵⁸ Ku ngaddowe pabei-Mu waige ategu, manawaraga a linnana ne paparasi-Mu. ⁵⁹ Ku pangeddadi laragu, mono pa arodi wa'igu barrada patekki-Mu. ⁶⁰ Ku ngettana mono daku tauma kira, ga'i kakarawawe patekki-Mu. ⁶¹ Kalerreda ata a buokala da podetawa, takka daku denga magudi patekki-Mu. ⁶² Tillu gedde, ku kedde baku pamalangi-Wu, oronage yidda ukku-Mu a didara. ⁶³ Yauwa ole daga ngara dukkada ata a madauta-Gu, mono da karawawe patekki-Mu. ⁶⁴ Ne tana na bonnuge manawara-Mu, oh MUORI, bowogadi yidda patekki-Mu. ⁶⁵ Mu rawige a dessa barrada ata-Mu, oh Muori, a linna na li'i-Mu. ⁶⁶ Panungagadi ne papangedda mono padde a dessa, oronage baku waige patekki-Mu. ⁶⁷ Ne ba daku mayilla po, ku sillira bana, takka ne'eya ku diekuge patekki-Mu. ⁶⁸ Mu dessa mono Mu rawige a dessa, panungagadi patekki-Mu. ⁶⁹ Ata a padeika wekkina da pa kotorawa waiga mapodeta, takka walina ate dana takkagu ku waige ne patekki-Mu. ⁷⁰ Ateda na makebbelawe mirrika morru we, takka yauwa ku beige patekki-Mu. ⁷¹ Na dessawe baku mayilla ko, ga'i kaku belajar yi pa padukki-Mu. ⁷² patekkina ngada-Mu na louka padessa powe tubagu walina rata katibbika omma mono perak. ⁷³ Na limma-Mu na rawiga mono na pakeddewa, yagage padde ga'i kaku paddege patekki-Mu. ⁷⁴ Yidda ata a madauta-Gu da ietawe mono da maringa, oronage baku mennege li'i-Mu. ⁷⁵ Ku paddege, oh MUORI, ne ukku-Mu bana bia we, mono ne'e manawara dana-Mu a pamayillawa. ⁷⁶ Ga'i ne manawara-Mu kana pamaringawa, a linnana ne paparas-Mu barrada ata-Mu. ⁷⁷ Ga'i ne manawara-Mu kana barraga ga'i kaku muorika, oronage ne patekki-Mu ngiadowe pabeigu. ⁷⁸ Ga'i yidda ata a padeika wekkina kada makke, oronage bada pakalegowa waige makirrida, takka yauwa ku pangeddage patekki-Mu. ⁷⁹ Ga'i yidda ata madauta-Gu kada bali barragu, ga'i kada paddege patekki-Mu. ⁸⁰ Ga'i ne ategu kana dessawe ne'e patekki dana-Mu, ga'i ka dada pamakke kawa. ⁸¹ Na dukkana diewagu oro manumara-Mu, ku mennege ne li'i-Mu. ⁸² matagu na dukkana oro li'i-Mu, luggu, 'Pirra bou pamaringawa?' ⁸³ Oronage, baku dadi patau wai ne'e mau api dana, takka daku denga magudi yidda patekki-Mu. ⁸⁴ Pirra gai kiapowe mado'i nage ne loddona ata-Mu? Pirra ne Yo'u bou paresayi yidda a ruotiwa? ⁸⁵ Yidda ata a padeika wekkina na kuodawe kaliena tubagu, yidda a idda waiguge patekki-Mu. ⁸⁶ Ngara dukkada papatuka-Mu pawaiyi, da ruotiwa waige makirrida, tuluga! ⁸⁷ Suodi kia da padukkawa ne ponnu tana, takka daku ga'i mage patekki-Mu. ⁸⁸ Pattu gage muorikagu a linnana ne manawara-Mu, ga'i kaku padde pa karawawe patekkina ngada-Mu. ⁸⁹ Dukki murri wali murri wali, oh Muori, ne li'i-Mu na madduge ne'e Surga dana. ⁹⁰ Ne manawara-Mu wali iyya ata bo'una dukki iyya ata bo'una, Mu pakeddewe tana , mono na dedewe. ⁹¹ Da dede ni'i loddo a linnana ne paresa-Mu, oronage ne ngara dukka nage ngiadona ata-Mu. ⁹² Ne patekki-Mu ba daku bei koge, ku modda ne'e mayilla danagu. ⁹³ Daku denga mage ne patekki-Mu dukki murri wali murri wali, oronage ne ngara dukkana maka Mu pamuorikawa. ⁹⁴ Yauwa dou-Mu ga, tuluga, oronage baku ngaddoyi yidda patekki-Mu. ⁹⁵ Yidda ata a buokala da riemage bada beige pamoddawa, takka ku paddedi yidda patekki-Mu. ⁹⁶ Ku ietayi watteda wali yidda ngara dukkada a dessa, takka paresa-Mu na luarawe. ⁹⁷ Oh, ku bei takkadi patekki-Mu! Ne ngiadowe papangeddagu ne iyya loddo. ⁹⁸ Yidda paresa-Mu da louka pa paddewa mono yidda kamukagu, oronage ne ngara dukkanage bana palolo dengaga. ⁹⁹ Ku louka pede powe bana mangiedawe padde mono ngara dukkada a bowoga, oronage ne patekki-Mu ngiadowe papangeddagu. ¹⁰⁰ Ku louka pa paddepo dugguda ata a kawieda, oronage baku pa atege ne patekki-Mu. ¹⁰¹ Ku pattuya wa'igu walina ne lara a buokala, ga'i kaku padde baku karawawe ne li'i-Mu. ¹⁰² Daku sibitamana walina ne paresa-Mu, oronage ba Yo'u dona a bowoga. ¹⁰³ Na kariedasawe li'i-Mu tubana tulla ngaragu! Na loukawe ne kaniena tubana ngadagu! ¹⁰⁴ Walina yidda patekki-Mu, ku kolege ne padde, ba linna kowe, daku beimani na lara a idda linna takkana. ¹⁰⁵ Ne li'i-Mu ngiadowe a wiegara tubana wa'igu, mono mangiewala tubana laragu. ¹⁰⁶ Ku aura mono ku ponnuwe, ga'i kaku karawawe ne bia nage ukku-Mu. ¹⁰⁷ Ku mayilla takka, pamaddu gage muorikagu, oh MUORI, a linnana ne li'i-Mu. ¹⁰⁸ Deibawe ne patagu gu walina ngada danagu, oh MUORI, mono bowo gadi yidda ukku-Mu. ¹⁰⁹ Na diewagu ienga pakitani ne'e pa uggugu limma danagu, takka daku denga mage patekki-Mu. ¹¹⁰ Yidda ata a buokala da tauwe ne sirru tubagu, takka daku sibitamana walina yidda patekki-Mu. ¹¹¹ Yidda patekki-Mu ngiadoyi potegu dukki murri wali murri wali, ba yidda dona pabei ategu. ¹¹² Ku patidige ategu ga'i kaku diekuge patekki-Mu, murri wali murri wali, dukki kadukkanage. ¹¹³ Daku beimadi ata a pakaduadage atena, takka yauwa ku beige ne patekki-Mu. ¹¹⁴ Yo'u dona padou kabunnigu mono tuodagu, ku mennege ne li'i-Mu. ¹¹⁵ Kakowu walina barragu, ta ata a buokala, ga'i kaku padde baku karawawe ne paresana Marobba Allahgu. ¹¹⁶ Rukkawa a linnana ne li'i-Mu ga'i kaku muorika, mono dou ga'i kaga bada pamakkewa ne'e pamenne danagu, ¹¹⁷ Pakullisaga ga'i ka pamanumarawa, ienga douga baku ietayi yidda paresa-Mu. ¹¹⁸ Mu tullara kuadi ngara dukkada ata a sillira walina ne patekki-mu, oronage ne mapodeta da ngiadowe bada makirri. ¹¹⁹ Ngara dukkada ata a buokala ne ponnu tana Mu letodi mirrika kabu'i perak yi, ba linna kowe ku beidi yidda patekki-Mu. ¹²⁰ Ne kana'agu na kadaddakawe oronage baku madauta-Gu, mono ku madautadi ukku-Mu. ¹²¹ Ku rawige ne a didara mono a bia, dou ga'i kaga barrada yidda ata a pamayillawa. ¹²² Yawe a dessa barrada ata-Mu, dou ga'i kadi yidda ata a padeika wekkina bada pamayillawa. ¹²³ Da dukkana matagu oro manumara-Mu mono oro a bia patekki-Mu. ¹²⁴ Lummu wa'ini na ata-Mu a linnana ne manawara-Mu, mono bowogadi yidda patekki-Mu. ¹²⁵ Yauwa ata-Mu ga, yagage ne padde, ga'i kaku paddege patekki-Mu. ¹²⁶ Ne ngiadowe rapana Muori bana padadige, oronage ne li'i-Mu bada lawiwe. ¹²⁷ Ba linna kowe, ku louka pabeige ne paresa-Mu dugguda ne omma, na loukapowe omma takka. ¹²⁸ Ba linna kowe, ku waige ngara dukkada patekki-Mu, daku beimadi ngara dukkada lara a mapodeta. ¹²⁹ Yidda patekki-Mu da kaladana, ba linna kowe na diewagu na karawawe. ¹³⁰ Yidda li'i-Mu pa weisa da yawe mangiewala, na yawe padde barrada ata a kabanga. ¹³¹ Ku wukkewe ngadagu mono i iyyawe ngaugu, oronage baku ridduyi paresa-Mu. ¹³² Bieliwu barragu mono manawaraga, a linnana yidda ata a manawara guge ngara-Mu. ¹³³ Pamaddu gani pagagu a linnana ne li'i-Mu, mono dou ga'i kadi yidda ngara dukkada a buokala bada marobbaga. ¹³⁴ Keketawa walina ne parawida ata, ga'i kaku padde ba karawayi yidda patekki-Mu. ¹³⁵ Pamangiewalage mata-Mu barrana na ata-Mu, mono bowogadi yidda patekki-Mu. ¹³⁶ Yidda matagu da palaige ne lai we'e, oronage ba dada karawawe ne patekki-Mu. ¹³⁷ Mu bia, oh MUORI, mono yidda ukku-Mu da bia dommo. ¹³⁸ Mu tauyi yidda patekki-Mu ne'e a bia dana mono ne'e ngara dukkada a diekuge. ¹³⁹ Ne kaguola ngaugu na padukkawa, oronage yidda gobbagu bada dengage ne li'i-Mu. ¹⁴⁰ Ne paparasi-Mu na manungawe, mono ata-Mu da beige. ¹⁴¹ Yauwa ku ki'ina mono ku dengo, takka daku denga madi patekki-Mu. ¹⁴² Ne a bia ngiadowe a bia pakita, mono ne li'i-Mu na bia we. ¹⁴³ Ne mayilla na wennawa, takka ne patekki-Mu ngiadowe pabeigu. ¹⁴⁴ Ne patekki-Mu a bia we dukki murri wali murri wali, yaga padde ga'i kaku muorika. ¹⁴⁵ Ku kawula walina ate dana takkagu, walewa, oh Muori! ¹⁴⁶ Ku kawula barra-Mu, tuluga, mono ku diekuge patekki-Mu. ¹⁴⁷ Ku kedde kabu gedde ki'i mono ku kawula baku dengi ba tuluga, ku mennege ne li'i-Mu. ¹⁴⁸ Matagu na kedde ba rapa dawa gedde, ga'i kaku kanannuge ne li'i-Mu. ¹⁴⁹ Renge gage li'igu oro manawara-Mu, pattugage muorikagu, oh Muori, a linnana ukku-Mu. ¹⁵⁰ Yidda a paruoti a mangu kabbuna a buokala, da marro walina patekki-Mu. ¹⁵¹ Takka, You dou marroma, oh Muori, mono ngara dukkada pa patuka-Mu da bia. ¹⁵² Walipoge nettina ku paddege walina patekki-Mu, ne You bou pamaddudu dukki murri wali murri wali. ¹⁵³ Ietawe mayillagu mono tuluga, oronage ba daku dengagudi patekki-Mu. ¹⁵⁴ Tulugadi palakaragu mono uopiwa, pamuorikawa a linnana li'i-Mu. ¹⁵⁵ Ne manumara na marrowe walina barrada ata a buokala, oronage yidda ba dada ngaddowe ne patekki- Mu. ¹⁵⁶ Na kaladage manawara-Mu, oh Muori, pamuorikawa a linna bana ukku-Mu. ¹⁵⁷ Yidda a pa ruoti mono kamukagu da mangieda, takka daku sibitamana walina patekki-Mu. ¹⁵⁸ Ku ietayi yidda a ata a buokala mono dada beimadi, oronage ba dada diekuge ne li'i-Na. ¹⁵⁹ Ietawe, ku bei takkadi yidda patekki-Mu! Pamuorikawa, oh Muori, a linnana manawara-Mu. ¹⁶⁰ Kawukku nage li'i-Mu ngiadowe a bia, mono na ukku-Mu na bia we dukki murri wali murri wali. ¹⁶¹ Yidda ata kalada da bowoga, takka ne ategu na kadaddakawe oro patekki-Mu. ¹⁶² Ku maringa oro li'i-Mu, mirrika ataya a koleda pa parima. ¹⁶³ Daku beimage baku mapodeta, takka ku beige ne li'i-Mu. ¹⁶⁴ Pittu wudda iyya loddo baku deika-Wu, oronage yidda ukku-Mu a bia. ¹⁶⁵ Ne muoli a kaladana da douge yidda ata a beige ne li'i-Mu, da'ima watu pakatullura barrana. ¹⁶⁶ Ku riemage manumara-Mu, oh Muori, mono ku diekuge pa patuka-Mu. ¹⁶⁷ Diewagu na karawawe ne patekki-Mu. Ku bei takkage. ¹⁶⁸ Ku karawayi yidda patekki-Mu mono pa padukki-Mu, oronage ngara dukkada laragu nedi aro-Mu. ¹⁶⁹ Ga'i ne kawulagu kana dukkiwe aro-Mu, oh Muori, yaga padde a linnana ne li'i-Mu. ¹⁷⁰ Ga'i ne padengigu kana dukkiwe barra-Mu, pasellawa a linnana patekki-Mu. ¹⁷¹ Ro'o wiwwigu na deuka-Wu, oronage ba You dona a bowogadi yidda pa patuka-Mu. ¹⁷² Ne lommagu na geilege li'i-Mu, oronage ngara dukkada pa patuka-Mu da bia. ¹⁷³ Ga'i yidda limma-Mu kana tuluga, oronage yauwa baku pedewe patekki-Mu. ¹⁷⁴ Ku ridduwe manumara-Mu, oh Muori, mono patekki-Mu ngiadowe pabeigu. ¹⁷⁵ Ga'i kana muorika na diewagu mono kana deika-Wu, ga'i yidda ukku-Mu kana tuluga. ¹⁷⁶ Ku sillira bana mirrika bebe a dada, ngaddowa oronage ne yauwa ba daku dengagudi pa patukMu.