¹ Pamalangini MUORI oronage bana dessa ate! Ne dessa-Na dukki murri wali murri wali! ² Ga'i yidda Israel ka lidda, 'Manawara-Na dukki murri wali murri wali'. ³ Ga'i ngara dukkada ata a iengana ummana Harun ka lidda, 'Manawara-Na dukki murri wali murri wali!' ⁴ Ga'i yidda ata a madautani MUORI ka lidda, 'Manawara-Na dukki murri wali murri wali!' ⁵ Ne'e mayilla danagu, ku kawula barrana MUORI, MUORI na walewa ne'e padou a luara. ⁶ MUORI na palolo dengagu, daku madautama. Appana parawida ata pi'a barragu? ⁷ MUORI na palolo dengaga, Na tuluga, ku gillakadi yidda ata a idda beiga. ⁸ Na dessa powe ba mawo barrana MUORI, dugguda ba waidi yidda ata pi'a. ⁹ Na dessa powe ba mawo barrana MUORI, dugguda ba waidi yidda ata a marobbage. ¹⁰ Ngara dukkada ata da kaworega, waige ngarana MUORI, ku tekkipa pamate bayi. ¹¹ Da kaworega, ngiado, da kaworega, waige ngarana MUORI, tekkipa pamate bayi. ¹² Da kaworega mirrika kaniena yi, da poddayi mirrika api mapu dana, waige ngarana MUORI, ku tekkipa pamate bayi. ¹³ Da kullisa bada tullaraga dukki baku guggila, takka MUORI na tuluga. ¹⁴ MUORI ngiadona kullisagu mono geilegu, ku wai manumara-Ni. ¹⁵ Ne a punni maringa nage manumara ne'ege karieka danada yidda ata a bia, limma kawanana MUORI na rawige a kaladana! ¹⁶ Limma kawanana MUORI pamadietaya, limma kawanana MUORI na rawige a kaladana. ¹⁷ Daku mate ma, takka ku muorika, mono ku tekkiyi yidda parawi-Mu. ¹⁸ MUORI na parammiwa, takka dana ya mawa ne'e mate dana. ¹⁹ Wukke gage binna kalada a bia, ku liwe baku tama mono ku pamalangini MUORI. ²⁰ Ne ngiadowe binna kaladana MUORI, yidda ata a bia da liwe bada tama. ²¹ Ku pamalangi-Wu oronage Bou walewa, mono ku wai manumara-Gu. ²² Na watu pa tullarada yidda ata a rawina umma na dadi watu penjuru. ²³ Neya walinage barrana Muori, ne a dadi barra matada. ²⁴ Ne ngiadowe loddo parawina MUORI, mai kata maringa ne'e dana. ²⁵ Oh MUORI, tuluga! Oh MUORI, pamannanguma! ²⁶ Maringina na ata a mai waige ngarana MUORI, ma pamaringiwu walina ummana MUORI. ²⁷ Muori ngiadona Marobba Allah, mono Na pamangiewala. Ketteni na patieba tubana loddo kalada waige kalerre, ne'e ponnu kadu kabubbu'. ²⁸ Yo'u dona Marobba Allahgu, mono ku pamalangi-Wu, Yo'u dona Marobba Allahgu, ku pamadieta-Wu! ²⁹ Pamalangini MUORI oronage bana dessa! Ne dessa-Na dukki murri wali murri wali.