¹ Ku manawarani MUORI oronage bana renge gage li'igu, padengigu. ² Oronage, bana patidi di katilluna barragu, bage ku kawula barra-Na ne'e loddogu. ³ Yidda kalerre mate dana da kettega, mono ne mayilla padou ata mate dana na wennawa, nega sillira dana mono mayilla dana. ⁴ Bage, ku kawula nage ngarana MUORI : 'Oh MUORI, ku sabaya, pasellagani diewagu'. ⁵ MUORI na dessa ate mono na didara, Marobba Allahda na pamanawara. ⁶ MUORI na pamawoda, na dakkewe wekkigu, mono Na tuluga. ⁷ Ta diewagu, baliwu kou ngau, oronage na MUORI na pabali guge. ⁸ Oronage, Bou pasella gani diewagu walina mate dana, matagu walina we'e mata dana, wa'igu walina ne'e katullura dana. ⁹ Ku kako ne arona MUORI, ne'e padouda yidda ata a muorika. ¹⁰ Ku waige, lakka ne ba luggu, 'Ku mayilla pongu'. ¹¹ Luggu ne baku ngettana, 'Ngara dukkada ata da mapodeta'. ¹² Pei wa'i gudi baku pabali nage MUORI ne ngara dukkanage dessa-Na barragu? ¹³ Ku keketaya kuoba manumara, mono kawulage ngarana MUORI. ¹⁴ Ku tauge wellina ne paparasigu barrana MUORI, aroda ngara dukkada ata-Na. ¹⁵ Na pawelli aro matana MUORI, mateda yidda ata a bisa. ¹⁶ Oh MUORI, yauwa ata-Mu ga. Yauwa ana daga ata-Mu, ana daga ata-Mu mawinne. Mu pasellagage yidda a kettega. ¹⁷ Ku yawe patagu gu na patieba pamalangi wai barra-Mu, mono ku kawulage ngarana MUORI. ¹⁸ Ku tauge wellinage ne parasigu barrana MUORI, ne'e aroda ngara dukkada ata-Na, ¹⁹ ne'e aro ummana MUORI, ne'e tillu duongami, ta Yerusalem. Deikaya MUORI!