1
Ku manawarani MUORI oronage bana renge gage li'igu, padengigu.
2
Oronage, bana patidi di katilluna barragu, bage ku kawula barra-Na ne'e loddogu.
3
Yidda kalerre mate dana da kettega, mono ne mayilla padou ata mate dana na wennawa, nega sillira dana mono mayilla dana.
4
Bage, ku kawula nage ngarana MUORI : 'Oh MUORI, ku sabaya, pasellagani diewagu'.
5
MUORI na dessa ate mono na didara, Marobba Allahda na pamanawara.
6
MUORI na pamawoda, na dakkewe wekkigu, mono Na tuluga.
7
Ta diewagu, baliwu kou ngau, oronage na MUORI na pabali guge.
8
Oronage, Bou pasella gani diewagu walina mate dana, matagu walina we'e mata dana, wa'igu walina ne'e katullura dana.
9
Ku kako ne arona MUORI, ne'e padouda yidda ata a muorika.
10
Ku waige, lakka ne ba luggu, 'Ku mayilla pongu'.
11
Luggu ne baku ngettana, 'Ngara dukkada ata da mapodeta'.
12
Pei wa'i gudi baku pabali nage MUORI ne ngara dukkanage dessa-Na barragu?
13
Ku keketaya kuoba manumara, mono kawulage ngarana MUORI.
14
Ku tauge wellina ne paparasigu barrana MUORI, aroda ngara dukkada ata-Na.
15
Na pawelli aro matana MUORI, mateda yidda ata a bisa.
16
Oh MUORI, yauwa ata-Mu ga. Yauwa ana daga ata-Mu, ana daga ata-Mu mawinne. Mu pasellagage yidda a kettega.
17
Ku yawe patagu gu na patieba pamalangi wai barra-Mu, mono ku kawulage ngarana MUORI.
18
Ku tauge wellinage ne parasigu barrana MUORI, ne'e aroda ngara dukkada ata-Na,
19
ne'e aro ummana MUORI, ne'e tillu duongami, ta Yerusalem. Deikaya MUORI!