¹ Pamalangini MUORI oronage bana dessa ate, oronage ne manawara-Na dukki murri wali murri wali! ² Ga'i yidda ata pakeketana MUORI ka lidda, pa deke bali-Na walina limma danada kamukana, ³ mono da pakassadi walina ne'e luoda, walina padou oudana mata loddo mono a walina padou tamana mata loddo, a walina utara mono a walina selatan. ⁴ Da manala ne'e maredda tingngi dana, ne'e lara dana a kasika, dada kolemana padou madakada. ⁵ Da karieba mono da maro'u, na diewada na bodda ne'e tou danada. ⁶ Bage, da kawula barrana MUORI ne'e mayilla danada, mono Na pasellayi walina ne mayilla da. ⁷ Na dutuyi ne'e lara dana a lurrusa, ga'i kada dukki ne'e padou madakada. ⁸ Ga'i kada pamalangiya MUORI oronage ne manawara-Na, mono oronage ne tada-Na tubada yidda ana ata pi'a. ⁹ Oronage, bana pa ienudi yidda diewa a maro'u, mono yidda diewa a karieba na ponnu-Yi waige a dessa. ¹⁰ Yidda waddeka iengadi ne'e kapotta dana mono ne'e mawo mate dana, da makette ne'e mayilla dana mono ne'e bessi dana, ¹¹ oronage ba dada waige patekkina Marobba Allah, mono da pamakkewe ne pabowo dadi A Madieta. ¹² Ba linna kowe, Na parajaka dadi ateda, waige mayilla. Da katullura, mono da'ima lakka iyya ata a tuludi. ¹³ Bage, da kawulani MUORI ne'e mayilla danada, mono Na palousodi walina ne mayilla danada. ¹⁴ Na ngiddiyi bada lousona walina kapotta dana mono walina ne mawo mate dana, mono na pietawe ne a kettedi. ¹⁵ Ga'i kada pamalangini MUORI oronage manawara-Na, mono oro ne tada-Na tubada yidda ana ata! ¹⁶ Oronage, bana pubbukayi yidda binna kalada tembaga, mono na patayi yidda palang bessi. ¹⁷ Yidda waddeka da kabangnga oronage ba dada padieku mono da mayilla oro sala da. ¹⁸ Na diewada na madiggiladi ngara dukkada panga'a, mono da barrage ne binna kalada mate dana. ¹⁹ Da kawulani MUORI ne'e mayilla danada, mono Na pasellayi walina ne mayilla danada. ²⁰ Na pangiddige li'i-Na mono Na palengayi, mono Na pasellayi walina kaliena dana. ²¹ Ga'i kada pamalangiya MUORI oronage manawara-Na, mono oronage ne tada-Na tubada ana ata. ²² Ga'i kada yawe patagu pamalangi waida, mono tekkiwe ne parawi-Na waige maringa! ²³ Yidda waddeka da burru bonnu dana waige tiena, mono da rawina papayilli ne'e bonnu dana a luara. ²⁴ Da ietawe ne parawi-Na MUORI, tada-Na ne'e dana. ²⁵ Na panewe maka na keddewe paringngi kapote, a pamadietawe ne ngallungu. ²⁶ Da penne togo langita, da burru bali ne'e bonnu kalada dana, na diewada na mubbuka oro ne a dadi. ²⁷ Da tidi mono da mawwula mirrika ata a ienuyi a kiddora, mono ngara dukkada padde da na dukkage. ²⁸ Bage, da kawulani MUORI ne'e mayilla danada, mono Na pasellayi walina ne mayilla danada. ²⁹ Na pakamattakaya na kapote, mono ne ngallungu na kadennawe. ³⁰ Bage, da maringa oronage bana kamattakawe, mono Na dutuyi ne'e maringa danada. ³¹ Ga'i kada pamalangiya MUORI oronage ne manawara-Na, mono oronage ne tada-Na barrada ana ata. ³² Ga'i kada pamadieta-Ni ne bada pakassana, mono kada deika-Ya ne'e padou madi'ida yidda rato. ³³ Marobba Allah na kabaliyi yidda loko bada dadi maredda tingngi, yidda mata we'e bada dadi tana a marokota, ³⁴ ne tana a dadi na dadiwe maredda a messina, oronage buokalada yidda ata a iengana ne'eya. ³⁵ Na kabaliwe ne maredda tingngi bana dadiwe tomma we'e, mono tana mara bana dadiwe mata we'e. ³⁶ Na ga'idi yidda ata a karieba, mono na pakeddewe ne padou bana wai padou madakage. ³⁷ Da sobbaradi yidda uomada, mono da taddoge ne uoma anggura, mono mangu wuage. ³⁸ Na louka kia bana pamaringiyi, dana ga'i madi yidda rangada ba dana mangiedayi. ³⁹ Takka, dada ma tabama mono da runnu, oro mayillada. ⁴⁰ Na yawe ne pamakke dengan barrada yidda ata a marobbage, mono na pamanaladi ne'e maredda tingngi dana a da'i larana. ⁴¹ Takka, Na keketayi yidda ata a dengo walina ne mayilla dana, mono yidda du ole dadina na pa dadidi mirrika bebeyi a pabubunguna. ⁴² Na ata a lurrusa atena na ietawe mono na maringa, takka ngara dukkada a buokala da tuodiwe ngadada. ⁴³ Garra a pade, ga'i kana pa atege neya, mono kana paddege manawarana MUORI.