Li'i tubana bana kedde bali Yesu ¹ Mono, ne loddo Sabat ba lewat bage, Maria Magdalena, Maria innana Yakobus, mono Salome, da wo'i rempah - rempah ga'i kada kako mono da tauni minya Yesu. ² Kabu gedde ki'i, ne loddo a ullu ne miggu, ne bana lousona mata loddo, da mai nee barra uodi. ³ Lidda iyya mono waddeka, "Garra a tullarani na watu walina ne'e barra binna tama?" ⁴ Takka, ne bana gillakage dieta, da ietaya na watu a kaladana da tullara bani. ⁵ Mono, ne bada tama nee uodi dana, da ietaya na iyya ata a waina kalabbe kaka neni a madi'i nee tuba kawanada, mono yidda da katattaka. ⁶ Bage, ngia linna barrada yidda, "Dei katattaka kana, yemmi ngaddomini Yesu a walina Nazaret pa salibda. Ngia na kedde bali bana. Ngia da'imani ni'iya. Ietawe ne padou bada pabeika-Ya. ⁷ Takka, kakomi, tekki dage barrada murita-Na mono barrana Petrus Ngia bana ullu nee Galilea. Neeya, yemmi mi tabboka-Ya, a linnana pa tekki banagumi barrami". ⁸ Bage, yidda da lousona mono da malle walina barra uodi oronage bada kadaddaka mono da takjub, mono da'ima patekkida lakka lai garra oronage bada madauta. Mono, ngara dukkada pa pareta dadi ga'i kada tekki dage barrana Petrus mono olena, da pakatodduge bada tekkiwe. Bage, Yesu dou a patukadi walina Timur dukki Barat, ga'i ka tekkiwe li'i a kudus mono a idda butta tubana manumara a idda kadukkana. Amin. Yesu na paouda wekkina barrada murita-Na. ⁹ Na Yesu bada kedde bali kabu gedde ki'i ne loddo ka iyyana nee miggu, Ngia na paouda wekkina barrana Maria Magdalena pa wudana Yesu pittu muori tana walina barrana. ¹⁰ Bage, na kako mono na tekki dage barrada yidda ata a palolo dengani Yesu, tammura yidda ba nedi a milla atena mono da ngi'o. ¹¹ Mono, ne bada rengewe na Yesu bana muorika bali mono da ieta baya, yidda dada waimage. ¹² Ne bana dadiwe neya, Yesu na paouda wekkina waige bentuk a ieka barrada duada ata a nena lara dana bada arona ne wanno dana. ¹³ Bage, da bali mono da tekki dage barrada waddeka, takka yidda waddeka dada waimadi. Yesu na panewe barrada murita-Na. ¹⁴ Bage, na patingo wekki douna barrada kabullu iyya murita-Na ne ba nedi a madi'i bada nga'a mono Ngia na teguryi oronage ba dada waige mono katto ateda. Oronage, yidda dada waimadi yidda ata a ieta-Ya ne bana kedde bali. ¹⁵ Mono, linna barrada yidda, "Kakomi nee ngara dukkanage ponnu tana mono padukkige Injil barrada ngara dukkada ciptaan. ¹⁶ Ba garrako a waige mono pa pariwo bada da manumara, takka garrako a idda waige da ukkuni. ¹⁷ Mono, ne tada a diekudi yidda a waige : Waige ngara-Gu yidda da wuda roh a buokala, yidda da panewe waina panewe a bo'una; ¹⁸ yidda da norrona nippe waidi limmada; mono yidda da ienu racun pamate denga, takka dada celaka ma; yidda da tauyi limmada ponnu katuowada ata a karodduka, mono yidda ata da lengana". Yesu na makeketa nee Surga dana. ¹⁹ Bage, ne balinna Yesu barrada, na makeketa nee Surga dana mono na madi'i tuba kawana-Na Allah. ²⁰ Bage, da kako mono da khotbah lakka gie dou, na Yesu neni a payilli dengadi mono na teguhkan ge li'i-Na a liwe yidda tada a wa'ina.