¹ waini iyya ata a walina letena efraim a ngarana mikha. ² linnani innana,''rata ngasu ritti perak pa deke barramu,dukki kutuka bou tekkiyi barra katillugu,karurunage ne ritti waige barragu.yauwa a dekewe.''na wale innana,''na manawwaragu Muori.'' ³ bage,na pabalinadi innana yidda ritti rata ngasu peraka.bage,linna innana,''ku beige pakudusadi yidda ritti tubana Muori,ku yanadi anagu,gaimu kanna rawidi patung pa buala monno patung tuangan.neeya ku pabaligu yidda ritti barramu.'' ⁴ lokko balinnawe,yidda ritti perak na pabalidi lai innana.bage,bage na mawinne na deke duada ngasu peraku monno yayi lai tukang peraku,a rawina patung pa buala monno patung tuangan.bage,bage na tauya ummana mikha. ⁵ na mikha waige kuil pa dou nobbana.na rawina kalabbe efod monno terafim,bage na tabisaya iyya ana kabanina banna dadi rato. ⁶ ettipona daima tokko ne israel,ba makka ngaradukkada ata da rawige a bennara ne pa iata douda. ⁷ waini iyya bua mane a walina betlehem.ata lewiya a madaka nee bali,ne lai kabisu yehuda. ⁸ na kako na ata wali kota betlehem yehuda,banna madaka giage padou pakolena.dukki banna kako,na dukkige letena efraim,a arona ummana mikha. ⁹ mikha na tuaya,''gia wali ngiamu?''na waleya na ata,''ata lewiwa,waligu betlehem yehuda.kako guge bakku madaka giadou padou kolegu padou.'' ¹⁰ mikha linnani,''madaka barragu monno dadi ama monno rato tubagu.tiap iyya dou ku yagu kabullu ritti peraka,duguda iyya pasang kalabbe monno pangaa.''bage,na ata lewi na diakuni. ¹¹ na ata lewi na nau banna madaka oleni.na bua mane na dadi a linnana ana douna. ¹² limmana mikha na tabisaya na ata lewi,monno na bua mane na dadi rato,na madaka ummana mikha. ¹³ linna mikha,''neeya,ku paddege na Muori na rawige a dessa barragu,oronage waini ata lewi a dadi ratogu.''