¹ Hei tuang-tuang: Matulid de adil bo jujur a maya atanu imunen, nde kamotahula hahi bana tuang a doong lenas. ² Ate-atena ma sombayang bo asuanga i oho, ma tenga-tengamange sa salalu marayow. ³ Iwa sombayangange hamitahula, saniboho buhaan Ningumêlêd bonang tanu asia miaho i wasahai i hamitahula. Saniboho hamitahula do’na mohodait asia rusu i Kristus awahem ahu besuang a penjera. ⁴ Kawalian miaho do’na iwawa taruku, asia niaho ni humiit. ⁵ Menonow karua mawuli-wuling kamaulengan a manga tou am beta oho, osa pakenoho noras sinadia. ⁶ Da mejin pahasa kodaitnu mawuli-wuling i amaulengan, hii tobokang, saniboho kalahanu, kelembisa how ma sowad i manga tou. ⁷ Pahasa riwayêtku i huahu be homotahula besi Tikhikus, pog i hita mauleng, sosiu moêman bo manga karua i Ningumêlêd. ⁸ Bewa siuhu sia be homotahula saniboho kamotahula mahailah i riwayêt hamitahula bo serona sia mibor inate homotahula. ⁹ I wasiuhu sia makarua bo si Onisemus, pog i hita moeman bo behales, esa tou andedet hamotahula. Silatahula kumua moho be homotahula asia niaho mamoali biai. ¹⁰ Wa’i siri’i Aristarkus tanu kamutahula karuahu a penjara bo si Markus, pawataan i Barnabas. Be sisia kamotahula tumirima koyow; tiriman nde sia, sasia moay be homotahula. ¹¹ Bo besi Tialow, bewengalan Yustus, bati silatelu a pahasa iboho sinunat maindo karuhu matawoy tanu a kaholanoan Ningumêlêd; pahasa silatahula maindo pangiboran beahu. ¹² Siri i Epafras tanu behomotahula; Sisia esa tow andedet i homotahula sosiu i Tialow; lê’têh ma rongigon bo ma sombayang tanu homotahula, saniboho homotahula me’tê kele, tou talê tumou bo moemanio a pahasa kahabogen i Ningumêlêd. ¹³ Nde ahu do’na mawasairi kelembisa sia, awahem imahawe’e-we’e tanu kamotahula bo tanu silatahula a Laodekia bo Hierapolis. ¹⁴ Siri behow behe i tabib Lukas imbehales bo behe i Demas. ¹⁵ Ihuamio siri i hamitahula a manga pog a Laodikia; bo hahi Nimfa bo jamaat asuang ambalena. ¹⁶ Sa surat i yai binacam andedet i homotahula, damejin nde, saniboho bean kahi bacan a jamaat Laodikia; bo saniboho surat tanu a Laodikia bacan kahi behow. ¹⁷ Bo i wongita u moho besi Arkhipus; Pilahanio, saniboho pasalian tinirimahu besi a Ningumêlêd do’na i lapaku i nate enow. ¹⁸ Wa’i siri’ku; Paulus, jiri’iai betulisku mio i kamahu, imunen nio asia niaho misumogot iyahu; be’les sononoy wakarua i homotahula.