¹ Asaangen i Ningumeled bo Kristus Yesus, mahi matepu a totumu menonow, bo totumu imatem, wai ihoyowhu uli-uliten behow, miit kelembisa sia imawaturu bo miit kaholanoan-Na. ² Iwahasereb Kukua, sadianem mauleng bo ahi mauleng anendona, asia niaho sea, paperowen bo maturu karengan kaêledan bo katoturuan. ³ Awahem mahi-hahi anendona, tow alam maibog maya itoturu kanyamanan, sumata silatahula hahi sumesen mangaguru kumiit akahabogena tanu mawawede kahabogen i talingana. ⁴ Silatahula hahi sumeleng talingana ahii maibog tumanga boho kaulitan bo buhaana tanu dongeng. ⁵ Sumata imbahuten natenu apahasa behamoali, êluden mapongigon, tulisan tawoien’ mapawa’sêreb kukua bo lêkêwen tawoien apaselewiranu ! ⁶ Awahem batangaiku, dahaku be walaim beusah kele powasil bo a susut i pateanku. ⁷ Siahu mawamorusêm apabertandingan mauleng, ahu behoamat kahadan karis bo beiahaanêm êmanhu kawahemaiku. ⁸ Yaitalewe sinadiam tanu siahu bêtapêl a’ kohong kaulitan mahi behomba beahu i Tuhan matepu ulit, anendo-Na, sumata’ ahii bati beahu, sata’ kahi apahasa tow mahatênê anahim-Na. ⁹ Dumameji mongikaya ibokom tilaho mahi beahu. ¹⁰ Awahem Demas mebilesem lebe mahales imbaoitoba iai bo belingoman ahu. Sia imatangem moho a Tesalonika. Kreskes imohom a Galatia bo Titus imohoma Dalmatia. ¹¹ Bati Lukas i sumondo be ahu. Mohoijon Markus bo peangenai Sia biai, apaan paselewirana perlu sia beahu. ¹² Tikhikus besiuhu moho a Efesus. ¹³ Osahow moai meang ngio juba ambepakumio a Troas ambalēi Karpus bo hahi mangahitapku, katudan waaho perkamen. ¹⁴ Aleksander tapatulid bēsi waaho, tadoo tinulidna tapia bēahu, Ningumēled mahi mēhēwalas mi’it tatawoina. ¹⁵ Mero-merot how hahi mahatuh asaangana, awahem sia ni’it lumawah a bēwaturu hita. ¹⁶ Anendo patugasanku amuna ahem esa tow ihumarua iahu, pahasa ilumolahai beahu merotange pahasa waaho ahii wawatanggong bēsilatahula, ¹⁷ sumata Ningumēled e nimapiwid bēahu, bo mēhē korowotan bēahu, boho apakaruaanku kukua ihasereb diitēna teka pahasa tou ahi’i Yahudi tangoana. Kēlēwaaho ahu behalepot ambaba singa. ¹⁸ Bo Ningumēled hahi mawalepot iahu a nesa tawoien ahi’i mauleng, sisia mawalowid iahu akah ahu i hasuang a’tampaNa lenas. Bēsia akalooran kaeto-eto! Ulit. ¹⁹ Siri bēsi Priska bo Akwila bo a pamaleanan Onesiforus. ²⁰ Erastus isumondo a Korintus bo Trofimus bepa’kumio a sakum pahadosan a Miletus. ²¹ Damejinu kow moai atalewe te’po ikolotin. Siri be Ebulus bo Pudes bo Linus bo Klaudia bo pahasa morowog. ²² Ningumēled mahalas tutu’nu. Beles behombaNa mahalas homotahula!