¹ Awa bana nêsatow a tutud i homotahula, ê sa mahisea’an bo tow walina mangilah ka’adilan a manga totumu’ ê tahi’i ulit, bo ahi’i a mangatotumu’ lênas? ² ahi’i homotahula mahailah, mangatotumu’ lênas ê misa’ i mbaoitoba? Bo sa pangisa’an i mbaoitoba a kama i homotahula, awa ahi’i homotahula mahabay tanu murus i mangawêrkara ê tahi’i ulit? ³ Awa homotahula ahi’i mahailah, awahêm kita mainjo misa’ i mangahiong? Yanasa nambom kahi mangawêrkara naram a pênonowan i hita susud i nêndo. ⁴ Mande helewa’aho, sa homotahula musti murus i mangawerkara naram, komotahula manaro i nurusan wa’aho be silatahula ê tahi’i iwatebe a njama’at? ⁵ Êwa’i ihuahu tanu mawasokia’ i homotahula. Awa alahêm êsatow a tutud i homotahula ê mahasisilih, ê ndo’na murus i mangawerkara i mangawognga? ⁶ Awabana nêsawog mapangilah ka’adilan tanu pog balina, bo ihuami’ a mangatotumu ê tahi’i maheman? ⁷ Bati’ pe’ mange perkara atutud i homotahula a nêsatow bo a mbalina imamoalim kinasesean i homotahula. Nde’aho homotahula hi’i maibog imahigon i tahu’i adil? Ndeaho homotahula maibog lebe iwawarugi? ⁸ Sata’ komotahulamio’ matulid i talahêm ka’adilan bo komotahula mio’ mawalimai karugian, bo ê wa’aho patulidên i homotahula a mangawogngu. ⁹ Suma ahi’i homotahula mahilah, awahêm mangatotumu’ ê tahi’i adil ahi’i mahaere weteng a kaholano’an i Ningumêlêd? Na’am mombureng. Totumu’ tapasiri’ i mberhala, totumu’ mêdêtuhan, pêsêl, totumu’ tapatekol, ¹⁰ tatahow, totumu’ panesen, tapololango, tapêdoros bo tapomandei ahii’i mahaere weteng a suang i kaholano’an i Ningumêlêd. ¹¹ Bo latahula tow a tutud i homotahula kelewa’ ahom natalewe’. Sata’ komotahula imehem i mbatangan i homotahula bewawa-wayo, komotahula bewawa-ênasêm, komotahula beulitanêm a sakum ngalan i Ngêlêdtow si Yesus Kristus bo a sakum Tutuh i Ningumêlêd i hita. ¹² Asiamange ahi’i indis tanu si ahu, sata’ ahi’i wahasa ê mbana toro. Asiamange ahêm nindis tanu siahu, sata’ ahu ahi’i mayai imbatanganku pangatan i nasiamange. ¹³ Kakanên awahêm tanu tian bo tian tanu kakanên : sata wa’aho ndua iwawawotutus i Ningumêlêd sata’ batangan ahi’i tanu pêdêtuhan, sumata’ tanu si Ngêlêdtow, bo si Ngêlêdtow tanu batangan. ¹⁴ Ningumêlêd, ê maleng iwawatow si Ngêlêdtow, ê maleng mawatow i hita hahi i nimbahutNa. ¹⁵ Awa ahi’i kailahan i homotahula, awahêm batanganu anggota i Kristus? Awa indonku nanggota i Kristus tanu mehe i sia a pêdêtuhan? Mande mahasa ahi’i! ¹⁶ suma awa ahi’i homotahula mahailah, awahêm sisei ê mawasogot i mbatangana a mbene sundal, mapawaêsa i mbatangan bo si sia? Nde kelewa’im behua i nas : silandua mamoali kêtêd êsa”. ¹⁷ Sata’ sisei mawasakêd i mbatangan be si Ngêlêdtow, mamoali êsa tutuh bo si Sia. ¹⁸ Irekangange mbatanganu a pêdêtuhan ! Manga orow balina ê tinulid i totumu’, bahamoali a luar i mbatangan. Sata’ totumu’ ê matulid pêdêtuhan maorow sakum batangan mio’. ¹⁹ Suma awa ahi’i homotahula mahailah, awahêm batanganu bale i Tutuh Lênas ê mututun be how, Tutuh Lênas ê kinaerean i homotahula be Ningumêlêd, bo awahêm komotahula ahi’i punya i homotahula mio? ²⁰ Apa-apa’an komotahula tinêlêsanêm bi baera imalêkêwêm: Kawalian i aho ponunganêm Ningumêlêd i mbatanganu!