¹ Pakighenangola nisea rio sea tu’utuk wia se pemerenta wo se tou-tou makakuasa, lale’ wo timiro’ kaa laa metetuanala susur em papa’ayangen e le’os. ² Te’a mouw sea masero’, te’a mouw sea me’ising, satorona nisea se reiy’ maena-ena’ ramah wo marinda-rinda wia em baya ne tou. ³ Karengan eng ketareanna nikita kangkasi kita matou-tou witu eng kewantian: reiy’ lale’, seip, minamuali hamba e mineghe-ghioan nafsu wo eng kepa’aran, matou-tou witu eng kalewo’an wo eng kadangkean, lewo’, mereri’irisan. ⁴ Ta’an katoroan pakaloo’o-loo’ola eng kamura’an ni Empung, Lumelawir ta, wo e nupus-Na wia se tou, ⁵ witu e nedo ni’itu Nisia si limawirola nikita, reiy’ karengan em pasiwo-siwon le’os en tinuana ta mola, ta’an eng karengan e rahmat-Na kaa e linele’an eng kinatouan sumeup wo kaa em bineruan em pina’ayangla e Roh Kudus, ⁶ e neiy mouw i era-Nala wia nikita kaa si Yesus Kristus, Lumelawir ta, ⁷ rio kita, tanume sitou neiy i ulitla kaa e nupus karunia-Na, kita mekehak maka’ato em patou-touan kekal, minatoroan ampit em paarapen ta. ⁸ E lelila’an i yi’i e nulit wo niaku ku pa’ar rio nikoo ampit e neman mente’la nyi’a, rio nisea nu ma’emanouw wia si Empung se makauli-ulit me’inakut matuanala em pepa’ayangen e le’os. Ni’itu mouw e le’os wo makaka’ara’an i wee sitou. ⁹ Ta’an liseiyenola eng kapoongan penero-neron wo e we’engel, eng kapoongan en silsilah, em pesali’isi’an wo em pe’isingan tanume e nukum Taurat, karengan em baya ni’itu e reiy’ si ka’ara’an wo reiy’ sipenoron waya. ¹⁰ Siesa tou bidat si mekasa maka rua mouw nge’enge’annula, satorona koo ma’akatla. ¹¹ Kete’uannu kaa sitou tanu ni’itu si uli-ulit seip wo ampit en dosana e minukum en touna nuesa. ¹² Makarengan nisia nu neiyku mouw i papa’ali si Artemas ka’apa si Tikhikus wia nikoo, me’inakutouw meiy wia niaku wia Nikopolis, karengan em pinutusku mola kaa laa mena’ witu en tampa i ti’i eng keurean e noras eng ghe’egher i yi’i. ¹³ Tulungenouw maka le’o-le’os si Zenas, si ahli Taurat i ti’i, wo si Apolos, witu em pakela-kelangan nea, rio sea reiy’ kakurangan wo’o sapa. ¹⁴ Wo i waya mola se tou-tou ta kangkasi se ma’ajar matuanala em pepa’ayangen e le’os rio toro mewewutala em pemandungen em patou-touan eng kapoongna, rio em patou-touan nea te’a o reiy’ mee wu’ana. ¹⁵ Tabea waki em baya ne tou mewali-wali niaku wia nyi’i wo i pa’ayo mola en tabeaku wia nisea se meupusla nikeiy witu e iman. E nupus karunia e rumapitla nikouw nu waya!