1
Ta’an nikoo, i abarola sapa e minatoroan ampit en teturu’ segaya’:
2
Tuama tu’a satorona si matou-tou rinda, si paormaten, sama’, segaya’ witu e iman, witu e nupus wo witu eng katenteman.
3
Tuanakan kangkasi se wewene-wewene tu’a, satorona nisea se matou-tou tanume se tou-tou meraghes, te’a masero’, te’a mamuali hamba e nanggor, ta’an sigha’ maturu’la eng kapualitan-kapualitan e le’os
4
wo ampit en tuana en dumidik se wewene-wewene muda meupusla si tu’atuama wo se oki-oki’na,
5
matou-tou sama’ wo suci, rajing matu’utul e rumah tanggana, le’os ate wo lale’ wia si tu’atuamana, rio e Nuwu’ ni Empung te’a ojaten ne tou.
6
Tuanakan kangkasi se tou-tou muda; nge’enge’anola sea rio sea kumuasala en tou witu e reiy’ sa mina’asa kapualitan
7
wo siwonola en toumu nuesa e nesa pa’asa-asaran witu masiwo le’os. Satorona koo jujur wo kasa makauli-ulit witu en teturu’mu.
8
Segaya’ wo reiy’ si woang witu em paabarannu i ka’ayo se kesaru se mineirang, karengan reiy’la eng kapualitan-kapualitan wuruk en toro i rangket neala tanume nikita.
9
Hamba-hamba satorona se lale’ wia si tuangna witu e reiy’ sa mina’asa kapualitan wo mekepa’aren wia nisea, te’a mapero,
10
te’a mawiles, ta’an satorona reiy’ maena-ena’ tulus wo lale’, rio ampit en tuana nisea witu e reiy’ sa mina’asa kapualitan se malo’orla en teturu’ ni Empung, si Lumelawir ta.
11
Karengan e nupus karunia ni Empung e limawirola em baya se tou em pinakaloo’o-loo’o mola.
12
Nisia si dimidik nikita rio kita tumele’ula eng kefasikan wo eng kepa’aran-kepa’aran eng kaoatan wo rio kita matou-tou sama’, adil wo meraghes wia eng kaoatan en teakan i yi’i
13
ampit mengena-ngena’la em pelelekepan em paarapen ta e wuta e naruiy wo em pinapaloo’o-loo’oan eng kamulia’an ni Empung si Kasawangko’ wo si Lumelawir ta Yesus Kristus,
14
si simarakanola en tou-Na i wee nikita kaa laa mewewayala nikita witu e reiy’ sa mina’asa kalewo’an wo kaa laa mekekudusla I wee en tou-Na se esa umat, kapunya’an-Na nuesa, se rajing masiwo e le’os.
15
I abarola em baya nyi’a i ti’i, nge’enge’anola wo emanenola sitou ampit e reiy’ sa mina’asa kawibawa’annu.Te’a mouw wawean tou si mapokeiyla koo kumeng.