Kalebean ne tou Yahudi wo eng kelale’an ni Empung ¹ Sa tuana, sapa ku’a re’en eng kalebean ne tou Yahudi wo sapa ku’a re’en em penoronna en sunat? ² Kelaker kasa, wo witu eng gorem e reiy’ sa mina’asa kapualitan. Ketare-tare: karengan e wia nisea mouw neiy i emanla e nuwu’ ni Empung. ³ Jadi kumura, sa witu nelet nea wawean si reiy’ lale’, mete’u ku’a re’en eng kareiy’lale’an i ti’i e mo’opolela eng kelale’an ni Empung? ⁴ Ma’an mekasa reiy’! Eng kapurikitna: Empung nyi’a mouw si ulit, wo em baya ne tou se menenowo, tanu wawean neiy i kepatik: “Rio Koo kasa pakaloo’o-loo’ola ulit witu e reiy’ sa mina’asa nuwu’-Mu, wo muntung, sa Koo akimen.” ⁵ Ta’an sa eng kareiy’ulitan ta e matudu’la eng kaulitan ni Empung, sapa ku’a re’en e laa i lila’ ta? Reiy’ adil ku’a re’en si Empung - niaku ku meilala’ tanume sitou – sa Sia mapa’atola e nupi-Na? ⁶ Ma’an mekasa reiy’! Sa andeiyna tuana, kumura ku’a re’en si Empung o toro ma’akimla eng kaoatan? ⁷ Ta’an sa eng kaulitan ni Empung kaa en towoku makalokonola i wee eng kalo’oran-Na, ka’a ku paakimene’la kasi tanume sitou berdosa? ⁸ Reiy’ ku’a e reiy’ ulit en sero’an ni tou si limila’la, kaa nikita ta limila’: “Meiy mouw ta sumiwo e lewo’, rio e le’os lumentuti wia nyi’a.” Sitou tanu ni’itu si’i kewaarna mouw maka’ato ukuman. ⁹ Jadi kumura? Sapa ku’a re’en kita makapunyala kalebean ta’an se tou walina? Eng kasa reiy’. Karengan waki atas se neiy mouw i ture ta le’os se tou Yahudi ka’apa tu’u se tou Yunani, kaa nisea nu waya se witu e wawa’ eng kuasa dosa, ¹⁰ tanu neiy i kepatik: “Reiy’la si ulit, siesa tou tu’u reiy’. ¹¹ Reiy’la siesa tou tu’u si meke akal budi, reiy’la siesa tou tu’u si menero si Empung ¹² Em baya ne tou se simelewengouw, nisea nu waya se reiy’ sika’ara’an, reiy’la si masiwo le’os, siesa tou tu’u reiy’. ¹³ Tikoo nea tanu eng kubur ngimanga, lila’ nea mengelu-ngelur, en sumping nea megandong racung. ¹⁴ Suma nea minawuta ampit en tiwa’ kutok, ¹⁵ ne’a nea repet kaa laa metetoa’la raa’. ¹⁶ Karewa’an wo eng kapunengan neiy i tele’u neala witu e lalan nea, ¹⁷ wo e lalan dame e reiy’ kasine’uan nea; ¹⁸ pedaman meide’ wia si Empung reiy’la witu sitou i ti’i.” ¹⁹ Ta’an eng kete’uan ta, kaa e reiy’ sa mina’asa wo’o sapa neiy i kepatik witu eng Kaol Taurat ni’i pelelaa wia nisea nu matou-tou witu em bawa’ e nukum Taurat, rio tu kawusengan susur en suma wo e minapekasa eng kaoatan lumenta’ witu e wawa’ nukuman ni Empung. ²⁰ Karengan reiy’ siesa tou tu’u si mete’u i ulitla witu en sinaru ni Empung karengan si matuanala e nukum Taurat, karengan awes tare karengan e nukum Taurat sitou o sumine’u en dosa. ²¹ Ta’an en teakan, reiy’ ampit e nukum Taurat eng kaulitan ni Empung neiy mouw i papaloo’o-loo’la tanu neiy i sairila witu eng Kaol Taurat wo eng Kaol-kaol ne nabi, ²² nyi’a i ti’i eng kaulitan ni Empung karengan e iman wia si Yesus Kristus i wee em baya se tou ma’eman. ²³ Karengan reiy’la si pemange’anen. Karengan em baya ne tou se simiwo mouw en dosa wo se kinalionganouw eng kalo’oran ni Empung, ²⁴ wo kaa e nupus karunia se neiy mouw i ulitla ampit neiy i taber karengan en tetubuusan witu si Kristus Yesus. ²⁵ Kristus Yesus si neiy mouw i tantula ni Empung mamuali lalan pedamean karengan e iman, witu e raa’-Na. Kapualitan i yi’i en siniwo-Na kaa laa mapaloo’ola eng ka’adilan-Na, karengan Nisia si minaya mola en dosa-dosa minamuali mola eng ketareanna witu e masa eng kesabaran-Na ²⁶ Maksud-Na nyi’a mouw kaa laa mapaloo’ola eng ka’adilan-Na wia e masa i yi’i, rio pakaloo’o-loo’ola, kaa Nisia si ulit wo kangkasi mulitla tou se ma’eman wia si Yesus. ²⁷ Sa tuana, sapa ku’a re’en en to’otolanna sa laa sumawa’? Reiy’la! Tumo’otolela witu en sapa? Tumo’otolla witu em pasiwo-siwon? Reiy’, ta’an i te ni’i to’otolela witu e iman! ²⁸ Karengan nikeiy keiy ma’eman, kaa sitou si neiy i ulitla kaa e iman, wo reiy’ kaa nisia nu matuanala e nukum Taurat. ²⁹ Ka’apa wawean ku’a re’en si Empung si Empung i te ne tou Yahudi? Reiy’ ku’a re’en Nisia kangkasi nyi’a mouw si Empung ne bangsa-bangsa walina! ³⁰ Em penoronna, sa wawean esa Empung, si laa mulitla le’os se tou-tou makasunat karengan e iman, ma’anouw tu’u se tou-tou reiy’ maka sunat kangkasi karengan e iman. ³¹ Sa tuana, sapa ku’a keiy mino’opolela e nukum Taurat karengan e iman? Eng kasa reiy’! Kapurikitna, nikeiy keiy time’etepla nyi’a.