E nukuman ni Empung wia em baya ne tou ¹ Kaa ni’itu, hei tou, seiy i te tu’u kangkasi koo, si maakimla se tou walina, nikoo nuesa koo reiy’ i kewaya witu en selok. Karengan, witu maakimla se tou walina nikoo koo maakimla en toumu nuesa, karengan nikoo si maakimla se tou walina, koo masiwola eng kapualitan-kapualitan masuat. ² Ta’an nikita ta mete’u, kaa e nukuman ni Empung lumaa eng kenaramen jujur wia nisea nu masiwola en tuana. ³ Wo nikoo, hei tou, nikoo si minakimla nisea nu simiwo en tuana, kasuatan nikoo nuesa koo timuanala nyi’a kangkasi, sapa ku’a re’en koo mapokeiyla, kaa nikoo koo laa i kaliseiy witu e nukuman ni Empung? ⁴ Pa’ar ku’a re’en koo mapokeiyla penes eng kakaya’an kamura’an-Na, eng kasabaran-Na wo eng kapelasan e nate-Na? Reiy’ ku’a re’en kete’uannu, kaa e maksud kamura’an ni Empung nyi’a mouw e laa rumawir nikoo witu em pakedo’an? ⁵ Ta’an karengan eng kaketean natemu e reiy’ pa’ar makedo’, nikoo koo metawun e nupi’ witu en toumu nuesa witu nendo e nedo wisa e nupi wo e nukuman ni Empung adil e laa i papaloo’-loo’ola. ⁶ Nisia si laa sumuli’la susur tou i ki’it em pasiwo-siwonna, ⁷ nyi’a i ti’i em patou-touan kekal wia nisea se ampit en tentem masiwo le’os, masero eng kalo’oran, eng kaormatan wo reiy’ eng kapunengan, ⁸ ta’an e nupi wo e we’eteng wia nisea se masero em pe’uku-ukumen nuesa, se reiy’ lale’ witu eng kaulitan, ta’an i te se lale’ witu eng kabengisan. ⁹ Peme’itan wo eng kase’esekan e laa tumoro susur tou si matou-tou masiwo lewo’, ketare-tare se tou Yahudi wo kangkasi se tou Yunani, ¹⁰ Ta’an eng kalo’oran, kaormatan wo en dame sejahtera e laa ka’atoan em baya ne tou se masiwo le’os, ketare-tare se tou Yahudi, wo kangkasi se tou Yunani. ¹¹ Karengan si Empung si reiy’ mapele-peleng. ¹² Karengan em baya se tou berdosa reiy’ ampit e nukum Taurat se laa mapuneng reiy’ kaa e nukum Taurat; wo em baya ne tou berdosa se witu wawa’ e nukumTaurat se laa akimela ni ukum Taurat. ¹³ Karengan reiy’ mouw sitou liminga e nukum Taurat si ulit witu en sinaru ni Empung, ta’an sitou matuanala e nukum Tauratouw si laa i ulitla. ¹⁴ Sakawisa se bangsa-bangsa walina se reiy’ makapunyala ukum Taurat karengan se’ese’an en tou nuesa o matuanala sapa em pengiween e nukum Taurat, takar, ma’anouw tu’u se reiy’ makapunya ukum Taurat, nisea se minamuali ukum Taurat i wee en tou nea nuesa. ¹⁵ Karengan ampit e ni’itu nisea se timudu’la, kaa em pumpun e nukum Taurat neiy i kepatik witu nate nea wo en suara nate nea eng kimi’it simairi wo eng genang nea meteturean ka’apa mererapitan. ¹⁶ Eng kapualitan i ti’i e laa kaloo’an witu e nendo, sakawisa si Empung, minatoroan ampit e Injil neiyku i abarla, si laa ma’akimla e reiy’ sa mina’asa wo’o sapa neiy i kakirong witu e nate ni tou, kaa ni Kristus Yesus. ¹⁷ Ta’an, sa kouw matotor en toumu tou Yahudi wo tumebe witu nukum Taurat, mesawa’ witu si Empung, ¹⁸ wo mete’ula eng kepa’aran-Na, wo eng karengan neiy i turu’ witu e nukum Taurat, o toro mete’u wisa e le’os wo wisa e reiy’, ¹⁹ wo ma’eman, kaa nikoo nyi’a mouw si rumerawir se tou rapa wo terang wia nisea se witu eng gorem eng kareiydeman, ²⁰ madidik se tou we’engel, wo menenuru’ se tou reiy’pe’ dewasa, karengan witu nukum Taurat nikoo koo makapunyala kalekepan e reiy’ sa mina’asa kepandean wo eng kaulitan. ²¹ Jadi, kumura ku’a re’en koo si maturu’ se tou walina, reiy’ ku’a re’en nikoo koo maturu’ en toumu nuesa? Nikoo si maturu’: “Te’a marongkit,” ka’a nikoo nuesa koo marongkit? ²² Nikoo si limila’: “Te’a masiwo en zinah,” ka’a nikoo nuesa koo masiwo en zinah? Nikoo si mari’iris e reiy’ sa mina’asa berhala, ka’a nikoo nuesa koo rimemu’ witu e wale berhala? ²³ Nikoo koo mesawa’ witu e nukum Taurat, ka’a nikoo nuesa koo masero’ si Empung ampit melangkoiy e nukum Taurat i ti’i? ²⁴ Tanu wawean neiy i kepatik: “Karengan kaa nikoo mouw e ngaran ni Empung niojat witu e nelet ne bangsa-bangsa walina.” ²⁵ Sunat memang wawean penoronna, sa koo melale’la e nukum Taurat; ta’an sa koo melangkoiy e nukum Taurat, takar en sunatmu e reiy’ mola kasi sipenoronna. ²⁶ Jadi sa sitou reiy’ makasunat si mawee ghenangla em pengiween-pengiween e nukum Taurat, reiy’ ku’a re’en nisia si papokeiyla masuat ampit sitou sinunatouw? ²⁷ Sa tuana, takar sitou reiy’ makasunat, ta’an si matuanala e nukum Taurat, si laa ma’akimla nikouw nu makapunya e nukum neiy i kepatik wo en sunat, ta’an si limangkoiy e nukum Taurat. ²⁸ Karengan si patotoren Yahudi reiy’ sitou lahiriah Yahudi, wo si tinotor sunat, reiy’ mouw en sunat tinuanala eng kenaramen lahiriah. ²⁹ Ta’an sitou Yahudi tulen nyi’a mouw nisia si reiy’ paloo’oala eng keyahudianna wo en sunat nyi’a mouw en sunat witu eng gorem e nate, kenaramen rohani, reiy’ eng kenaramen hurufiah. Takar em pujian i wee nisia e mineiy reiy’ waki sitou, ta’an i te waki si Empung.