Tabea ¹ Niaku ku makiwee eng genangmu witu si Febe, patuari ta si melayanla se jema’at waki Kengkrea, ² rio kouw sumungkul nisia witu si Tuhan, tanu eng kumurana wia se tou-tou kudus, wo sawanganola sia sa i tu pemandungenna. Karengan nisia nuesa si simawangola se kelaker tou, o kangkasi wia niaku nuesa. ³ I pa’ayo mola en tabea wia si Priskila wo si Akwila, se ka’ampit-ka’ampit esa nga pepa’ayangan ampit niaku witu si Kristus Yesus. ⁴ Nisea se simaelangola e nyawa nea kaa em patou-touangku. Wia nisea reiy’kan i te niaku si metarumakase, ta’an kangkasi em baya se jema’at reiy’ Yahudi. ⁵ Tabea kangkasi wia se jema’at witu em bale nea. Tabea wia si Epenetus si patuari neiy i koupuskula, nyi’a mouw si wu’ana ketare waki daerah Asia i wee si Kristus. ⁶ Tabea wia si Maria, si mina’ayangola mengente’ i wee nikouw. ⁷ Tabea wia si Andronikus wo si Yunias, se patuari-patuariku esa nge bangsa, se mekasa mouw pinenjarala mewali-wali ampit niaku, nyi’a i ti’i se tou-tou paloo’o-loo’on witu nelet ne rasul wo se minamuali mouw Kristen nu reiy’pe’ niaku. ⁸ Tabea wia si Ampliatus si neiyku i koupusla witu si Tuhan. ⁹ Tabea wia si Urbanus, si ka’ampit esa nga pepa’ayangen ampit nikeiy witu si Kristus, wo tabea wia si Stakhis, si’i koupusku. ¹⁰ Tabea wia si Apeles si taangouw uji wia si Kristus. Tabea wia nisea, se witu em bale ni Aristobulus. ¹¹ Tabea wia si Herodion, si ka’ampitku esa nge bangsa. Tabea wia nisea se witu em bale ni Narkisus, se witu si Tuhan. ¹² Tabea wia si Trifena wo si Trifosa se mepa’ayang mengente’ witu em pelayanan Tuhan. Tabea wia si Persis si neiyku i koupusla, si mina’ayangola mengente’ witu em pelayanan Tuhan. ¹³ Tabea wia si Rufus, sitou pineleng witu si Tuhan, wo tabea wia si ina’na, si i wee niaku nyi’a mouw kangkasi si ina’. ¹⁴ Tabea wia si Asinkritus, Flegon, Hermes, Patrobas, hermas wo se patuari-patuari mewali-wali ampit nisea. ¹⁵ Tabea wia si Filologus, wo si Yulia, Nereus wo se patuarina wewene, wo si Olimpas, wo kangkasi wia se reiy’ sa mina’asa tou kudus se mewali-wali ampit nisea. ¹⁶ Metabe-tabea’anouw kouw ampit en siong kudus. Tabea wia nikouw waki em baya ne jema’at Kristus. ¹⁷ Ta’an niaku ku ngume’enge’la nikouw, patuari waya, rio kouw mategha-tegham wia nisea, se minasu’usukan ampit en tine’u kina’atoan niouw mola, e lumentutla peta’atasan wo em bewilot. Kaa ni’itu liseiyenouw sea! ¹⁸ Karengan se tou-tou tuana se reiy’ melayanla si Kristus, Tuhan ta, ta’an se melayanla em po’ot nea nuesa. Wo ampit e lelila’an-lelila’an nea mengaruiy witu em baasa nea emis nisea se mawiles wia se tou-tou tulus e natena. ¹⁹ E nabar tanume eng kelale’annu eng kinalinga’anouw em baya ne tou. Kaa ni’itu niaku ku mepa’a-pa’ar tanume nikouw. Ta’an niaku ku pa’ar rio kouw sama’ witu en sapa e le’os wo weresi witu en sapa e lewo’, ²⁰ Satorona si Empung, si kembu’an en dame sejahtera, si mapawee-wee kumemula si Iblis witu em bawa’ e ne’amu. ²¹ Tabea wia nikouw waki si Timotius, ka’ampitku esa nga pepa’ayangan, wo waki si Lukius, Yason, wo si Sosipater, se ka’ampit-ka’ampitku esa nge bangsa. ²² Tabea witu si Tuhan wia nikouw waki si Tertius, nyi’a i ti’i niaku, si minatik en surat i yi’i. ²³ Tabea wia nikouw waki si Gayus, si minee tete’upan wia niaku, wo wia em baya ne jema’at. Tabea wia nikouw waki si Erastus, si bendahara em banua, wo waki si Kwartus, patuari ta. ²⁴ E nupus karunia ni Yesus Kristus, Tuhan ta, rumapitla nikouw nu waya! Amin. ²⁵ I wee Nisia, si makakuasa mekeketerla nikouw, - i ki’it e Injil kasa kasine’uan wo e nabar tanume si Yesus Kristus, minatoroan ampit e lelila’an pengiro-ngirong, neiy i penesla makaaba-abad eng keurena, ²⁶ ta’an en teakan neiy mouw i papaloo’o-loo’ola wo sa i ki’it em perenta ni Empung abadi, neiy mouw i abarla eng kaol-kaol ne nabi wia se reiy’ sa mina’asa bangsa kaa laa meteteperla nisea witu eng kelale’an e iman – ²⁷ i wee Nisia, si maesa-esa Empung wuta eng hikmat, kaa si Yesus Kristus: e reiy’ sa mina’asa kalo’oran i ka’ayo eng keure-urena! Amin.