Sitou lewea’ wo sitou ente’ ¹ Nikita, si ente’, kita lewo’ sa reiy’ mesa’an eng kalewea’an ne tou reiy’ ente’ wo te’a kita masero eng kasenangan ta nuesa. ² Susur tou witu nelet ta si lewo’ sa reiy’ sumero kasenangan ni kasuat ta demi eng kale’osanna kaa laa mewewangun nisia. ³ Karengan si Kristus kangkasi si reiy’ masero eng kasenangan-Na nuesa, ta’an tanu wawean neiy i kepatik: “En tetotoren-tetotoren na’abuten nea, e maabut Nikoo, en timena’ mola niaku.” ⁴ Karengan e reiy’ sa mina’asa wo’o sapa neiy i patik eng ketareanna, neiy mouw i patik kaa laa mamuali teturu wia nikita, rio kita te’etep tumiboiy witu em paarapen kaa eng katenteman wo em pangiboran waki Kaol Suci. ⁵ Satorona si Empung, si kembu’an eng katenteman wo em pangiboran, kumaruniala eng karetukan wia nikouw, minatoroan ampit eng kepa’aran ni Kristus Yesus, ⁶ i ka’ayo ampit esa nga ate wo esa nga suara kouw lumo’orla si Empung wo si Ama’ Tuhan ta, Yesus Kristus. ⁷ Kaa ni’itu sungkulenouw siesa wia se walina, masuat tanu si Kristus kangkasi simungkulola nikita, i wee eng kalo’oran ni Empung. ⁸ Si pemaksudkula nyi’a mouw, karengan eng kaulitan ni Empung Kristus minamuali mouw pelayan ne tou-tou makasunat kaa laa metete’etepla en ta’ar neiy mouw i wee-Nala wia se nene moyang ta, ⁹ wo kaa laa mesesiwola se bangsa-bangsa, rio sea lumo’orla si Empung karengan e rahmat-Na, tanu wawean neiy i kepatik: “Kaa ni’itu niaku ku laa lumo’orla Nikoo witu e nelet ne bangsa-bangsa wo kumantarla e mazmur i wee e ngaran-Nu.” ¹⁰ Wo en tumodongla nyi’a: “Mepa’a-pa’arola, hei bangsa-bangsa, ampit se umat-Na.” ¹¹ Wo kasi: “Lo’orenouw si Tuhan, hei kouw nu waya ee bangsa-bangsa wo ma’anouw se reiy’ sa mina’asa suku bangsa se lumo’or Nisia.” ¹² Wo ne tumodongla nyi’a pokeiy ni Yesaya: “En suru waki aka ni Esai e laa rumetik, wo Nisia si laa tumo’or kaa laa mepeperenta se bangsa-bangsa, wo wia-Nisia mouw se bangsa bangsa se laa meela e narapan.” ¹³ Satorona si Empung, kembu’an em paarapen, si mutala nikouw ampit e reiy’ sa mina’asa kepa’a-pa’aran wo en dame sejahtera witu iman miouw, rio kaa eng kaketeran e Roh Kudus kouw makaloko-lokon witu em paarapen. ¹⁴ Paulus si minapaloo’o-loo’ola en to’otolan-to’otolan em patikanna 14 Patuariku waya, niaku nuesa ku memang ma’eman tanume nikouw, kaa nikouw kangkasi kouw minawuta mouw ampit eng kale’osan wo ampit e reiy’ sa mina’asa tine’u wo makawoo laa mengenge’enge’an. ¹⁵ Ta’an, karengan e nupus karunia neiy mouw i anugerahla ni Empung wia niaku, niaku wisa i te ampit e noki berani ku minatikola wia nikoo kaa laa makighenangla nikouw, ¹⁶ nyi’a i ti’i kaa niaku ku toro mamuali pelayan ni Kristus Yesus i wee se bangsa-bangsa reiy’ Yahudi witu em pelayanan paabaran e Injil ni Empung, rio se bangsa-bangsa reiy’ Yahudi se toro sungkulen ni Empung tanume en sesempe mekepa’aren wia-Nisia, se sinucila ni Roh Kudus. ¹⁷ Jadi witu si Kristus niaku ku toro sumawa’ tanume em pelayananku i wee si Empung. ¹⁸ Karengan niaku ku reiy’ laa berani menoto-notor tanume e wo’o sapa walina, kacuali tanume en sapa em pina’ayangola ni Kristus kaa niaku, nyi’a i ti’i kaa laa ma’aka-akala se bangsa-bangsa walina witu eng kelale’an, kaa e lelila’an wo em pasiwo-siwon, ¹⁹ kaa eng kuasa eng kowa’-kowa’ wo e mujizat-mujizat wo kaa eng kuasa e Roh. Tuana mouw witu em pakela-kelangan maledong waki Yerusalem i ka’ayo waki Ilirikum niaku ku minabarola eng kawutana e Injil ni Kristus. ²⁰ Wo witu em pinaabaran i ti’i niaku ku mapokeiyla tanume eng kaormatanku, kaa niaku ku reiy’ timuanala nyi’a witu en tampa-tampa, waki wisa e ngaran ni Kristus eng kasine’uanouw ne tou, rio niaku ku te’a mebebangun witu natas en teto’otolan, rineta’anola ne tou walina, ²¹ ta’an minatoroan ampit wawean neiy i kepatik: “Nisea, se reiy’pe’ ma’an mekasa maka’ato abar tanume Nisia, se laa lumoo’ Nisia, wo nisea, se reiy’ ma’an mekasa liminga nyi’a, se laa mangarti nyi’a.” ²² Ni’itu mouw eng karenganna niaku ku maena-ena’ kina’ape’an kaa laa melelalesla nikouw. ²³ Ta’an en teakan, karengan niaku ku reiy’ mola kasi tampa pepa’ayangan wia en daerah i yi’i wo karengan niaku ku pira mola nge te’un eng keurena pa’ar melelalesla nikouw, ²⁴ niaku ku maarapla witu em pakela-kelangangku me’a waki Spanyol niaku ku toro tumuli witu en tampamu wo maatoan ampit nikouw, i ka’ayo kouw toro malila niaku witume, nu reiy’ mouw niaku nu reiy’ ure mine’anla em pinate’upan ampit nikouw. ²⁵ Ta’an en teakan niaku ku kasuatan witu em pakela-kelangan me’a waki Yerusalem ma’alila en sesawang wia se tou-tou kudus. ²⁶ Karengan e Makedonia wo e Akhaya se minedo mola kaputusan kaa laa mesesumbangla sapa-sapa wia se tou-tou miskin witu nelet ne tou-tou kudus waki Yerusalem. ²⁷ Eng kaputusan i ti’i memang niedo nea mouw, ta’an e ni’itu nyi’a mouw eng kewajiban nea. Karengan, sa se bangsa-bangsa walina se minaka’ato mouw weteng witu eng harta rohani ne tou Yahudi, takar e lewo’ sa reiy’ mouw kangkasi se bangsa-bangsa walina i ti’i se melayanla se tou Yahudi ampit eng harta duniawi nea. ²⁸ Sakawisa niaku ku limekepola e lukar i ti’i wo simarakanola e wua’na ne bangsa-bangsa walina i ti’i wia nisea, niaku ku laa mae waki Spanyol tumorome eng kota miouw. ²⁹ Wo kete’uangku, kaa sa aku meiy lumalesi nikouw, niaku ku laa tumuanala nyi’a ampit wuta em berkat ni Kristus. ³⁰ Ta’an demi si Kristus, Tuhan ta, wo demi nupus e Roh, niaku ku ngume’enge’la nikouw, patuari waya, kaa laa kumiwee mewali-wali ampit niaku witu en sesombayangen wia si Empung i wee niaku, ³¹ rio niaku ku minapiara waki se tou-tou reiy’ lale’ waki Yudea, wo rio em pelayanangku i wee e Yerusalem en sungkulen ampit e le’os ne tou-tou kudus maname, ³² rio niaku ku ampit mepa’a-pa’ar meiy wia nikouw kaa eng kepa’aran ni Empung, maka’ato kasegaya’an mewali-wali ampit nikouw. ³³ Empung, si kembu’an en dame sejahtera, si rumapitla nikouw nu waya! Amin.