¹ Sapatare eng kapualitan Keraja’an Sorga masuat en tanu siesa tou mekewale e memo’odope’ kasa rumou’mi wo sumero se memema’ayang- memema’ayang i wee e numa anggorna. ² Sia nu minaasa’anouw ampit se memema’ayang i ti’i tanume en tetoro esa dinar esa nga endo, sia rumeo nisea mea waki e numa anggorna ³ Wo’o wona’ jam sembilan memo’odo sia rumou’mi kasi wo linoo’ona waweane’ kasi se tou-tou walina se reiy’ mengura waki pasar. ⁴ Pokeiyna wia nisea: kangkasi kouw waki e numa anggorku wo sapa e waar laa ku i weela wia nikoo. Wo sea tu’u mea. ⁵ Wo’o wona’ jam dua belas wo jam tiga mawengido sia rumou’mi kasi wo sumiwola masuat tanu eng ketare. ⁶ Wo’o wona’ jam lima mawengido sia rumou’mi kasi wo matola se tou-tou walina kangkasi, Laa o pokeiyna wia nisea: Ka’a kouw reiy’ mengura wia nyi’i eng kelabotanouw e nendo?” ⁷ Pokeiy nea wia nisia: Karengan reiy’la sitou mewewee tetoro wia nikeiy. Pokeiyna wia nisea: Mea kangkasi ku’a kouw waki e numa anggorku. ⁸ Katoroan e nendo wengi si tuang i ti’i lumila’, wia si mandorna: Keretenouw se memema’ayang-memema’ayang i ti’i wo wearela en tetoro nea, muleiymi se ghimorem mamuri i ka’ayo se ghimorem kimetare. ⁹ Takar meiy mouw se minuleiy ma’ayang wo’o wona jam lima wo sea maka’ato siesa o siesa e nesa dinar. ¹⁰ Kamurian meiy mouw se ghimorem kimetare, ghenang nea se laa maka’ato lumakerla, ta’an sea tu’u minaka’ato siesa o siesa e nesa dinar kangkasi. ¹¹ Katoroan sea nu maka’ato nyi’a, sea masu’u-su’ut wia si tuang i ti’i, ¹² pokeiy nea: Sea se ghimorem mamuri yi’i se mina’ayang i te satu jam wo pinasuatmu i tela ampit nikeiy nu simanga endo tu’u mina’ayang wuter wo timaangla en te’etel ni endo. ¹³ Ta’an si tuang i ti’i miningkot siesa tou wia nisea: Patuari, niaku ku reiy’ masiwo e reiy’ adil wia nikoo. Reiy’ ku’a ta minaasa’anola esa dinar esa nga endo? ¹⁴ Edonouw em betengmu wo mea mouw; niaku ku meweweela wia se tou ghimorem mamuri yi’i masuat tanu wia nikoo. ¹⁵ Reiy’ ku’a niaku ku waya’an i te metetuanala eng kapunya’anku i ki’it eng kepa’ar nateku? Ka’apa oki’ ghenang ku’a re’en koo, kaa niaku nu murah ate? ¹⁶ Tuana mouw se tou mamuri se laa mamuali kimetare wo se kimetare se laa mamuali mamuri.” ¹⁷ 17 Katoroan si Yesus nu me’a mouw waki Yerusalem, Sia kumeret sea nu mapulu’ o rua murid-Na timampas wo lumila’ wia nisea wia nuner e lalan: ¹⁸ “Teakan ta mengea waki Yerusalem wo si Oki’ ni Tou si laa i sarakanla wia se imam-imam kepala wo se ahli-ahli Taurat, wo sea se laa meela Nisia ukuman paten. ¹⁹ Wo sea se laa sumarakanla Nisia wia se bangsa-bangsa reiy’ makasine’u si Empung, rio Sia penero-nero’ala, wewen wo i salibla, wo witu nendo katelu Sia si laa to’oren.” ²⁰ Takar meiy mouw si ina’ ne oki’ ni Zebedeus ampit se oki-oki’na i ti’i wia si Yesus, laa o maongkot witu en sinaru-Na kaa mekekiwee wo’o sapa wia-Nisia. ²¹ Pokeiy ni Yesus: “Sapa eng kepa’armu?” Wingkotna: “Weeani perenta, rio se rua oki’ku yi’i se toro rumuber ee sangari witu eng gorem Keraja’an-Nu, siesa si witu esa nga weka lele’os-Mu wo siesa kasi si witu esa nga weka kawii-Mu.” ²² Ta’an si Yesus miningkot, pokeiy-Na: “Kouw reiy’ mete’u, sapa em pakiween niouw. Toro ku’a re’en kouw kumoo’ en cawan, e lewo’ sa reiy’ koo’eng-Ku?” Pokeiy nea wia-Nisia: “Keiy toro.” ²³ Yesus minila’ wia nisea: “ En cawan-Ku memang e laa koo’on niouw, ta’an eng kapualitan rumuber witu esa nga weka lele’os-Ku ka’apa witu esa nga weka kawii-Ku, Niaku ku reiy’la hak meweweela nyi’a. Ni’i wee mokan ni’itu wia se tou-tou wia si seiy si Ama’-Ku simadia mola nyi’a.” ²⁴ Liminga ni’itu meupi’ mouw se mapulu’ murid walina wia se rua matuari i ti’i. ²⁵ Ta’an si Yesus kimeret nisea laa o lumila’: “Kouw mete’u, kaa se pemerenta-pemerenta bangsa-bangsa maperenta se rakyatna ampit e lawas wesi wo se pemangko’-pemangko’ se makelangela eng kuasa nea kakete wia nisea. ²⁶ Reiy’ kouman tuana witu e nelet miouw. Seiy i te si pa’ar mamuali wangko’ witu e nelet miouw, satorona sia si mamuali pelayanmu, ²⁷ wo seiy i te si pa’ar mamuali paki’i-ki’itan witu e nelet miouw, satorona sia si mamuali hambamu; ²⁸ masuat tanu si Oki’ ni Tou mineiy reiy’ kaa si layanen, ta’an i te kaa melelayanela wo kaa meweweela e nyawa-Na mamuali tebusan wia se laker tou.” ²⁹ Wo katoroan si Yesus wo se murid-murid-Na rumou’mi waki Yerikho, ka’asa se tou mareo-reok maki’i-ki’it Nisia. ³⁰ Wawean se rua tou rapa rimuber witu e li’ilik lalan se liminga, kaa si Yesus melangkoiy, laa o sea maaleiy: “Tuhan, Urang ni Daud, koupus i tela keiy!” ³¹ Ta’an se tou ka’asa i ti’i timogor nisea rio sea menes. Ta’an sea se maka ente’ mola maaleiy, pokeiy nea: “Tuhan, Urang ni Daud, koupus i tela keiy!” ³² Laa o mena’ si Yesus wo kumeret nisea. Sia lumila: “Sapa eng kepa’ar miouw rio Niaku ku sumiwola i wee nikouw?” ³³ Wingkot nea: “Tuhan, rio em beren neiy en toro lumoo’.” ³⁴ Takar minoghe mouw e nate ni Yesus kaa en tongkoupusen, laa o Sia tumiboiy em beren nea wo en toro i te ni’itu kangkasi sea se maloo’ mouw laa o kumi’it Nisia.