¹ 1 Witu e nedo ni’itu meiy mouw se murid-murid i ti’i wia si Yesus wo mueiy : “ Seiy re’en si kasa wangko’ witu eng Keraja’an Sorga?” ² Takar Yesus si kimeret sianakoki’ wo tumampala nisia witu eng kauneran nea ³ laa o lumila’ : “ Niaku lumila’me wia nikoo, kaulitna sa kouw reiy’ makedo’ wo mamuali tanu sianakoki’ yi’i, kouw reiy’ laa ghumorem witu eng gorem Keraja’an Sorga. ⁴ Awesla seiy i te si kumumengla en touna wo mamuali tanu sianakoki’ yi’i, sia mouw si kasa wangko’ witu eng Keraja’an Sorga. ⁵ Wo seiy i te si sumungkul siesa oki’ tanu si yi’i witu e ngaran-Ku, sia si simungkul Niaku.” ⁶ “Ta’an seiy i te si simeipla meta’asa’an wia se oki-oki’ rintek yi’i se ma’eman wia Niaku, eng kasa le’os wia nisia sa e nesa watu kilangan ni’i wa’akesla witu e lee’na laa o sia i tenemla witu eng gorem en tasik. ⁷ Cilaka mouw eng kaoatan ampit e reiy’ sa mina’asa pangaseseipanna: memang em pangaseseipan e lewo’ sa reiy’ wawean, ta’an cilaka mouw se tou matuanala nyi’a. ⁸ Sa e lawasmu ka’apa e ne’amu maseipla nikoo, panggalenouw wo i terekouw i tu, karengan eng kasa le’os wia nikoo ghumorem witu eng gorem patou-touan ampit e lawas kudung ka’apa pekol ta’an i te e lekep rua lawas wo rua ne’amu ni’i pe’epesla witu eng gorem napi kekal. ⁹ Wo sa em beren nu sumeipla nikoo, tu’ilenouw wo i terekla i tu, karengan eng kasa le’os wia nikoo ghumorem witu eng gorem patou-touan ampit maka weren esa ta’an i te ipe’epesla witu eng gorem e napi naraka ampit maka weren rua. ¹⁰ Ghenangenouw, te’a mapokeiyla kumeng siesa tou wia seoki-oki’ rintek yi’i. Karengan Niaku lumila’me wia nikoo: Wawean si malaikat nea waki sorga si re’eregh matu’us eng gio ni Ama’-Ku waki sorga. [ ¹¹ Karengan si Oki’ ni Tou mineiy kaa meiy melelawirla se neiy i kaliong.]” ¹² Kumura em paloo’annula? Sa si esa tou makapunya se esa nga atus domba, wo siesa witu e nelet nea neiy i kaseip, reiy’ ku’a sia si laa tumele’ula se siouw ngapulu’ o siouw witu eng kakuntungan wo mea sumero si neiy i kaseip i ti’i? ¹³ Wo Niaku lumila’me wia nikoo: Kaulitna sa sia minaka’ato mola nisia, eng kasa sela e naruiyna wia si esa i ti’i ta’an wia se siouw ngapulu’ o siouw reiy’ neiy i kaseip. ¹⁴ Tuanakan kangkasi si Ama’mu waki sorga si reiy’ mepa’ar rio siesa tou tu’u wia se oki-oki’ yi’i i kaliong.” ¹⁵ “Sakawisa si patuarimu simiwo en dosa, togorenouw sia witu i te kouw nurua. Sa sia lumingala e nge’enge’mu kina’atoannu mouw sumeup sia. ¹⁶ Sa sia reiy’ lumingala nikoo, alinouw si esa tou ka’apa rua tou kasi, rio witu em peila’la ne rua ka’apa telu tou sairi, eng kapualitan i ti’i e reiy’ i peware-wareng. ¹⁷ Sa sia reiy’ pa’ar lumingala nisea, ipa’ayo mola eng kapualitan nyi’a wia se jema’at, Wo sa sea reiy’ pa’ar kangkasi lumingala se jema’at, paloo’onola sia tanu sitou reiy’ makasine’u si Empung ka’apa si tou mememurut cukai. ¹⁸ Niaku lumila’me wia nikoo: Kaulitna sapa e neiymu i wa’akes wia eng kaoatan yi’i e laa i kewa’akes waki sorga wo sapa e neiymu i reta’la wia eng kaoatan yi’i e laa i kareta’ waki sorga. ¹⁹ Wo kasi Niaku lumila’me wia nikoo: “Sa rua tou waki nikoo wia eng kaoatan yi’i maesa’an kumiwee e sapa i te tu’u, em pakiween nea i ti’i e laa le’ele’an ni Ama-Ku waki sorga. ²⁰ Karengan wisa se rua ka’apa telu tou minerur witu e ngaran-Ku, witu Niaku witu e nuner nea.” ²¹ Kamurian meiy mouw si Petrus wo lumila’ wia si Yesus: “Tuhan, i ka’ayo makapira niaku ku lewo’ sa reiy’ maampungla si patuariku sa sia simiwo en dosa wia niaku? I ka’ayo makapitu?” ²² Yesus limila’ wia nisia: “Reiy’, Niaku lumila’me wia nikoo: Reiy’ ma’ayo makapitu, ta’an i te i ka’ayo makapitu ngapulu’ o makapitu. ²³ Karengan eng kapualitan Keraja’an Sorga en tanume siesa raja si pa’ar mesesiwola rerekenan ampit se hamba-hambana. ²⁴ Sia nu mamuleiy mouw masiwola e rerekenan i ti’i, i saru mola wia nisia siesa tou si minutang mapulu’ nga riwu talenta. ²⁵ Ta’an karengan sitou i ti’i reiy’ mouw makawoo melelekepla e nutangna, raja i ti’i si rimeola rio sia i wangker ma’an se oki’ o si ka’awuna wo e reiy’ sa mina’asa kapunya’anna kaa em pewewear e nutangna. ²⁶ Takar mongkotouw si hamba i ti’i sumempe nisia, pokeiyna: sumabaare’la, e reiy’ sa mina’asa nutangku e laaku lekepen. ²⁷ Laa o moghe mouw e nate ni raja i ti’i kaa en tongkoupusen wia si hamba i ti’i, i ka’ayo sia i wayanala wo rume’ila e nutangna. ²⁸ Ta’an katoroan si hamba i ti’i rumou’mi, sia maatoan ampit siesa hamba walina si minutang esa nga atus dinar wia nisia. Sia sumikop wo kumo’omes si ka’ampitna i ti’i, pokeiyna: wearen e nutangmu! ²⁹ Takar mongkotouw si ka’ampitna i ti’i wo makiwee wia nisia: Sumabaare’la, e nutangku i ti’i e laaku lekepen. ³⁰ Ta’an nisia si simede’ wo sumarakanla si ka’ampitna i ti’i witu eng gorem em penjara i ka’ayo lekepenna e nutangna. ³¹ Limoo’ ni’itu se ka’ampit-ka’ampitna walina se kasa tekur laa o ma’ayola e reiy’ sa mina’asa e minamuali wia si tuang nea. ³² 32 Raja i ti’i si rimeo kumeret sitou i ti’i wo lumila’ wia nisia: Heiy hamba lewo’, e mina pekasa nutangmu rine’iku mola karengan nikoo koo makiwee nyi’a wia niaku. ³³ Reiy’ ku’a nikoo tu’u koo lewo’ sa reiy’ meupusla si ka’ampitmu tanu niaku mineupusola nikoo? ³⁴ Takar moupi’ mouw si tuangna i ti’i wo sumarakanla nisia wia se algojo-algojo, i ka’ayo sia lumekepla e mina pekasa nutangna. ³⁵ Takar si Ama’-Ku waki sorga si laa sumiwola en tuanakan kangkasi wia nikoo, sakawisa kouw siesa o siesa reiy’ ma’ampungla si patuarimu ampit e minapekasa natemu.”