¹ Si Yesus nu simampetla masusuiy witu en sinaru ne tou kelaker, ghumoremouw Sia waki Kapernaum. ² Witu wawean siesa perwira makapunya siesa hamba, si kasa pa’arga’anna. Si hamba i it’i si kasuatan kasa rara’an wo si weitouw mate. ³ Katoroan si perwira i ti’i nu liminga en tanume si Yesus, sia rumeo se pirala tou se tu’a-tu’a Yahudi meiy wia-Nisia kaa laa mekekiwee, rio Sia meiy wo lume’osla si hambana. ⁴ Nisea se mineiy wia si Yesus wo nisea se kasa makiwee en tetulungan-Na, pokeiy nea: Nisia si waar tulungen-Nu, ⁵ karengan nisia si meupus se bangsa ta wo nisia mouw si timanggong eng kinaparedeiy e wale ibadat meiy.” ⁶ Laa o mea si Yesus mewali-wali ampit nisea. Katoroan Sia nu reiy’ mouw wa’akatla waki wale ni perwira i ti’i, si perwira i ti’i si rimeo se kalo-kalona laa lumila’la wia-Nisia: “Tuang, te’a mouw memedu-medu, karengan niaku ku reiy’ waar sumungkul si tuang witu eng gorem em baleku; ⁷ kaa ni’itu mouw niaku kangkasi ku maloo’ola en touku ku reiy’ waar ma’eiy wia-Nikoo. Ta’an lumila’ mola esa nga totor tetotoren, takar si hambaku i ti’i si laa male’os. ⁸ Karengan niaku nuesa ku bawahan, wo witu e wawa’ku waweane’ kangkasi perajurit. Sa aku lumilala’ si meta’asa’an wia se perajurit i ti’i: “Mea!, takar sia mea, wo wia si esape’ kasi: “Meiy!, takar sia meiy, ka’apa tu’u wia si hambaku: “Pa’ayangenouw e nyi’i!, takar sia ma’ayangla nyi’a.” ⁹ Yesus nu liminga mola em peiyla’la i ti’i, Nisia si ma’erang wia nisia, wo eng kasuatan si limenge wia se tou kelaker se maki’itla Nisia, Sia lumila’: “Niaku ku lumila’me wia nikoo, iman eng kasela i yi’i e reiy’pe’ ma’an mekasa i pasungkul-Ku, ma’anouw tu’u witu e nelet ne tou Israel!” ¹⁰ Wo se tou-tou neiy i reo i ti’i nu minarengouw waki wale, neiy aton neala si hamba i ti’i si segaya’ mouw sumoup. ¹¹ Kamurian Yesus si minea waki e nesa kota mekengaran Nain, se murid-murid-Na se minea mewali-wali ampit Nisia, wo kangkasi se tou kelaker se rimapitla-Nisia mareo-reok. ¹² Nisia nu tawi mouw em pepalen leloangan kota, wawean sitou minate si pinesa’an witu luar, sioki’ tuama, sioki’ pengesan ni ina’na si balu mouw, wo kelaker se tou witu eng kota i ti’i se rimapitla si balu i ti’i. ¹³ Wo katoroan si Tuhan nu limoo’ si balu i ti’i, i kaoghe mouw e nate-Na kaa en tongkoupusen, laa o Sia lumila’la wia nisia: “Te’a maame’!” ¹⁴ Kasuatan metawila e wewulengan i ti’i Sia lumelerla nyi’a, wo eng kasuatan se mawuleng i ti’i nu minena’, Sia lumila: “Heiy oki’ taretumou, Niaku ku lumila’me wia nikoo, tumo’orouw!” ¹⁵ Takar tumo’orouw sitou i t’i wo rumuber wo muleiy mengila-ngila’, wo si Yesus si simarakanla nisia wia si ina’na. ¹⁶ Em baya ne tou i ti’i se kineide’an wo sea malo’orla si Empung, kasuatan meila’: “Siesa nabi wangko si minodolouw wia eng keuneran ta,” wo “Si Empung si limalesouw se umat-Na.” ¹⁷ Takar tu rumangketouw e nabar tanume si Yesus waki minapekasa Yudea wo waki minapekasa en daerah kaledongna. ¹⁸ Katoroan si Yohanes nu minaka’ato abar tanume e reiy’ sa mina’asa em peristiwa i ti’i wia se murid-muridna, ¹⁹ sia kumeret se rua tou witu e neletna wo rumeo nisea mueiy wia si Tuhan: “Nikoo mouw si laa meiy i ti’i ka’apa e lewo’ sa reiy’ ku’a re’en keiy ma’ana’la tou walina?” ²⁰ Katoroan se rua tou i ti’i i ka’ayola wia si Yesus, sea lumila’: “Si Yohanes Pembaptis si rimeo nikeiy mueiy wia-Nikoo: Sa Nikoo ku’a re’en si laa meiy i ti’i ka’apa e lewo’ sa reiy’ mouw ku’a re’en keiy ma’ana’la tou walina?” ²¹ Witu e nedo i ti’i Yesus si lime’osla kelaker tou witu e reiy’ sa mina’asa rumara wo em peme’itan wo witu e roh-roh lewo’, wo Sia kumaruniala ni’i paloo’la wia se kelaker tou rapa. ²² Wo si Yesus si miningkot nisea: “Mea mouw, wo i lila’ mola wia si Yohanes sapa e linoo’ miouw wo en sapa e lininga miouw: Sitou rapa si limoo’, sitou kepor si kimelang, sitou kusta si minalenas, sitou tuli si liminga, sitou minate si tino’orla wo wia se tou miskin neiy i abarla e nabar le’os. ²³ Wo ma’aruiyola se tou reiy’ minerara e nate wo sumede’ Niaku.” ²⁴ Se rereoan ni Yohanes i ti’i nu minea mouw, o muleiy mouw si Yesus sumusuiy wia se tou kelaker i ti’i en tanume si Yohanes: “I wee sapa ku’a re’en kouw mea waki padang gurun? Lumoo’ en tabelang ni’i paoghela e reghes mea o meiy? ²⁵ Ka’apa i wee sapa ku’a re’en kouw mea? Lumoo’ sitou minake e nalus? Sitou minake eng kewangun wo si matou-tou mewah, en tampana waki istana raja. ²⁶ Jadi i wee sapa ku’a re’en kouw me’a? Lumoo’ si nabi? Nulit, wo Niaku ku lumila’me wia nikoo, awes tare e lumantouwla ta’an si nabi. ²⁷ Karengan en tanume Nisia wawean neiy i kepatik: Loo’onouw, Niaku ku rimeo si neiy i toke-Ku rumeriorla wia Nikoo, nisia si laa tumiro’la e lalan-Mu witu en sinaru-Mu. ²⁸ Niaku ku lumila’me wia nikoo: Witu e nelet nea nu neiy i patoula ni wewene reiy’la siesa tou tu’u si lumantouwla eng kewangko’ ta’an si Yohanes, ta’an si kasa rintek witu eng Keraja’an ni Empung si lumantouwla eng kewangko’ ta’an nisia.” ²⁹ Se minapekasa tou kelaker se liminga e lelila’an-Na, ampitouw se mememurut cukai, se meulitla eng kaulitan ni Empung, karengan nisea se minee mola en tou binaptis ni Yohanes. ³⁰ Ta’an se tou-tou Farisi wo se ahli-ahli Taurat se simede’ e maksud ni Empung witu en tou nea, karengan nisea se so’o baptisen ni Yohanes. ³¹ Pokeiy ni Yesus: “Ampit en sapa ku’a re’en se laa Ku i ulurla se tou-tou waki se angkatan i yi’i wo ampit en sapa ku’a re’en sea i ti’i masuat? ³² Nisea i ti’i se i ulur se oki’-oki’ rimuber waki pasar wo se ma’aleiyan: Nikeiy keiy masengo e no’olingen i wee nikoo, ta’an nikouw kouw reiy’ ma’engket, nikeiy keiy mekantarla eng kidung mengasi’, ta’an nikouw kouw reiy’ maame’. ³³ Karengan si Yohanes Pembaptis si mineiy, nisia si reiy’ kimaan roti wo si reiy’ kimoo’ anggor, wo kouw lumila’: Nisia si sinelaran ni setang. ³⁴ Kamurian si Oki ni Tou si mineiy, Sia kumaan wo kumoo’, wo kouw lumila’: Loo’onouw, Nisia si tou karoko’ wo mengoo’, kalo ne mememurut cukai wo ne tou berdosa. ³⁵ Ta’an eng hikmat neiy i ulitla em baya ne tou se minaka’ato nyi’a.” ³⁶ Siesa tou Farisi si minundang si Yesus kaa meiy kumaan waki walena. Yesus si mineiy waki wale ni tou Farisi i ti’i, laa o rumuber kumaan. ³⁷ Witu eng kota i ti’i wawean siesa wewene si kasa mouw kasine’uan si tanume siesa tou berdosa. Katoroan si wewene i ti’i nu liminga, kaa si Yesus si kasuatan mekaan witu em bale ni tou Farisi i ti’i, o meiy mouw sia maali-ali e nesa buli-buli pualam pinumpunan e lana wangi. ³⁸ Kasuatan maame’ sia laa rumedeiy witu muri ni Yesus tawi e ne’a-Na, laa o kumekosla e ne’a-Na i ti’i ampit e lue’na wo memeo-meosla ampit em bu’ukna, kamurian sia sumiong e ne’a-Na wo lumanala nyi’a ampit e lana wangi i ti’i. ³⁹ Katoroan sitou Farisi minundang si Yesus nu limoo’ eng kapualitan i ti’i, sia lumila’ witu eng gorem e natena: “Sa Sia i yi’i si nabi, tantu Nisia si mete’u, seiy ku’a re’en wo tou en sapa ku’a re’en si wewene kima’apang-Nisia i yi’i; tantu Nisia si mete’u, karengan si wewene i ti’i siesa tou berdosa.” ⁴⁰ Laa o lumila si Yesus wia nisia: “Simon wawean e laa Ku i pelelila’la wia nikoo.” Singkom ni Simon: “I lila’ momi, Guru.” ⁴¹ “Wawean se rua tou se minutang wia siesa tou rumereta’ loit. Siesa tou si minutang lima nga atus dinar, si walina e lima nga pulu’. ⁴² Karengan nisea se reiy’ makawoo mear, takar sia rume’ila e nutang ne rua tou i ti’i. Seiy ku’a re’en si witu e nelet nea si laa makaupusla nisia?” ⁴³ Wingkot ni Simon: “Niaku wona’ nisia si kasa laker rine’iala e nutangna.” Pokeiy ni Yesus wia nisia: “E nulit eng genangmu i ti’i.” ⁴⁴ Wo eng kasuatan si limenge wia si wewene i ti’i, Sia lumila’ wia si Simon: “Nikoo koo limoo’ si wewene i yi’i? Niaku nu ghimorem wia em balemu, ta’an nikoo koo reiy’ mineela Niaku rano kaa ni pa’oas e ne’a-Ku, ta’an nisia si kimekosola e ne’a-Ku ampit e lue’ wo memeo-meosla ampit em bu’ukna. ⁴⁵ Nikoo koo reiy’ simiong Niaku, ta’an rengan Niaku nu ghimoremi nisia si reiy’la si ena’na masiong e ne’a-Ku. ⁴⁶ Nikoo koo reiy’ limanala eng kokong-Ku ampit e lana, ta’an nisia si limanala e ne’a-Ku ampit e lana wangi. ⁴⁷ Kaa ni’itu Niaku ku lumila’me wia nikoo: En dosana kelaker i ti’i e niampunganouw, karengan nisia si lakerouw simiwo e nupus. Ta’an sitou en toyo’ neiy i ampungla, en toyo’ kangasi sia masiwo upus.” ⁴⁸ Laa o Sia lumila’ wia si wewene i ti’i: “En dosamu niampunganola.” ⁴⁹ Wo nisea, se rimuber mekaan mewali-wali Nisia, se megheghenang witu e nate nea: “Seiy ku’a re’en Nisia i yi’i, i ka’ayo Sia toro ma’ampungela en dosa?” ⁵⁰ Ta’an si Yesus si limila’ wia si wewene i ti’i: “Imanmu e limawirola nikoo, mea mouw ampit eng kelawiran!”