¹ Wo si Yesus si limila’ wia se murid-murid-Na: “Wawean siesa tou kaya si makapunya siesa bendahara. Wia nisia si pina’ayoala en teturean, kaa si bendahara i ti’i si menera-nerala eng kapunya’anna. ² Laa o sia kumeret si bendahara i ti’i wo lumila’ wia nisia: “Sapa ku’a re’en e liningakula en tanume nikoo? Weeani pertanggong jawaban witu nurusannu, karengan nikoo koo reiy’ mouw kasi toro ma’ayang tanume si bendahara. ³ Pokeiy ni bendahara i ti’i witu eng gorem e natena: Sapa mouw e lewo’ sa reiy’ siwongku? Tuangku si minena’la niaku witu en jabatanku tanume ku bendahara. Mingkung niaku ku lengeiy, mengengiwee niaku ku meirang. ⁴ Niaku ku mete’u sa sapa e laaku siwon, rio sakawisa ku i ena’ witu en jabatanku tanume si bendahara, wawean tou si laa tuma’apung niaku witu em balena. ⁵ Laa o sia kumeret siesa o siesa se minutang wia si tuangna. Pokeiyna wia si ketare: Takura ku’a re’en e nutangmu wia si tuangku? ⁶ Wingkot ni tou i ti’i: Esa nga atus tampayang lana. Laa o pokeiyna wia sitou i ti’i: Nyi’i mouw en surat nutangmu, rumuberouw wo sumiwo mouw surat utang walina en teakan i te kangkasi: Lima nga pulu’ tampayang. ⁷ Kamurian sia lumila’ wia si karua: Wo takura ku’a re’en e nutangmu? Wingkot ni tou i ti’i: esa nga atus pikul gandum. Pokeiyna wia sitou i ti’i: Nyi’i mouw en surat nutangmu, sumiwo mouw surat utang walina: Uwalu nga pulu’ pikul. ⁸ Laa o lo’oren ni tuang i ti’i si bendahara reiy’ jujur i ti’i, karengan nisia si mininta’ mola ampit e lali’iket. Karengan se oki-oki’ eng kaoatan i yi’i se lumantouwla eng kelali’iketan wia se kasuat nea ta’an wia se oki-oki’ en terang. ⁹ Wo Niaku ku lumila’me wia nikoo: Wa’akesenouw em pekaloan ampit mepakela si Mamon reiy’ jujur, rio sa si Mamon i ti’i si reiy’ mouw kasi mete’u tumulung, nikouw kouw sinungkulouw witu eng gorem en dasing abadi.” ¹⁰ Seiy i te si lale’ witu em perkara-perkara rintek, nisia si lale’ kangkasi witu em perkara-perkara wangko’, Wo seiy i te si reiy’ ulit witu em perkara-perkara rintek, nisia si reiy’ ulit kangkasi witu em perkara-perkara wangko’. ¹¹ Jadi, sa kouw reiy’ lale’ witu eng kapualitan ni Mamon reiy’ jujur, seiy mouw ku’a re’en si laa mapa’emanla wia nikoo eng harta kaulitna? ¹² Wo sa kouw reiy’ lale’ witu eng harta ne tou walina, seiy mouw si laa sumarakan eng hartamu nuesa wia nikoo? ¹³ Siesa hamba si reiy’ mete’u lumukar wia se rua tuang. Karengan sa tuana nisia si laa rumi’iris siesa wo meupus se walina. Ka’apa nisia si laa lale’ wia siesa wo si reiy’ melelo’orla se walina. Nikouw kouw reiy’ mete’u lumukar wia si Empung wo wia si Mamon.” ¹⁴ Em baya nyi’a i ti’i e lininga ne tou-tou Farisi, se hamba-hamba e loit i ti’i, wo nisea se masero’la wia Nisia. ¹⁵ Laa o Sia lumila’ wia nisea: “Nikouw kouw minulitla en tou witu en sinaru ne tou, Ta’an si Empung si mete’u natemu. Karengan sapa em pa’erangen ne tou, eng kari’iris ni Empung. ¹⁶ E nukum Taurat wo eng kaol em baya ne nabi em pepakene’ i ka’ayo witu en zaman ni Yohanes; wo rengan e nedo ni’itu eng Keraja’an ni Empung neiy i abarla wo susur tou se mekekontoiyla nyi’a se mekekaatan megheghoremla nyi’a. ¹⁷ Kasa gampang e langit wo em bumi mere’i ta’an e nesa ti’itik witu nukum Taurat e mapo’opol. ¹⁸ Susur tou si tima'atasla si tu'awewena laa o kumaweng ampit si wewene walina, sia si masiwo en sa'amek; wo seiy i te si kumaweng ampit si wewene si tina'atasla ni tu'atuamana, nisia si masiwo en sa'amek" ¹⁹ Wawean siesa tou kaya si reiy’ mena’ mepake eng karaiy buwung wo e roko’ nalus, wo susur e nendo nisia si mepa’a-pa’ar witu eng kamewa’an. ²⁰ Wo wawean siesa tou mengengiwee mekengaran Lazarus, e nouwakna mina wuta ampit eng kudis, si ghimoleiy tawi witu em pepalen em bale ni tou kaya i ti’i, ²¹ wo si pa’ar merere’ila e naremna ampit en sapa malenta’mi witu e meja ni tou kaya i ti’i. Awes tare se asu-asu se mineiy wo masila’ eng kudisna. ²² Kamurian mate mouw sitou miskin i ti’i, laa o alin ne malaikat-malaikat witu em pinalar ni Abraham. ²³ Sitou kaya i ti’i kangkasi si minate, laa o kuburen. Wo eng kasuatan nisia nu peme’itan en sengsara waki alam maut sia kuma’ate waki atas, wo waki wa’akat o loo’onna si Abraham, wo si Lazarus si rimuber witu em pinalarna. ²⁴ Laa o sia maaleiy, pokeiyna: Ama’ Abraham, i keupus i tela niaku. Reo mouw si Lazarus, rio sia sumosouwla en tempok en tetudu’na witu eng gorem en dano wo ghume’egherla e lilaku, karengan niaku ku kasa merara witu layas e napi i yi’i. ²⁵ Ta’an si Abraham si limila’: Ee oki’, ghenangenola, kaa nikoo koo minaka’ato mouw e reiy’ sa mina’asa e le’os witu e nedo patou-touannu, kasuatan si Lazarus e reiy’ sa mina’asa wuruk. Teakan si minaka’ato e niboran wo nikoo koo kasa peme’itan. ²⁶ En tumampasla witu ni’itu witu e nelet meiy wo nikoo minitar en temping reiy’ kalewetan, rio sea nu pa’ar rumou’me wia nyi’i o me’a wia nikoo ka’apa tu’u sea nu pa’ar merereu’mi maname o ma’eiy wia nikeiy se reiy’ i kalewet. ²⁷ Pokeiy ni tou i ti’i: Sa tuana, niaku ku kumiwee wia nikoo, ama’, rio koo rumeo nisia mea waki wale ni ama’ku, ²⁸ karengan waweane’ se lima patuariku, rio sia ngume’enge’la wia nisea ampit e makauli-ulit, rio te’a sea ghumorem ee sangari witu eng gorem en tampa peme’itan i yi’i. ²⁹ Ta’an pokeiy ni Abraham: Wawean witu nisea eng kasairian ni Musa wo em baya ne nabi; le’osouw sea lumingala eng kasairian i ti’i. ³⁰ Wingkot ni tou i ti’i: Reiy’, Ama’ Abraham, ta’an sa wawean siesa tou waki elet ne tou minate o meiy wia nisea, nisea se laa makedo’. ³¹ Pokeiy ni Abraham wia nisia: Sa sea reiy’ limingala eng kasairian ni Musa wo em baya ne nabi, nisea se reiy’ kangkasi laa pa’ar pinapa’emanela, ma’anouw tu’u ni esa tou si timo’ori witu e nelet ne tou minate.