¹ Em baya ne mememurut cukai wo se tou-tou berdosa eng kenaramen nea sea meiy wia si Yesus kaa se meiy melelingala Nisia. ² Takar mengu’ungu-ngu’ungulouw se tou-tou Farisi wo se ahli-ahli Taurat, pokeiy nea: “Nisia si simungkul se tou-tou berdosa wo si kimaan mewali-wali ampit nisea.” ³ Laa o Sia lumila’la em peulurela i yi’i wia nisea: ⁴ “Seiy ku’a re’en si witu nelet miouw si makapunya se esa nga atus domba, wo sa wona’ sia kaliongan siesa nga ipus witu e nelet nea, sia reiy’ tumele’ula se siouw nga pulu’ o siouw nga ipus waki padang gurun wo mea sumero si neiy i kaseip i ti’i i ka’ayo sia ka’atoanna? ⁵ Wo sa sia kina’atoanna mola, sia rumeta’la nisia witu natas em palukana ampit e mepa’a-pa’ar, ⁶ wo i kekeka’ayona waki wale sia kumeret se kalo-kalona wo se ketana’-ketana’na kasuatan lumila’ wia nisea: Mepa’a-pa’arola mewali-wali ampit niaku, karengan si dombaku neiy i kaliong i ti’i si niatoku mouw. ⁷ Niaku ku lumila’me wia nikoo: Tuanakan kangkasi e laa wawean eng kepa’a-pa’aran waki sorga karengan siesa tou berdosa si minakedo’, lumantouwla witu eng kepa’a-pa’aran eng karengan se siouw nga pulu’ o siouw tou ulit se reiy’ mepadungla em pakedo’an.” ⁸ “Ka’apa wewene wisa ku’a re’en si makapunya e mapulu’ dirham, wo sa sia kaliongan e nesa witu nelet nyi’a, sia reiy’ tumutungla solo wo sumapu em bale kasuatan masero nyi’a ampit eng kasa maato-ato i ka’ayo sia matola nyi’a? ⁹ Wo sa i tu kina’atoanna mola nyi’a, sia kumeret se karia-karia wo se ketana’-ketana’na kasuatan lumila’: Mepa’a-pa’arola mewali-wali ampit niaku, karengan en dirhamku neiy i kaliong i ti’i e niatoku mouw. ¹⁰ Niaku ku lumila’me wia nikoo: Tuanakan kangkasi e laa wawean kepa’a-pa’aran wia se malaikat-malaikat ni Empung karengan siesa tou berdosa si minakedo’.” ¹¹ Yesus si limila’ kasi: “Wawean siesa tou makapunya rua oki’ tuama. ¹² Pokeiy ni taweng wia si ama’na: Ama’, i wee mola wia niaku e weteng eng harta kapunya’an ta e minamuali wetengku. Laa o i pemete-metengla ni ama’na eng harta kakaya’an i ti’i witu e nelet nea. ¹³ Em pira mola nga endo kamurian sioki’ taweng i ti’i si minangker e minapekasa wetengna i ti’i laa o mea waki wanua wa’akat. Manamome o sia meghio-ghiola eng harta kapunya’anna i ti’i ampit e memoya-moya. ¹⁴ Ni’itu nu kina’apuna mola em baya nyi’a, o lumentutouw eng kelalenan witu em banua i ti’i wo sia tu’u muleiy mapedis. ¹⁵ Laa o sia mea wo ma’ayang wia siesa pemema’ayangan witu em banua i ti’i. Sitou i ti’i si rimeo nisia mea waki uma kaa mea tumayur wia se tieiyna. ¹⁶ Laa o sia pa’ar mekekaanla e nampas minamuali kekaanen ne tieiy i ti’i, ta’an reiy’la siesa tou tu’u si mineela nyi’a wia nisia. ¹⁷ Laa o sia mamete’ula eng ka’ada’anna, pokeiyna: Kumura eng kelakerna se tou mengengedo nendo wia si ama’ku e mangasesewel eng kekaanen nea, ta’an niaku wia nyi’i ku mate mouw kelalenan. ¹⁸ Niaku ku laa tumo’or wo mea wia si ama’ku wo lumila’ wia nisia: Ama’, niaku ku mina berdosa mouw witu en sinaru en sorga wo witu en sinaru ni ama’, ¹⁹ niaku ku reiy’ mouw waar kasi totoren oki’ ni ama’; edonola niaku tanume si meta’asa’an tou maedo-edo nendo wia si ama’. ²⁰ Takar tumo’orouw sia wo mea wia si ama’na. Katoroan sia nu wakipe’ wa’akat, si linoo’ mouw ni ama’na, laa o i kaoghe mouw e natena kaa en tongkoupusen. Si ama’na i ti’i si timingkas mea matola nisia laa o kuma’abeng wo sumiong nisia. ²¹ Pokeiy ni oki’ i ti’i wia nisia: Ama’, niaku ku mina berdosa mouw witu en sinaru en sorga wo witu en sinaru ni ama’, niaku ku reiy’ mouw waar kasi totoren oki’ ni ama’. ²² Ta’an si ama’ i ti’i si limila’ wia se hamba-hambana: Mario-riorouw alini wia nyi’i eng karaiy kasa le’os, i pake mola ni’itu wia nisia wo todongala sesolong witu en tetudu’na wo en sapatu witu e ne’ana. ²³ Wo edonola sioki’ ni sapi rebur i ti’i, reretanola sia wo meiy mouw ta kumaan wo mepa’a-pa’ar. ²⁴ Karengan si oki’ku i yi’i si minate mouw wo si timou sumeup, nisia si neiy mouw i kaliong wo ka’atoan sumeup. Takar muleiy mouw sea mepa’a-pa’ar. ²⁵ Ta’an si oki’na polon si waki uma wo eng katoroan nisia nu marengi wo tumawi witu em bale, sia luminga e legu’na en no’olingen wo eng kekantaren na’engketen. ²⁶ Laa o sia kumeret si meta’asa’an hamba wo mueiy wia nisia sapa em penoron em baya nyi’a i ti’i. ²⁷ Wingkot ni hamba i ti’i: Tuarimu si minarengomi wo si ama’mu si rimeretola sioki’ ni sapi rebur, karengan sia si minatola nisia si minarengi ampit en segaya’. ²⁸ Takar meupi’ mouw sioki’ polon i ti’i wo nisia si so’o ghumorem. Laa o rumou’mi si ama’na wo sumusuiy ampit nisia. ²⁹ Ta’an nisia si miningkot si ama’na, pokeiyna: Mina te’u-te’unouw niaku melayanla si ama’ wo reiy’pe’ ma’an mekasa niaku lumangkoiy em perenta ni ama’, ta’an wia niaku reiy’pe’ ma’an mekasa si ama’ meela siesa nga ipus oki’ ni membe’ kaa mepepa’a-pa’arla ampit se kalo-kaloku. ³⁰ Ta’an tare mouw i te meiy sioki’ ni ama’ si kima’apu mola eng harta kakaya’an ni ama’ mewali-wali ampit se sumesa’amek-aumesa’amek, takar si ama’ si rimeretla sioki’ ni sapi rebur i ti’i i wee nisia. ³¹ Pokeiy ni ama’na wia nisia: Oki’ku, nikoo koo minena’ ampit niaku, wo e reiy’ sa mina’asa eng kapunya’anku nyi’a mouw eng kapunya’annu. ³² Kita ta waar mepa’a-pa’ar wo melaya-laya’ karengan si tuarimu si minate mouw wo si timou sumeup, nisia si neiy mouw i kaliong wo si kina’atoan sumeup.”