¹ Hey oki-oki’, lale’enola se tu’amu witu si Tuhan, karengan e lewo’ sa reiy’ mouw en tuana. ² Sighi’inola si ama’mu wo si ina’mu – e nyi’i mouw e nesa perenta em pe’uku-ukumen, en tanu em pakaloo’o-loo’ola witu en ta’ar i yi’i: ³ rio kouw ma’aruiy wo e pakatu’an wia em bumi. ⁴ Wo nikouw, ama’-ama’, te’a mouw meteto’orla e nupi’ witu e nate ne oki-oki’mu, ta’an turu’unouw sea witu en teturu’ wo e nge’enge’ ni Tuhan. ⁵ Hey hamba-hamba, lale’enola si tuangmu si wia eng kaoatan ampit e nide’ wo e meiyde’, wo ampit en tulus ate, e masuat en tanu nikouw nu lale’ wia si Kristus, ⁶ te’a i te witu en sinaru nea kaa laa mesesenangla e nate ni tou, ta’an en tanume se hamba-hamba ni Kristus se ampit e minapekasa e nate se timuanala eng kepa’aran ni Empung, ⁷ wo se ampit en timiro’ kimelangla em pelayanan nea se tanu se tou-tou melayanela si Tuhan wo e reiy’ sitou. ⁸ Eng kete’uan niouw, kaa susur tou, e le’os si hamba, ka’apa tu’u sitou merdeka, sa sia simiwo mouw e wo’o sapa e le’os, nisia si laa maka’ato en suli’na waki si Tuhan. ⁹ Wo nikouw tuang-tuang, sumiwo mouw en tuana kangkasi wia nisea wo i wa’akatola e niwet. Ghenangenouw, si Tuhan nea wo si Tuhan miouw si waki sorga wo Nisia si reiy’ maloo’ eng gio. ¹⁰ Eng kesampetanna, satorona kouw ente’ witu si Tuhan, witu eng kaante’an eng kuasa-Na. ¹¹ pakenola e minapekasa eng kalekepan en senjata ni Empung, rio kouw toro tumaang sumaru e le’ekok ni Iblis; ¹² karengan em perjuangan ta e reiy’ kaa mesesaru e raa’ wo e le’ona, ta’an sumaru se pemerentah-pemerentah, sumaru se penguasa-penguasa, sumaru se penghulu-penghulu eng kaoatan e reiydem i yi’i, sumaru e roh-roh lewo’ wia e udara. ¹³ Kaa e ni’itu edonouw e minapekasa eng kalekepan en senjata ni Empung, rio kouw toro sumu’usukla witu e nendo lewo’ i ti’i wo minena-ena’ rimedeiy, nu reiy’ mouw nikouw nu simampetla e reiy’ sa mina’asa wo’o sapa. ¹⁴ Jadi rumedeiy mouw te’etep, makane’eretenouw eng kaulitan wo mekelabungzirala eng ka’adilan, ¹⁵ e ne’amu e makakasutla eng karela’an kaa laa ma’abarla e Injil dame sejahtera; ¹⁶ witu e reiy’ sa mina’asa eng ka’ada’an pakenola eng kekelung iman, karengan ampit eng kekelung i ti’i kouw toro laa munu’la em baya em panah napi waki si lewo’, ¹⁷ wo sungkulenouw en seipa’ eng kelawiran wo en santi e Roh, e nyi’a i ti’i e nuwu’ ni Empung, ¹⁸ witu e reiy’ sa mina’asa en sesombayangen wo em pa’aleiyen. Sumombayangouw susur e nedo witu e roh wo mategha-teghamouw witu en sesombayangennu i ti’i ampit e maaleiy e reiy’ si ena’na i wee se reiy’ sa mina’asa tou kudus, ¹⁹ o kangkasi i wee niaku, rio wia niaku, sa ku muka’ en sumaku, ku kinarunia’la e lelila’an ulit, rio ampit eng kaberanian niaku ku mabarla em pengiro-ngirong e Injil, ²⁰ si pelayanengkula si tanume si neiy i toke pinenjarala. Sumombayanguouw rio ampit eng kaberanian ku mapaloo’o-loo’ola e nyi’a, en tanu eng kumura e lewo’ sa reiy’na niaku nu sumusuiy. ²¹ Rio o nikouw kangkasi kouw mete’ula eng ka’ada’an wo eng kapualitan en tanume niaku, takar si Tikhikus, si patuari ta i koupus wo si pelayan e lale’ wia si Tuhan, si laa makite’ula em baya e nyi’a wia nikouw. ²² Ampit e maksud i yi’i mouw nisia si neiyku i reo wia nikoo, e nyi’a i ti’i wo rio kouw mete’ula eng kapualitan en tanume nikeiy wo rio sia mibor e natemu. ²³ Dame sejahtera wo e nupus ampit e iman waki si Empung, Ama’ wo waki si Tuhan Yesus Kristus rumapitla nikouw nu waya patuari. ²⁴ E nupus karunia e rumapitla em baya se tou, se meupusla si Tuhan ta Yesus Kristus ampit e nupus e reiy’ mapuneng.