¹ Witu e nendo mekasa melelaa mouw e nedo sumombayang, nyi’a i ti’i en jam tiga mawengindo, lumongkotouw si Petrus wo si Yohanes witu em Bait ni Empung. ² Witu wawean siesa tuama, si kepor rengane’ eng kinetetouna i ka’ayo sia si lewo’ sa reiy’ wulengan. Susur e nendo sitou i ti’i si neiy i reta’la tawi e lengko’an em Bait ni Empung, e mekengaran Gerbang Indah, kaa mekekiwee esa nga wuntul wia se tou maghorem witu em Bait ni Empung. ³ Katoroan sitou i ti’i limoo’, kaa si Petrus wo si Yohanes se megheghorem witu em Bait ni Empung, sia kumiwee esa nga wuntul. ⁴ Nisea se timu’usla nisia wo si Petrus si limila’ : “ Lumoo’ mouw wia nikeiy.” ⁵ Laa sitou i ti’i tumu’usla nisea ampit e narapan laa maka’ato wo’o sapa wia nisea. ⁶ Ta’an si Petrus si limila’ : “ E mas wo em perak reiy’la wia niaku, ta’an sapa em bia niaku, ni’i weekula wia nikoo : Demi e ngaran ni Yesus Kristus, tou Nazaret i ti’i, kumelangouw !” ⁷ Laa o sia tumiboiy e lawas lele’os ni tou i ti’i wo sumawang nisia rumedeiy. En toro i te ni’itu kangkasi eng keterouw e ne’a wo em berenna e ne’a ni tou i ti’i. ⁸ Sia kumompo’ rumedeiy laa o kumelang mea o meiy wo kumi’itla nisea witu eng gorem em Bait ni Empung, kumelang wo mengompo-ngompo’ kasuatan malo’or si Empung. ⁹ Se minapekasa rakyat i ti’i se limoo’ nisia makelang kasuatan malo’or si Empung, ¹⁰ laa o sea sumine’u nisia si tanume sitou mengengiwee esa nga wuntul witu eng Gerbang Indah em Bait ni Empung, i ka’ayo nisea se ma’erang wo i kenganga en tanume en sapa e minamuali mola wia nisia. ¹¹ Karengan sitou i ti’i si reiy’ mena’ maki’itla si Petrus wo si Yohanes, takar se minapekasa ne tou kelaker se kasa kina’erangan i ti’i se mineiy muyutla nisea witu em pondol patotoren Pondol Salomo. ¹² Petrus si lomoo’ se tou kelaker i ti’i laa o lumila’: “ Heiy tou Israel, ka’a kouw ma’erang en tanume e minamuali i ti’i wo ka’a kouw matu’us nikeiy tanu mokan nikeiy keiy simiwola sitou i yi’i kimelang karengan eng kuasa ka’apa eng kelale’an neiy nuesa? ¹³ Empung ni Abraham, Ishak, wo ni Yakub, Empung ne nene moyang ta se limo’orola si Hamba-Na, nyi’a i ti’i si Yesus neiy miouw i sarakan wo i sede’ witu en sinaru ni Pilatus, ma’anouw tu’u si Pilatus si maka ghenang, kaa Nisia si lewo’ sa reiy’ i reta’la. ¹⁴ Ta’an nikouw kouw simede’ Eng Kudus wo e Nulit, ampit mepa’arla siesa tou memunu’ tanu en taber wia nikouw. ¹⁵ Tuana mouw Sia, Si Pa’aka-aka’an witu em patou-touan, si winunu’ miouw mouw, ta’an si Empung si timo’orola Nisia witu e nelet ne tou minate; wo en tanume eng kapualitan i ti’i nikeiy mouw keiy sairi. ¹⁶ Wo karengan em pa’emanan witu e Ngaran ni Yesus, takar e Ngaran i ti’i eng kimeterola sitou linoo’ miouw wo kasine’uan niouw i yi’i ; wo em pa’emanan i ti’i e minee mola kale’osan wia sitou i yi’i witu en sinaru em baya miouw. ¹⁷ Heiy patuari waya, niaku ku mete’u kaa nikouw kouw simiwomola en tuana karengan eng kareiy’mete’uan, masuat tanu se pa’aka-aka’an niouw. ¹⁸ Ta’an ampit e lalan tuana Empung si limekepola en sapa neiy mouw i nuwu’-Nala eng ketarean ampit e nieletan ne nabi-nabi-Na, nyi’a i ti’i kaa si Mesias si neiy i toke-Na si lewo’ sa reiy’ peme’itan. ¹⁹ Kaa ni’itu mawena’asouw wo makedo’ mouw, rio en dosamu e re’inla, ²⁰ rio si Tuhan si mapa eiymi e nendo kale’aran, wo tumoke si Yesus, si wakipe’ eng ketareani neiy i weela nikoo si tanume si Kristus. ²¹ Kristus i ti’i si lewo’ sa reiy’ mena’ waki sorga i ka’ayo e nedo pesesegaya’an e reiy’ sa mina’asa wo’o sapa, tanu neiy i nuwu’la ni Empung ampit e nieletan ne nabi-nabi-Na kudus witu en zaman dulu. ²² Reiy’ re’en e neiy mouw i lila’la ni Musa : Empung Tuhan si laa tumo’orla i wee nikoo siesa nabi witu e nelet ne patuari-patuarimu, masuat tanu niaku : Linganola sia witu e reiy’ sa mina’asa wo’o sapa e laa i lila’nala wia nikoo. ²³ Wo e laa mamuali, kaa em baya ne tou se reiy’ limingala si nabi i ti’i, se laa punengen witu se umat ta. ²⁴ Wo em baya ne nabi se simusuiyola, e muleiymi waki si Semuel, wo nu reiy’ mouw nisia, se minawetikola en tanume en zaman i yi’i. ²⁵ Nikouw mouw kouw maka’ato e wetik-wetik i ti’i wo maka’ato weteng witu en teta’aran tinuana mola ni Empung ampit se nene moyang ta, katoroan Sia nu minee nuwu’ wia si Abraham : Kaa se see’mu em baya ne bangsa wia en saruan em bumi se neiy berkaten. ²⁶ Wo i wee nikouw mouw eng ketare-tare si Empung tumo’orela si Hamba-Na wo tumoke-Nisia wia nikouw, rio Sia merkatla nikouw ampit ma’aka-akala wia nikouw siesa o siesa marengi waki e reiy’ sa mina’asa eng kalewo’annu.”