NENDO NI TUHAN ¹ Patuari waya i koupus, nyi’i en suratouw karua, neiyku i patikla wia nikoo. Witu e rua suratku i ti’i niaku ku me’inakut metetoula em pangartian murni karengan e ge’enge’-nge’enge’, ² rio kouw ghumenangla e lelila’an eng ketareanna neiy mouw i lila’la ne nabi-nabi kudus wo ghumenangla em perenta ni Tuhan wo ni Lumelawir e neiy mouw i pa’ayola ne rasul-rasulmu wia nikoo. ³ Eng kasa i paketa-ketare e lewo’ sa reiy’ kete’uan niouwla nyi’a mouw, kaa witu e nendo-nendo en zaman kesampetan se laa mapa’ato se wela’awa’an-wela’awa’an ampit e wela’awa’-wela’awa’na, nyi’a i ti’i se tou-tou matou-tou maki’itla en seritna. ⁴ Pokeiy nea: “Wisa ku’a re’en en ta’ar tanume eng ke’e eiy-Na i ti’i? Karengan e rengane’ se ama’-ama’ ne opo’ ta nu timayan, e reiy’ sa mina’asa wo’o sapa e minena’kan tanu eng ketarena, witu en toro eng kaoatan nu siniwola.” ⁵ Nisea se timu’utu’ reiy’ pa’ar mamete’u, karengan e nuwu’ ni Empung e langit em bia mouw rengane’ eng ketareanna, wo kangkasi em bumi e nasal waki rano wo kaa en dano, ⁶ wo kaa en dano i ti’i, bumi eng ketareanna minapunengouw, pinunengla e rano ampuan. ⁷ Ta’an kaa e nuwu’ i ti’i kangkasi e langit wo em bumi en teakan e minapiarami witu e napi wo en tinu’utulan i wee e nendo paakiman wo eng kapunengan ne tou-tou fasik. ⁸ Ta’an laa, patuariku waya i koupus, e nesa i yi’i e reiy’ toro liuren niouwla, nyi’a i ti’i, kaa witu en sinaru ni Tuhan esa nga endo masuat tanu esa nga riwu nge te’un wo esa nga riwu nge te’un masuat tanu esa nga endo. ⁹ Tuhan si reiy’ pepar minapatorola en ta’ar-Na, ma’anouw tu’u wawean tou si mapokeiyla nyi’a tanu eng kapeparan, ta’an Nisia si sabaar wia nikouw, karengan Nisia si mepa’arla rio te’a wawean si mapuneng, ta’an i te rio em baya ne tou se murikit wo makedo’. ¹⁰ Ta’an e nendo ni Tuhan e laa i ka’ayomi tanu si rongkit. Witu e nendo ni’itu langit e laa mere’i ampit e lenter mekeide’en wo e rinte’na-rinte’na eng kaoatan e laa marengis witu e layas e napi, wo em bumi wo e reiy’ sa mina’asa em bitu natasna e laa i kaliong minere’i. ¹¹ Jadi, sa e reiy’ sa mina’asa wo’o sapa i yi’i lumaa makemu eng kenaramen tuana, kumura eng kasuci wo eng kelale’na nikouw nu lewo’ sa reiy’ matou-tou ¹² nyi’a i ti’i nikouw si mengena-ngena’la wo manginriorla eng ke’e eiy e nendo ni Empung. Witu e nendo ni’itu langit e laa mapuneng witu e napi wo e rinte’na-rinte’na eng kaoatan e laa makemu karengan e layasna. ¹³ Ta’an minatoroan ampit en ta’ar-Na, nikita ta mengena-ngena’la e langit weru wo em bumi weru, witu e wisa e laa atoan eng kaulitan. ¹⁴ Kaa ni’itu, patuariku waya i koupus, kasuatan mengena-ngena’la em baya nyi’a i yi’i, nikouw kouw lewo’ sa reiy’ me’inakut, rio kouw ka’atoan reiy’ siwalulang wo reiy’ sisering witu en sinaru-Na, witu em pedamean ampit Nisia. ¹⁵ Papokeiy mola eng kasabaaran ni Tuhan ta en teume eng kalempotan wia nikoo kaa laa maka’ato lelawir, tanukan kangkasi si Paulus, si patuari ta i koupus, si minatikouw wia nikoo i ki’it eng hikmat neiy i karuniala wia nisia. ¹⁶ Eng kapualitan i ti’i en siniwona witu em baya en suratna, sakawisa sia sumusuiy tanume em perkara-perkara i yi’i. Witu en surat-suratna i ti’i wawean eng kapualitan-kapualitan em pedis petete’unla, i ka’ayo se tou-tou reiy’ mamete’ula nyi’a wo se reiy’ te’etep e imanna, se manginpurikitla nyi’a mamuali kapunengan nea nuesa, masuat tanu en siniwo neala kangkasi ampit em patikan-patikan walina. ¹⁷ Ta’an nikouw, patuariku waya i koupus, nikouw kouw minete’u mola eng kapualitan i yi’i nu reiy’pe’ nyi’a. Kaa ni’itu tumegha-tegham mouw, rio kouw te’a kakeongan witu eng kaseipan ne tou-tou se reiy’ makasine’u e nukum, wo te’a kaliongan en tetiboiyannu te’etep. ¹⁸ Ta’an tumou mouw witu e nupus karunia wo witu em pasine’uala wia si Tuhan wo si Lumelawir ta, Yesus Kristus. I wee-Nisia eng kalo’oran, en teakan i ka’ayo eng keure-urena.