NABI-NABI WO SE GURU-GURU PALSU ¹ Tanu eng kumura se nabi-nabi palsu eng ketareanna se minapa’ato witu eng keuneran ne umat ni Empung, tuanakan kangkasi witu e nelet miouw e laa wawean guru-guru palsu. Nisea se laa ghumoremla en teturu’-teturu’ meneip maka punengen, awesla nisea se laa kumelong si Penguasa timubusola nisea wo ampit e lalan tuana e makarengan mapa eiyla eng kapunengan witu en tou nea. ² Laker tou se laa kumi’itla eng kenaramen em patou-touan nea eng kinuasa’ala en serit, wo kaa nisea e Lalan Kaulitan e laa ojaten. ³ Wo karengan eng kasorodoanna se guru-guru palsu i ti’i se laa me’inakut sumero e nuntung wia nikouw ampit e ne’umanen-ne’umanen towo nea. Ta’an i wee em pasiwo-siwon nea i ti’i e nukum e nure mouw sinadiala wo eng kapunengan e reiy’ laa i kalodok. ⁴ Karengan sa wona’ si Empung si reiy’ mineupusla se malaikat-malaikat simiwo en dosa ta’an limawala nisea witu eng gorem e naraka wo ampit en tuana simarakanla nisea witu eng gorem eng goa-goa reiydem kaa laa mekekirongla nisea i ka’ayola e nendo paakiman; ⁵ wo sa wona’ si Empung si reiy’ mineupusla eng kaoatan purba, ta’an si limawir i tela si Noh, mengengabar eng kaulitan i ti’i, ampit se pitu tou walina, katoroan Nisia nu minapa eiy e rano ampuan wia se tou-tou fasik; ⁶ wo sa wona’ si Empung si minunengla eng kota Sodom wo eng Gomora ampit e napi, wo ampit en tuana si rime’ila nyi’a wo simiwola nyi’a e nesa nge’enge’ i wee nisea nu matou-tou fasik witu e nora–oras kamurian, ⁷ ta’an Nisia si limawirla si Lot, sitou ulit, reiy’ maena-ena’ peme’itan kaa eng kenaramen em patou-touan ne tou-tou reiy’ makasine’u e nukum wo se maki’it i tela en serit nea nuesa, – ⁸ karengan sitou ulit i yi’i si maena’ witu eng keuneran nea wo susur e nendo si maloo’ wo malinga em pasiwo-siwon – pasiwo-siwon nea e lewo’ i ti’i, i ka’ayo e imukurna ulit i ti’i e minasiksa – ⁹ takar em pakaloo’o-loo’on, kaa si Tuhan si mete’u melelawirla se tou-tou lale’ witu em pewa’awa’an wo mete’u kumirong se tou-tou lewo’ kaa pesesiksan witu e nendo paakiman, ¹⁰ se kasa pe’uku-ukumen nisea se maki’itla eng seritna karengan se pa’ar mekekewurla en tou wo masero’ em paperenta’an ni Empung. Nisea se tuana eng kaberani wo tingkeiy, i ka’ayo se reiy’ meware-wareng maojat eng kalo’oran, ¹¹ padahal se malaikat-malaikat nuesa, se ma’anouw tu’u lebe ente’ wo lebe makakuasa ta’an nisea, se reiy’ mepake e lelila’an-lelila’an ojat, sa se malaikat-malaikat makiwee e nukuman wia nisea witu en sinaru ni Empung. ¹² Ta’an nisea i ti’i se masuat ampit se tekapen reiy’ siakal, masuat ampit se tekapen neiy’ i te i patoula kaa laa sikopen wo punengen. Nisea se maojat sapa e reiy’ kete’uan nea, i ka’ayo kaa em pasiwo-siwon nea e lewo’ nisea nuesa se laa mapuneng tanu se tekapen siru, ¹³ wo se laa me’an e nasib wuruk teume en tetoro eng kalewo’an nea. Memoya-moya witu e nendo oat, em papokeiy neala kanikmatan. Nisea nyi’a mouw se riberek wo se sering, se tinoek witu en serit nea sa sea rumuber kumaan kumoo’mewali-wali ampit nikouw. ¹⁴ Em beren nea wuta e nafsu zinah wo nisea se reiy’ ma’an mekasa masenso’ masiwo en dosa. Nisea se ma’aruiy se tou-tou lewea’. E nate nea minelati mouw witu eng kasorodoan. Nisea nyi’a mouw se tou-tou neiy i kakutok! ¹⁵ Eng karengan nisea se timele’u mola e lalan ulit, takar i kaseipola sea, laa o kumi’itla e lalan ni Bileam, urang ni Beor, si pa’ar maka’ato tetoro i wee em pasiwo-siwon – pasiwo-siwon e lewo’. ¹⁶ Ta’an si Beliam si kasa minaka’ato nge’enge’ witu eng kalewo’anna, karengan si keledai papesa’anan wowo si mesesusuiy ampit en suara ni tou wo mepalouw eng keba’abalan ni nabi i ti’i. ¹⁷ Se guru-guru palsu i ti’i nyi’a mouw se tanu eng kembu’an pera, se tanu e rabun neiy i se’ese’ e reghes tumokol; i wee nisea sinadia mouw en tampa witu eng kareiydeman kasa mekeide’en. ¹⁸ Karengan nisea se matotorla e lelila’an-lelila’an tingkeiy wo reiy’ sisapa wo mepakela en serit sa’amek kaa laa ma’aruiy se tou-tou tare mouw i te rumeta’mi en tou waki nisea nu matou-tou witu eng kaseipan. ¹⁹ Nisea se meta’arla eng kamerdeka’an wia se tou walina, padahal nisea nuesa nyi’a mouw se hamba-hamba eng kapunengan, karengan seiy si kinalala ni tou, nisia nyi’a mouw si hamba ni tou i ti’i. ²⁰ Karengan sa sea, kaa em pasine’uan neala si Tuhan wo si Lumelawir ta, Yesus Kristus, si rimeta’ mola en tou waki eng kakewuran-kakewuran eng kaoatan, ta’an si neiy i kalibat kasi witu nyia’, takar eng kesampetanna eng ka’ada’an nea e lebe wuruk ta’an eng ketarena. ²¹ Kaa ni’itu i wee nisea sapa tare lebe le’os, sa sea reiy’ ma’an mekasa sumine’u e Lalan Kaulitan ta’an i te sea sumine’u nyi’a, ta’an eng kamurian se minurikiti witu em perenta kudus neiy i pa’ayola wia nisea. ²² I wee nisea e minatoroan en sapa neiy i lila’la em peribaasa ulit i yi’i: “Si asu si minareng kasi witu eng kero’na, wo si tieiy si limele’ sumeup kasi witu em pawuta’anna.”