¹ Eng ketare-tare niaku ku ngume-enge’la: I longkotola em pengiween, en sombayang pengiweean wo en totor syukur i wee em baya ne tou, ² i wee se raja-raja wo i wee em baya ne pemangko’, rio kita toro tumou lompon wo lener witu e reiy’ sa mina’asa kelale’an wo eng kaormatan. ³ Ni’itu mouw e le’os wo e mekepa’aren wia si Empung, Lumelawir ta, ⁴ si mangimpa’arla rio em baya ne tou se lawiren wo se maka’ato en tine’u eng kaulitan. ⁵ Karengan si Empung i ti’i si esa wo esa kangkasi Sia si minamuali paelet e nelet ni Empung wo ne tou, nyi’a i ti’i sitou Kristus Yesus, ⁶ si simarakanola en tou-Na tanume en tetubuus i wee em baya ne tou: ni’itu eng kasairian witu e nedo neiy i tantula. ⁷ I wee eng kasairian e ni’itu mouw niaku ku neiy mouw i tantula tanume si mengengabar wo rasul – em peila’kula i yi’i e nulit, niaku ku reiy’ matowo – wo tanume si menenuru’ se tou-tou reiy’ Yahudi, witu e iman wo eng kaulitan. ⁸ Kaa eng karengan e ni’itu niaku ku pa’ar, rio wisa-wisa i te si tuama si sumombayang ampit maalungla e lawas suci, reiy’ ampit e nupi’ wo reiy’ ampit em pesali’isi’an. ⁹ En tuanakan kangkasi satorona si wewene, Satorona nisia si sumudeiy ampit e waar, ampit en sopan wo e rindah, em bu’ukna te’a o pinengepa-ngepang, te’a o mepake mas ka’apa mutiara ka’apa tu’u e labung maal-maal, ¹⁰ ta’an satorona nisia si sumudeiy ampit em pasiwo-siwon le’os, tanu e waar wia si wewene meraghes. ¹¹ E lewo’ sa reiy’na mouw si wewene makapenes en tou wo sumungkul en teturu’ ampit e lale’. ¹² Niaku ku reiy’ me’iyonla si wewene mewewee teturu’ wo kangkasi reiy’ me’iyonla nisia mepeperenta si tuama; satorona nisia si makapenes en tou. ¹³ Karengan si Adam si kasa ketare siniwola, kamurian tare mouw si Hawa. ¹⁴ Awes kangkasi reiy’ si Adam si kina’aruiyan, ta’an i te si wewene i ti’i mouw si kina’aruiyan wo i kawolon witu en dosa. ¹⁵ Ta’an si wewene si laa lawiren karengan si tumimea’la sioki’, asal sia tumentem witu e iman wo e nupus wo em pengudusan ampit e reiy’ sa mina’asa karinda’an.