¹ Olebai-olebaigu, illam hatingngoge hatenamu ta Mori da kamma nadana, Yesus Kristus, waige bammu watte-watteka ata. ² Nyibadaka ata ka amna ta sinagogemu waige banna waina tawurru mas monno kalabbe kabi'kta hina, neddo ta rahi kahamera amwidunni wu ata milla kawaina kalabbe kadilanna, ³ monno miyo enga yimege bamu hamattara mehaminni nadde ata kawaina kalabbe kabi'kta hina monno hanewe tabaranna, "Ngodo dakiwu inne tahadau kadahha, "tabollo taabaranna nadde ata milla miyo hanewe, "Dededawu inna bali, "aiwalleka" Ngodo dawu inne tabara ledugu!" ⁴ Walle nyikawe miyo bam watte-wattekayi ta jongami miyo monno um dadi bam tiba waige hangada-hangada kajapata. ⁵ Olebai-olebai hama nawaraggu, rangngemla! Walle yikawe nai Allah banna pediyi radde ata kamilla ta mata pannutana tutuge kadda dadi pote larta hatena monn kadauge Kerajaan Allah inne Nyiyo habeha jaji tabarada yidda kamma nawaranni Nyiyo? ⁶ Tabollo nyige, miyo badda padda middi ata milla. Walle yudda na radde ata pote kamanakko monno kayorimi ta pengadilan? ⁷ Walle yidda na radde kapaddwe Ngara kadahha, orge miyo maka maikagimmi? ⁸ Inne miyo bam hakakokawe ukkupareha kabanningna doku manege jurrata Bihha, inne "Manawaranni olem ata kataudnna tauwu daumu, "miyo um rayi begge katena. ⁹ Tanyiduwe, inne miyo bam watte-wattekayi ata, miyo rayi mige kajala monno hadedomi ba wumi kalayi ukpareha oro ukpareha. ¹⁰ Ba iyaduyi kadokudi tangngaddi ukpareha, tabollo naparhawe wu akki, nyiyo najala tabara tangngadi ukpareha. ¹¹ Oroge, Nyiyo nahha newe, "Illam kama'kkan, "nahha nanewe wi'kna, "Illam hamaterka ata.” Yidawe, nyi miyo ayim raikanna kama'kkanna, tabollo miyo um hamatem ata, miyo badda rayimigge malayi inno ta ukpareha. ¹² Hanewe monno pahadawe katauna ata-ata ha tiba dahho waige ukkupareha kahha hoila. ¹³ Oroge, inne kamma tiba walle hillu la'kdamagge milla ate manawara tabara ata aika hatingngoge milla ate manawara; milla ate manawara enga nattailowe inne kamma tiba. Hatena Aika Daka Harayi Enga Matewe ¹⁴ Olebai-olebaigu, agaka gauge naadde wu ata banna hanewe nyiyo dage hatena, tabollo nyiyo walle la'kma harayina? Nadadi kawe inne hatena banna pa tolkayi? ¹⁵ Nyi na wu ata haolebai kabani lohho haolebai lawai walle la'kma kalabbena monno nakka ma'kna ha yayo na mali koka, ¹⁶ monno wu ata ta jongamu nahha newe tabaranna, "Kakowu la waina moli, kanna daddi kamowe inne tauwumu banna ngangahawe monno na boktawe," tabollo miyo wallem yiman tabaranna agawe hama'kge tauwuna, agaka gauge inno? ¹⁷ Katauda wi'knage hatena aina irrikayi harayi-harayi, neddo hatena ge engage banna matewe. ¹⁸ Tanyiduwe, enga dada inne ata kahha newe, "Yauwu dage hatena, monno nauwa dage harayi.” Nauwa kag balehawa, "Hatingngoge inne hatenamu aidaka harayi, monno nauwa kag hatingngo gugge inne hatenagu waige harayi.” ¹⁹ Miyo um hatena nai Allah ba wuheyi. Neddo natenawe. Wad-wad japata wi'kna dahha tenawe monno dakka li'kka. ²⁰ Um auwuka'kna miyo bam wallam oro inne hatena aidaka harayige baaida gauge? ²¹ Walletaudage Abraham, amada yitta, na tena oro harayi-harayina kole nyiyo banna marakayi'i Ishak? ²² etawela inne hatena da rayi ulla ole dangngadi harayi-harayi, monno oro harayi-harayi, hatena na bannuge. ²³ Nabannugela agawe neddo hatakbe ta Jurra Bihha, "Abraham naha tena tabai Allah, monno inno yapge ta baranna ba wuwe katena, "monno liddan nyiyo "Ole ate nai Allah.” Nyidawe, miyo etawe walta harayi dalla ata natena, walle wal ta hatena dakelma. ²⁵ Katauda wi'knagge, nai Rahab, walle hap mera duyi, natena oro ha rayina kole nyiyo banna hibbayi radde ata Israel kamai hallata loda monno natulludi yidda badda malaiyi dokuna lara heka? ²⁶ Nyidawe, kataudanna inne tauwu aiaka mang ngahna enga matege, tauda wi'kge hatena aidaka harayi enga matewe.