¹ Yeranai Musa kangaranai Yitro.Yitro wuyi Rato ta Midian.Musa nakarawa nadi ranga nai Yitro tabara lado mali marada gilra mono na diki talete Horeb,letenai Allah. ² Ta letena inna Musa naetayi Malaikat nai Mori lari ta rewo latti tara warri. Musa na etawe tara warri inna na rewowe,tabolo wale na muttuk mawe. ³ Musa linage,"Nauwa ug dahehowe tara warri inna kapiku eta guge kadadi inna,aha tara warri inna walena mutu kawe." ⁴ Kolei Mori etayi Musa dahekawe tara warri,Nyi na kamikani wali ta tara warri inna, "Musa,Musa!" Musa balehawe,"O,Mori." ⁵ Bege,Mori linage,"Illam dahekawu.Bugera todi kopa ledumu oro tana bagiyo yau dau dedemu yiwe tana katenguna. ⁶ Nauwag na Allah Weda waikamu,Allah Abraham,Allah Ishak,mono Allah Yakub." Musa natoniwe matanaoro nyi madauta etayi Allah. ⁷ Bege,Mori linage,"Nauwag etabeyi mayillada ana huhugu kama mayilla ta Mesir,mono Nauwa ug range bedage hoda yidda kole ata Mesir bada hama yillayi yida.Nauwag tadawe ojada yidda. ⁸ Batauge Nauwa ug buru bewa pahoilayi ana huhuGu wali ta ata Mesir.Nauwa enga ngidi gudi yidda huna wali ta hadau ata wikda mono ug kododi yida taha dau ka daha,kama jabola we huhu mon kanena,haluguna hadau ata Kanaan,Het,Amori,Feris,Hewi,mono Yebus. ⁹ Nauwa ug range bedage ojada ata Israel,mono Nauwa ug etayi bada hama yillayi ata Mesir tabarada yidda. ¹⁰ Nyiwe batauge,Nauwa ug halewawu tabarai Firaun.Kakowu! Ngidi gadi anaGu,anada Israel,huna wali ta Mesir." ¹¹ Ta nyiduwe,Musa linage tabarai Allah,"Iyawa nauwa inne dajalage nauwa mag kakowa aroni Firaun mono ngidiyi Ata israel huna wali ta Mesir?" ¹² Allah linage,"Yau dadiwe um rayige oro Nauwa enga oleGugu.Inne nyiwe tadka tubamu ba Nauwa kaha lewawu: Bamu beyo ha ngidiyi yidda hunawali ta Mesir,Yau enga am hogu mono kawojo tabaraGu ta letena inne." ¹³ lodoge,Musa linage tabarai Allah,"Nyi bagu kakowa ta ata Israel mono balugudi tabarada yida,'Allah weda waikami kaha lewawa nauwa,' yida enga kanukadaga,'Iyayi NgaraNa?'Aga daho hatakkigu tabarada yida?" ¹⁴ Allah linage tabarai Musa, "Lumu dage tabrada yida,'NAUWA WALE IYAKMAYI NAUWA.'Inna yau bamu kakowu ta ata Israel,takdage tabrada yida,'NAUWA WALE IYAK MAYI NAUWA kaha lewa bewa nauwa tabrami." ¹⁵ Mono Allah linage tabarai Musa,"Lumuge tabarada yida,Mori Allah weda waikami,Allah Abraham,Allah Ishak,mono Allah Yakub kaha lewawa nauwa tabarami.Nyiwe inna ngaraGu pa nami hoda tangada ata kaha anamurri-ana murri. ¹⁶ "Kakou batauge mono kahayi bai ata Israel.Tak dage tabarada yida,Mori Allah weda waikamu,Allah Abraham,Ishak,monoi Yakub kaha dedala wikbena tabaragu mono kalina,Nauwa ug etabeyi hadami mono Nauwa ug eta bewe agawe harayi dagimi ata Mesir tabara tangami. ¹⁷ Mono,Nauwa ug yibewe liGu enga pahu ngidi hogimi wali tamayilla ta Mesir.Nauwa enga kodo gimi ta tana inna batauge hadauda ata Kanaan,Het,Amori,Feris,Hewi,mono Yebus,inna tana kabanuna huhu mono kanena. ¹⁸ Yida enga range dagu.Yau mono bai ata Israel kamu kako aroni Firaun.Taknage tabarana,Mori yiknai Allah ata Ibrani.Nyi kamai tabarama mono linage tabarama kam kako tauda lado tamarada gilra.Neda bali,nami mayiho maraka tabrai Mori,Allah ma nami. ¹⁹ Ta nyiduwe,Nauwa ug tadawe aina pahaigimi miyo kako.Duka dahege bikta pareha kama madaka ka karuhuyi nyi mana pahai gimi kako. ²⁰ Nyiwe,Nauwa enga wai guge bikta parehaaGu kama daka tuitu paluyi ata Mesir.Nauwa enga patingio gudi tangadi tada ha ngatara danga taha hadau neda.Kole Nauwa bagu rayidi,nyi enga pahainagimi kako. ²¹ Mono,Nauwa enga rayi gudi ata Mesir kada daha ate tabarada ata Israel.Tarahi mi bamu tanage Mesir,mi walemi tanak mage la waige lima kalumu. ²² Tangada lawai Ibrani da karai daho tabarada ata Mesir,tauda jala nage ole bara umami loho dumu ka engana ta umada yida.Lawai Mesir enga yida gimi yida tabarami hayida amaha kaka,amaha rara,mono kalabe talujana.Mi enga yimidi hayida rada ta anami.Tauda dajalage mi enga ngidi butami ngawuda ata Mesir."'