YESUS DA WAY DAWAI BOGE ¹ Ni nuku ni afenai, hoko sura gi mi aku ba na bilen, sura gi mi aku gi gom oho na gaten towarai de falupu pi po uterang. ² Mode ya yo uyerang nado da yang mi gaten ge oho da yang ufan yai, gi ge gatang Lahatal da tapakang tayahang ma gi gagaboho u gehung. ³ Ge uru hoko ya yo gen ari aku he ama iye beka gagaten da hoka gaten tahi kalema tom kikilikil oho pedi pi ahala. ⁴ Ama moko tatan tapakang de Da hoka oho yatow mia? dower awola pi kuta pimang imon oho do ten dolaka gena wer hoko uway. ⁵ Ge oho do ama dang goa utayofong doba he disura naling da ufan fulang oho asing ba yang hota wai hiyaka hoko di bai iya tama di do gowa. ⁶ Ge ia oho do da pun hiyaka hoko gaten alina. ⁷ Doba he, sura naling gom ge do hiyaka fulang hoko wer hoko yang hota doba he ari aku hiyaka ugahiful he hiyaka hoko ama geya ama de beka gaten nang di ama hida lai. ⁸ Ni nuku ni afenai nang nau de yang daleke oho ka utayofong teng nuku yahot teng ribu nuku warai, teng ribu nuku yahot teng nuku warai. ⁹ Lahatal oho de Da ka utayofong ra. Naba da u tehuhung ge ba da gal gaten, Ded oho dawai mang tamina ba ma u tetufa, Dedi bay da ka gaten de gi serang - gi fuhu imon rai. Doba he gi uyala he gi serang - gi fuhu oho mai de gi ba geyagal. ¹⁰ Uru de da hoka oho yahot ama takau warai hiyaka fulang hoko da ka gen, nau karnuku de fulang mia oho moko ara do karai mang do lai hiaka hoko di ara karai. ¹¹ Gare nau karnuku hoko da komong lai he moko pi birang hoko mang towarai ke ufan de pi birang yang dofeng yai Lahatal gi uyala. ¹² Pa Lahatal gi uru ba mang gagarohai, doba he Lahatal di Da yang farot hoka ge. ¹³ Doba he Lahatal da yang tapakang pedi bay fulang hifa, hiyaka hifa ba pi garohai gare ama de nuka ukareang nang do mia boge. ¹⁴ Ni nuku - ni afenai nang, nan de pi garohai oho pedi he ten u kareang mode Lahatal da ten, pedi pi ke ahala ra, pedi pi ten Lahatal ba gap mia. ¹⁵ Usep tom tamina oho Lahatal pi teng ugalowa mode pi nuka ba pi gen yahot Pulus warai ni nuku - ni afenai nang pi bilen oho nuka -nuka yahot Lahatal da u te tufa warai. ¹⁶ Dedi bay nan karnuku sura naling gom oho ba da ubisara osep nan ke he ama dong tang hahalang mode pi po bode bage lai he pi iman do mu. ¹⁷ Ni nuku - ni afenai nang yayang gen ge yi beka oho ge do ped di mi teterang mode ped di dei way oe beka gal amanuka de ka parenta gen oho ama do gi iman gaten do kagen. ¹⁸ May de pi Lahatal gom mi birang, pi gen pinana Yesus Kristus da do towa, wer hoko gena wai ley do geya. osep.